قازاقستان رەسپۋبليكاسى پارلامەنتى سەناتىنىڭ جالپى وتىرىسىندا دەپۋتاتتار "قازاقستان رەسپۋبليكاسىنىڭ تاۋەلسىز مەملەكەتتەر دوستاستىعىنا مۇشە مەملەكەتتەرىنىڭ قارۋلى كۇشتەرىنىڭ بىرلەسكەن بايلانىس جۇيەسى تۋرالى كەلىسىمدى راتيفيكاتسيالاۋ تۋرالى" قازاقستان رەسپۋبليكاسىنىڭ زاڭىن قابىلدادى. 

قورعانىس ءمينيسترىنىڭ ورىنباسارى دارىن تۇياقوۆتىڭ ايتۋىنشا كەلىسىمگە التى مەملەكەت قول قويعان. "كەلىسىم قارۋلى كۇشتەردىڭ بىرلەسكەن بايلانىس جۇيەسىن قۇرۋدى كوزدەيدى، ونىڭ نەگىزگى مىندەتتەرى: بايلانىس قىزمەتتەرىن ۇسىنۋ جانە قارۋلى كۇشتەردىڭ باسقارۋ جۇيەسىندە جانە ولاردىڭ اراسىندا اقپاراتتىڭ بارلىق تۇرلەرىمەن الماسۋ. تمد فورماتىندا قۇرىلعان اسكەري نەگىزدەگى ءوزارا ارەكەتتەستىكتىڭ ءبىرتۇتاس جۇيەلەرىنىڭ جۇمىس ىستەۋىن قامتاماسىز ەتۋ", - دەدى ول.

تۇياقوۆ زاڭ جوباسىن قابىلداۋ رەسپۋبليكالىق بيۋدجەتتەن قوسىمشا قاراجاتتى قاجەت ەتپەيتىنىن، سونداي-اق تەرىس الەۋمەتتىك-ەكونوميكالىق نەمەسە قۇقىقتىق سالدارعا اكەپ سوقپايتىنىن ايتتى.

Abai.kz