ءوتىڭىز جارىلىپ كەتسە دە ايتايىن... ءبىز ۇلتتىڭ ەرتەڭى ءۇشىن بار جاۋاپكەرشىلىكتى موينىمىزعا ارتا المايتىن بۋىننىڭ وكىلدەرىمىز.
الاشورداشىلاردى مىسالعا الىڭىزشى. وزدەرى - ۇستاز، وزدەرى - عالىم، وزدەرى - جۋرناليست، وزدەرى - اقىن، وزدەرى - جازۋشى. قولىنان نە كەلەدى، قولىنان نە كەلدى، تەك ۇلتىنىڭ ەرتەڭى ءۇشىن بارلىعىن جاسادى. ياعني، اعارتۋشىلىق جولدا، قازاقتى وياتۋدىڭ قامىندا جارعاق قۇلاعى جاستىققا تيمەدى.

مەن ءوزىم جۋرناليست بولعاندىقتان، الاشورداشىلاردىڭ جۋرناليستىك قىرىنا كوپ ءمان بەرەمىن. ولاردىڭ ءار ماقالاسى ۇلتتىڭ جىرتىعىن جاماۋدىڭ جولدارىن كورسەتىپ جاتىر. ال، ءبىز بەن ءسىز شە؟
ءبىز بانككە اقشاسىن تولەي الماي، 5 قاباتتان سەكىرىپ ولگەن قانداسىمىز جايلى جىلت ەتكەن اقپارات بەرۋگە ءماستىرمىز. اۋىز سۋى جوق، جارىقسىز، جولسىز ەلدىڭ ايعايى مەن شۋىن جىرلاۋعا كەلگەندە اۋىزدىعا ءسوز بەرمەيمىز. بارلىق ماسەلەنى بيلىككە اكەپ تىرەيمىز. بىراق، ەشقايسىمىز دا وسى ءبىر تىعىرىقتان شىعار جولدى كورسەتكەن ەمەسپىز. كورسەتۋگە قارىم-قابىلەتىمىز كەمشىن!

ماسەلەن، ءبىلىم پروبلەماسى - ءبىلىم رەفورماسى دەلىك. بۇل پروبلەمانى شەشۋ، بولاشاق ءبىلىمدى ۇرپاقتى تاربيەلەۋ ءۇشىن باسقا "جىردى" جيىپ قويىپ، ءبىز ءوزىمىز باستاۋىش سىنىپتىڭ مۇعالىمى بولۋىمىز كەرەك. ويتكەنى، قازىر باستاۋىشتىڭ مۇعالىمى بولاتىن كىمدەر؟ مەكتەپتە ناشار وقىعان، جاستايىنان "بايعا ءتيىپ كەتپەسىن" دەگەن نيەتپەن اتا-اناسى سۇيرەلەپ ءجۇرىپ وقىتقان "شالا ساۋاتتى" - ءبىر "دۋدارباس".

ءبىر كەزدەرى ىبىراي مەن احمەتتەر اتقارعان ابىرويلى قىزمەتتى سول "دۋدارباسقا" تاپسىرىپ، بالامىزدىڭ تاعدىرىنىڭ تىزگىنىن ۇستاتىپ وتىرمىز. ءالىپتى تاياق دەپ بىلمەيتىن و بايقۇستىڭ الدىنا ء"بىلىم ينەمەن قۇدىق قازعانداي" دەپ بالالارىمىزدى "كوگەندەپ" بەرۋىمىز - قازاقتىڭ تامىرىنا بالتا شابۋ. وسىنى تۇسىندىرەرلىك ءتىلى جوق، رۋحى جوق مىنا بىزدەن نە كۇتەسىڭ، كەلەشەك...

قانات ابىلقايىر

Abai.kz