قازاقستان رەسپۋبليكاسى كونستيتۋتسيا كۇنى جانە ءبىلىم كۇنى قارساڭىندا باقباقتى اۋىلىندا 84 ورىندى بوبەكجاي سالتاناتتى تۇردە اشىلدى. بۇرىن تاۋەلسىزدىك العان جىلدارى قاراۋسىز قالعان نىسان وتكەن جىلى اۋىل تۇرعىندارىنىڭ وتىنىشىنە سايكەس بوبەكجاي بولىپ اشىلۋعا شەشىم قابىلدانعان بولاتىن. بوبەكجايدى قايتا قالپىنا كەلتىرۋ ءۇشىن مەملەكەت تاراپىنان  367.2 ملن. تەڭگە ءبولىندى. بولىنگەن قارجىنى ماقساتتى جۇمساپ، كۇردەلى جوندەۋ جۇمىسىن ساپالى جۇرگىزگەن “Golden siti“  جشس-ءى نىساندى مەرزىمىندە اياقتاعان. بوبەكجاي ءىشى تولىقتاي زاماناۋي ماتەريالدىق بازامەن قامتىلعان.

بوبەكجايدىڭ اشىلۋ سالتاناتىنا قاتىسقان اۋدان اكىمىنىڭ ورىنباسارى ابدىباەۆ ءبورىحان نارىمبەتۇلى جينالعان كوپشىلىكتى كونستيتۋتسيا كۇنىمەن جانە بوبەكجايدىڭ اشىلۋىمەن قۇتتىقتاپ، وڭىردەگى مەكتەپكە دەيىنگى تاربيە سالاسىنداعى اتقارىلىپ جاتقان جۇمىستارعا توقتالدى.

"بالالاردى مەكتەپكە دەيىنگى تاربيەمەن قامتۋ ماقساتىندا  اۋدان بويىنشا 8 بالاباقشا جانە 14 شاعىن ورتالىق جۇمىس جاساپ، بالاباقشالاردا 935, شاعىن ورتالىقتا 600, بارلىعى – 1535 ءبۇلدىرشىن تاربيەلەنۋدە. 3-6 جاس ارالىعىنداعى بۇلدىرشىندەردى قامتۋ 99,3 پايىز بولدى. وبلىس بويىنشا 95,6 پايىز ەسكەرسەك، بۇل باعىتتا اۋدانىمىزدا ىلگەرىلەۋ بار» دەي كەلە، جينالعان قاۋىمدى الداعى كەلە جاتقان جاڭا ءبىلىم كۇنىمەن دە قۇتتىقتاپ ءوتتى.

بوبەكجايدىڭ اشىلۋىنا اۋداندىق ءبىلىم ءبولىمىنىڭ باسشىسى ايمان ايمۇحانبەت، اۋداندىق ىشكى ساياسات ءبولىمىنىڭ باسشىسى گاۋھار امانجولوۆا، باقباقتى اۋىلىنىڭ اكىمى ايدارحان تۇيمەباەۆ، اۋىل ارداگەرلەرى، تۇرعىندارى، مەكتەپ ۇستازدارى مەن بوبەكجاي ۇجىمى قاتىستى.

«مەكتەپكە دەيىنگى تاربيەلەۋمەن قول جەتكىزۋدەگى ورىن تاپشىلىعىن قىسقارتۋ ماقساتىندا 1-3 جاس ارالىعىندا بۇلدىرشىندەردىڭ پايىزىن كوتەرۋ ماقساتىندا وسى باقباقتى اۋىلىندا 84  ورىنعا ارنالعان بوبەكجايدىڭ اشىلۋى ارقىلى الدا 85 پايىزدان 89 پايىزعا كوتەرىلەتىن بولادى» - دەپ اتاپ ءوتتى اۋداندىق ءبىلىم ءبولىمىنىڭ باسشىسى ا.ايمۇحانبەت.

«اۋىل تۇرعىندارىنىڭ ءوتىنىشىن ەسكەرىپ، وسى عيماراتتى مەملەكەت قاراماعىنا الىپ، ونى قايتادان قالپىنا كەلتىرۋ ءۇشىن قوماقتى قارجى بولۋگە ىقپال جاساعان اۋدان اكىمى عالىم توقپەيىسوۆكە، اۋداندىق ءبىلىم ءبولىمىنىڭ باسشىسى ا.ايمۇحانبەتكە، وسى سالاداعى بارشا جاۋاپتى ماماندارعا ايتار العىسىمىز شەكسىز» - دەيدى «كۇنشۋاق» بوبەكجايىنىڭ ادىسكەرى جازيرا قازىبەكوۆا.

ەل تىلەگىمەن اشىلعان بوبەكجاي الداعى مەرزىمدەردە حالىقتىڭ كوڭىلىنەن شىعاتىن تابىستار بيىگىنەن كورىنەتىنىنە سەنىمىمىز مول.

Abai.kz