دۇيسەنبى, 29 قاراشا 2021
567 0 پىكىر 19 قازان, 2021 ساعات 10:42

الماتى وبلىسى: كاسىپكەرلەر تۋريزم سالاسىنا 24,5 ملرد تگ سالادى

كاسىپكەرلەر «ىلە-الاتاۋ»، «شارىن» شاتقالى، «كولساي كولدەرى» مەن «التىن-ەمەل» تابيعي ساياباقتارىنداعى جەردى جالعا الىپ، ءتۋريزمدى دامىتۋ ءۇشىن 24,5 ميلليارد تەڭگە سالادى.

كۇنى كەشە مادەنيەت جانە سپورت ءمينيسترى اقتوتى رايىمقۇلوۆانىڭ قاتىسۋىمەن «ايۋساي» ساپار-ورتالىعىندا «الماتى تاۋ» كلاستەرىنىڭ ۇلتتىق پاركتەرىندە ەكولوگيالىق ءتۋريزمدى دامىتۋ جونىندە جينالىس ءوتتى.

ساپار بارىسىندا رايىمقۇلوۆا ۇلتتىق پاركتەردە ەكوتۋريزمدى دامىتۋ باسىم باعىتتاردىڭ ءبىرى ەكەنىن جانە Kazakh Tourism بازاسىندا الماتى تاۋ كلاستەرىنىڭ بىرىكتىرىلگەن جوبالىق كەڭسەسى بارلىق مۇددەلى تاراپتىڭ جۇمىسىنا سينەرگەتيكالىق اسەر بەرگەنىن ايتتى.

بيىل ينۆەستور قازاقستانداعى العاشقى ۇلتتىق پاركتە، اتاپ ايتقاندا ىلە- الاتاۋىندا ساپار-ورتالىعىن اشىپ، مۇندا «تامىر» جابايى تابيعاتتاعى ءومىر ءسۇرۋ مەكتەبى جۇمىس ىستەي باستادى. سونىمەن قاتار زاماناۋي دارەتحانالار سالىندى. وسىلايشا، كەزدەسۋدە ينۆەستورلار مينيسترگە تۇراقتى تۋريزمگە باسا نازار اۋدارا وتىرىپ، «التىن ەمەل»، «شارىن» جانە «كولساي كولدەرى» ۇلتتىق پاركتەرىندە ەكولوگيالىق تازا ينفراقۇرىلىم سالۋمەن قاتار ۇقساس جوبالاردى كورسەتتى.

«ءبىز ۇلتتىق پاركتەرگە ينۆەستيتسيا سالا وتىرىپ، ەڭ الدىمەن ەكولوگيانى ساقتاۋعا جانە تۋريزم ەسەبىنەن اۋىل حالقىنىڭ ءومىر ءسۇرۋ دەڭگەيىن دامىتۋعا مۇددەلىمىز. بۇل كۇن ءتارتىبى اسا ماڭىزدى دەپ سانايمىز. سوندىقتان الماتى وبلىسىنىڭ اكىمدىگىنە، Kazakh Tourism جوبالىق كەڭسەسىنە جانە ەكولوگيا مينيسترلىگىنە قولداۋ كورسەتكەنى ءۇشىن العىس ايتقىمىز كەلەدى»،-دەدى «تاۋن پليۋس» جشس باسشىسى جانىبەك الكەەۆ.

Kazakh Tourism بازاسىندا الماتى تاۋ كلاستەرىن دامىتۋ جونىندەگى بىرىككەن جوبالىق كەڭسەگە الماتى قالاسى مەن وبلىس اكىمدىكتەرىنىڭ، ءوڭىردىڭ ءتورت ۇلتتىق پارك اكىمشىلىكتەرىنىڭ وكىلدەرى كىرەدى.

«ىلە-الاتاۋى» مەملەكەتتىك ۇلتتىق تابيعي پاركىندە ينۆەستيتسيالىق جوبانى ىسكە اسىرۋ ماسەلەلەرى جانە «ايۋساي» ساپار-ورتالىعى جۇمىسىنىڭ تۇساۋكەسەرى تالقىلاندى. سونىمەن قاتار «شارىن» مەن «التىن ەمەل» مەملەكەتتىك ۇلتتىق تابيعي ساياباقتارىندا ينۆەستيتسيالىق جوبالاردى قولعا الۋدى جوسپارلادى.

اقتوتى رايىمقۇلوۆا ەكوتۋريزمدى دامىتۋدىڭ نەگىزگى باعىتىنا اينالعان ۇلتتىق ساياباقتاردىڭ كوپتىگىمەن الماتى وڭىرىنە جوعارى باعا بەردى. مۇنىڭ سەبەبى ساياباققا كەلۋشىلەر سانى 2019-2020 جىلدارعا قاراعان دا ارتا تۇسكەن. «ىلە-الاتاۋ»، «شارىن» شاتقالى، «كولساي»، «التىن ەمەل» مۇتپ بويىنشا كەلۋشىلەر سانى: 2019 جىلى – 428137 ادام، 2020 جىلى – 321275 ادامدى قۇراسا، 2021 جىلدىڭ تامىز ايىنىڭ قورتىندىسى بويىنشا - 499440 ادامدى كورسەتكەن.

ينجەنەرلىك-كوممۋنيكاتسيالىق ينفراقۇرىلىمنان باسقا دا تۋريستىك قىزمەتتەردى دامىتۋ ءۇشىن ساپار-ورتالىقتار، كەمپينگتەر مەن گلەمپينگتەر، تاماقتانۋ پۋنكتتەرى، كولىك تۇراقتارى سياقتى تۋريستىك ينفراقۇرىلىمدى دامىتۋ قاجەت ەكەندىگى ايتىلدى.

Abai.kz

0 پىكىر