جەكسەنبى, 5 جەلتوقسان 2021
1345 1 پىكىر 11 قازان, 2021 ساعات 10:52

قازاقستان - ءباا: جاڭا جوبالار قۇنى $6 ملرد-دان اسادى

2021 جىلعى 9-10 قازاندا قر پرەمەر-ءمينيسترى اسقار مامين بىرىككەن اراب امىرلىكتەرىنە جۇمىس ساپارىمەن بارىپ، جالپى قۇنى $6 ملرد-تان اساتىن بىرلەسكەن جاڭا جوبالار جونىندە كەلىسسوز جۇرگىزدى.

ابۋ-دابي قالاسىندا ول ءباا پرەمەر-ءمينيسترىنىڭ ورىنباسارى، پرەزيدەنت ىستەرى جونىندەگى مينيستر شەيح مانسۇر بەن زايد ءال ناحايانمەن، سونداي-اق Abu Dhabi Developmental Holding Company (ADQ) حولدينگتەرى جانە  مەملەكەتتىك دامۋ ينستيتۋتتارى مەن ءباا-ءنىڭ باسقا دا جەتەكشى كومپانيالارىنىڭ باسشىلىعىمەن كەزدەسكەن.

«وتكىزىلگەن كەلىسسوزدەر قورىتىندىسى بويىنشا ەكونوميكانىڭ باسىم سالالارىندا جوبالاردى دامىتۋ بويىنشا ۇزاق مەرزىمدى ستراتەگيالىق ارىپتەستىك ورناتۋ جونىندەگى ۇكىمەتارالىق كەلىسىمگە قول قويىلدى. قۇجات قر ۇلتتىق ەكونوميكاسىنىڭ ەنەرگەتيكالىق، اگروونەركاسىپتىك، كولىك-لوگيستيكالىق، فارماتسەۆتيكالىق جانە قارجى سەكتورلارىنداعى جوبالاردى ىسكە اسىرۋعا باعىتتالعان، ينۆەستيتسيالاردىڭ جالپى كولەمى $6 ملرد-تان اسادى»,- دەلىنگەن حابارلامادا.

ودان بولەك، تاراپتار ساۋدا-ەكونوميكالىق، قارجى-ينۆەستيتسيالىق، ەنەرگەتيكا، كولىك-لوگيستيكا، اگروونەركاسىپ جانە باسقا دا سالالارداعى بۇعان دەيىن قول جەتكىزىلگەن ۋاعدالاستىقتاردى ىسكە اسىرۋ بارىسىن جانە ەكىجاقتى ىنتىماقتاستىق پەرسپەكتيۆاسىن تالقىلاعان.

قازىرگى ۋاقىتتا امىرلىك كومپانيالارى قازاقستاندا جالپى قۇنى $3,5 ملرد-تان اساتىن 11 ءىرى ينۆەستيتسيالىق جوبانى ىسكە اسىرۋعا قاتىسۋدا.

كەلىسىمدى ىسكە اسىرۋداعى قازاقستاننىڭ نەگىزگى ارىپتەسى وڭدەۋ جانە ءوندىرۋ ونەركاسىبى، اوك، كولىك جانە لوگيستيكا، قارجى، تۋريزم، مەديا جانە ەنەرگەتيكا سياقتى سەكتورلاردا كەڭىنەن ۇسىنىلعان ابۋ-دابي ADQ ەگەمەن قورى بولادى. قوردىڭ باسقارۋىندا $175 ملرد استام كولەمدەگى اكتيۆتەر بار.

كەلىسىم اياسىندا «سامۇرىق-قازىنا» اق ADQ-مەن ستراتەگيالىق ىنتىماقتاستىق ورناتىپ، جاڭارتىلاتىن جانە ءداستۇرلى ەنەرگەتيكانى دامىتۋ جونىندەگى بىرلەسكەن ەنەرگەتيكا حولدينگىن قۇرۋعا نيەتتى. قر-دا قۋاتى 5 گۆت بولاتىن كۇن، جەل جانە سۋ ەلەكتر ستانتسيالارىن سالۋ بويىنشا بىرلەسكەن جوبالاردى جانە ت.ب. ىسكە اسىرۋ جوسپارلانۋدا.

«Kazyna Capital Management» اق جانە ADQ ءىت، قارجى تەحنولوگيالارى، اگروتەح، ۆ2ۆ جانە ۆ2س، تەلەكوممۋنيكاتسيالار، ازىق-تۇلىك ونىمدەرىن ءوندىرۋ تەحنولوگيالارى، پلاتفورمالىق شەشىمدەر جانە تسيفرلىق ترانسفورماتسيا جانە ت. ب. سالالاردا بىرلەسكەن ستارتاپ-جوبالاردى قارجىلاندىرۋ ءۇشىن $100 ملن-عا بىرلەسكەن ۆەنچۋرلىق قور قۇرادى. ADQ قر-دا كوتەرمە-تاراتۋ ورتالىقتارى جەلىسىنىڭ قۇرىلىسىنا قاتىسادى. كومپانيا سونداي-اق قازاقستاننىڭ ەتتى مال شارۋاشىلىعى، قۇس شارۋاشىلىعى جانە جەمىس باعبانشىلىعىندا بىرقاتار ءىرى جوبانى ىسكە اسىرۋ مۇمكىندىگىن قاراستىرۋدا.   «سق-فارماتسيا» جشس مەن Rafed قر فارماتسەۆتيكا ونەركاسىبىن دامىتۋدا ىنتىماقتاستىق ورناتادى. ساپار اياسىندا شىعىس قازاقستان وبلىسىنىڭ اكىمدىگى، Sembol جانە Abu Dhabi Fund for Development كومپانيالارى قر شقو-دا «كاتونقاراعاي» تۋريستىك كەشەنى قۇرىلىسىنىڭ جوباسىن جۇزەگە اسىرۋ بويىنشا ىنتىماقتاستىقتىڭ بازالىق شارتتارى تۋرالى كەلىسىمگە قول قويدى»،- دەلىنگەن اقپاراتتا.

سونىمەن قاتار، ساپار اياسىندا مامين «EXPO 2020 Dubai» حالىقارالىق كورمەسىنە بارىپ، وندا قازاقستان، ءباا، رف جانە ت.ب. ۇلتتىق پاۆيلوندارمەن تانىستى.

ايتا كەتەيىك، دۇنيەجۇزىلىك كورمەدەگى قازاقستاندىق پاۆيلوندى كۇتىپ ۇستاۋعا 488 ميلليون تەڭگە جۇمسالادى.

Abai.kz

1 پىكىر