الماتىداعى اقش باس كونسۋلدىعى امەريكا قۇراما شتاتتارىنىڭ الماتىداعى باس كونسۋلى كەرولاين سەۆيدج حانىمنىڭ كەلگەنىن حابارلادى. باس كونسۋل سەۆيدجدىڭ كونسۋلدىق ايماعىنا الماتى جانە شىمكەنت قالالارى، سونداي-اق الماتى، قىزىلوردا، تۇركىستان جانە جامبىل وبلىستارى كىرەدى. بۇل تۋرالى baq.kzكە سىلتەمە جاساپ Abai.kz حابارلايدى. 

"باس كونسۋل قىزمەتىنە كىرىسۋ ءۇشىن بۇل ەرەكشە ۋاقىت، سەبەبى بيىل قازاقستاننىڭ تاۋەلسىزدىگىنە وتىز جىل تولعالى وتىر، ءارى ەكى ەل بولىپ اقش پەن قازاقستان ديپلوماتيالىق قاتىناسىنىڭ وتىز جىلدىعىن اتاپ وتۋدەمىز. ءالى دە قارقىنى باسىلماعان پاندەميا دا وسى وسى كۇنى ەرەكشە نازاردا جانە ەكى ەلىمىزدىڭ COVID-19 ىندەتىنە قارسى بىرلەسكەن كۇرەسى اقش ميسسياسىنىڭ باسىمدىلىعى بولىپ قالا بەرەدى", - دەدى سەۆيدج.

باس كونسۋل سەۆيدج - قازاق ءتىلىن قازاقستانعا كەلەر الدىندا وقىپ-ۇيرەنگەن العاشقى باس كونسۋل.

"وسى قىزمەتىمە دايىندالۋ كەزىندە قازاق ءتىلىن اسا قىزىعۋشىلىقپەن وقىدىم. قازاق ءتىلىن ەندىگارى قازاقستان حالقىمەن بايلانىسىمىزدى تەرەڭدەتىپ، ەكىجاقتى ىنتىماقتاستىقتى نىعايتۋ ءۇشىن قولدانۋعا اسىقپىن", - دەپ اتاپ ءوتتى باس كونسۋل سەۆيدج.

Abai.kz