4 قازان كۇنى Facebook پەن Instagram, WhatsApp جەلىلەرى ىستەن شىقتى. ارتىنشا وزگە دە الەۋمەتتىك جەلىلەردە قيىندىقتار تۋىنداي باستادى. بۇل الەۋمەتتىك جەلىلەر تاريحىنداعى ەڭ ءىرى كوللاپستىڭ ءبىرى رەتىندە تاريحقا ەندى. 

جالپى كوللاپس 6,5 ساعاتقا سوزىلدى. Facebook تاريحىنداعى 2008 جىلدان بەرگى ەڭ ۇزاققا سوزىلعان ىستەن شىعۋ وسى بولدى. ماسەلە Facebook پەن ونىڭ باسقا الەۋمەتتىك جەلىلەرىنىڭ سايتتارىنا كىرۋدى قامتاماسىز ەتەتىن DNS جازبالارىنداعى قاتەگە بايلانىستى دەگەن بولجام بار.

ساراپشىلار DNS جازبالارىنىڭ جوعالۋى جۇيەنىڭ ىشكى وزگەرىستەرىنىڭ ناتيجەسى بولۋى مۇمكىن دەپ بولجايدى، 2019 جىلى دا بۇزىلۋ سەبەبى وسى سەرۆەر پارامەترلەرىنىڭ وزگەرۋى بولعان ەدى. كيبەرشابۋىلدىڭ قۇلدىراۋعا سەبەپ بولۋى مۇمكىن ەكەندىگىنە ەشقانداي دالەل جوق. Facebook-ءتىڭ 1,5 ميلليارد قولدانۋشىسى تۋرالى مالىمەتتەر ساتىلىمعا شىعارىلدى دەگەن حابارلار بار، الايدا Facebook ونى جوققا شىعارۋدا.

Facebook قىزمەتكەرلەرى جۇيەنىڭ اقاۋىنا بايلانىستى جۇمىس ىستەي المادى، سەرۆەرلەردى قولمەن قايتا ىسكە قوسۋ ءۇشىن ارنايى توپ جىبەرىلدى. سوندىقتان دا بۇل كوللاپس وتە ۇزاققا سوزىلدى. ءتىپتى كومپانيا قىزمەتكەرلەرى وزدەرىنىڭ وفيستەرىنە كىرە الماعان.

بۇل ىستەن شىعۋدىڭ تەك قانا جەلى قولدانۋشىلارى ەمەس، سونىمەن بىرگە تىكەلەي كومپانيا اكتسيالارى مەن سان ءتۇرلى قىزمەت تۇرلەرىنە دە كەرى اسەرى بولدى. مىسالى Facebook اكتسيالارى 4,87%، Twitter - 5,78%، NASDAQ جوعارى تەحنولوگيالىق كومپانيالار يندەكسى - 2,14%تومەندەدى. كومپانيانىڭ نەگىزىن قالاعان مارك تسۋكەربەرگتىڭ بايلىعى 7 ساعاتتا 7 ملرد دوللارعا ازايىپ، ول اۋقاتتى ادامدار تىزىمىندە ۇزدىك ۇشتىكتەن بەستىككە تومەندەگەن.

الەۋمەتتىك جەلىلەردىڭ ىستەن شىققانى ەكونوميكاعا قانشالىقتى زيان كەلتىرگەنىن باعامداۋ مۇمكىن ەمەس. جاي عانا الەۋمەتتىك جەلىدەگى بەلسەندىلىكتى قاراساق، سونىڭ ءوزى جەتكىلىكتى. مىسالى تيك-توكتا ءبىر مينۋتتا 167 ميلليون ۆيدەو قارالادى، گۋگلدا 5.7 ميلليون سۇرانىم بولسا، ينستاگرامدا 65 مىڭ فوتو بولىسىلەدى. سونىمەن قاتار 1 مينۋت ىشىندە فەيسبۋكتا 44 ميلليون پوست جازىلىپ، امازوندا 283 مىڭ دوللار ساۋدا جاسالادى. بۇل تانىمال جەلىلەردەگى ساتۋ جانە جارناما دەڭگەيى. ەندى ءدال وسى جارناما مەن ساتۋ  7 ساعاتقا توقتاپ قالعان ساتتە كومپانيالار مەن جەكەلەگەن دۇكەندەر قاگشا شىعىن شەككەنىن ەسەپتەي بەرىڭىز. ميللياردتاعان دوللار.

ءبىر قىزىعى 7 ساعاتتىڭ ىشىندە تۆيتتەر مەن تەلەگرامعا تىركەلۋشىلەر سانى ارتقان. تەلەگرامدى جازىپ الۋشىلار سانى 50 ميلليون ادامعا جەتكەن. 7 ساعاتتىق كوللاپس ادامزاتتىڭ الەۋمەتتىك جەلىمەن بىتەقايناسىپ كەتكەنىن انىق دالەلدەدى جانە كەي مەملەكەتتەردى ءوز الەۋمەتتىك جەلىسىن جاساۋعا يتەرمەلەگەن ويلارعا تۇرتكى بولۋى مۇمكىن.

Abai.kz