سەيسەنبى, 17 مامىر 2022
بيلىك 1270 0 پىكىر 28 قازان, 2021 ساعات 12:53

«ۇلىق ۇلىس – التىن وردا»: پرەزيدەنت نە دەيدى؟

بيىل ەلىمىزدىڭ تاۋەلسىزدىگىنە 30 جىل تولىپ، وسى ورايدا اتىراۋ قالاسىندا  «ۇلىق ۇلىس – التىن وردا» حالىقارالىق عىلىمي كونفەرەنتسياسى بولىپ جاتىر. قازاننىڭ 27 كۇنى باستالعان ءىرى جيىن ءۇش كۇنگە سوزىلماق.

ءىس-شاراعا التىن وردا تاقىرىبىن زەرتتەۋ وبەكتىسىنە اينالدىرعان وتاندىق عالىمدارمەن قوسا، شەتەلدىك زەرتتەۋشىلەر دە شاقىرىلدى. ءار ءتۇرلى سالادا قىزمەت ەتىپ جۇرگەن 150-دەي ادام جينالعان سالتاناتتى شارا ماحامبەت اتىنداعى اكادەميالىق قازاق دراما تەاترىندا باستالدى.

ادەبي-تەاترلاندىرىلعان سپەكتالدەر قويىلىپ، ۇلتتىق-فولكلورلىق باقىتتا بەرىلگەن كونتسەرت سالتاناتتى جيىننىڭ كوركىن كەلتىردى.

قر پرەزيدەنتى اكىمشىلىگىنىڭ ءبىرىنشى ورىنباسارى داۋرەن اباەۆ كونفەرەنتسيانىڭ قۇرمەتتى قوناعى بولىپ، پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىپ بەردى.

پرەزيدەنت «جوشى حان كەسەنەسى مەن ەجەلگى سارايشىقتىڭ قازاقستان جەرىندە سالىنعانى، وردا تۋرالى شەتەلدەن جازبا دەرەكتەردىڭ شىعۋى التىن وردا تاريحىن بۇگىنگى قازاق ەلىنىڭ جىلناماسىمەن تەرەڭ بايلانىستا ەكەنىن اڭعارتاتىنىن جازعان. تاريحىمىزدى دارىپتەۋدە ەلباسىنىڭ قولعا العان جوبالارى ەلىمىزدىڭ ۇلتتىق ساناسىن جاڭعىرتىپ، شەجىرەمىزدى تولىقتىرا ءتۇستى» دەگەن حاتىندا پرەزيدەنت. التىن وردا كەزەڭىنەن جەتكەن اسىل مۇرالاردى الەم جۇرتىنا تانىستىرىپ، قازاقستان ءتۋريزىمىن دامىتۋعا بەت الۋىمىز كەرەك ەكەنىن ايتادى. سونىمەن قوسا قاسىم-جومارت توقاەۆ  التىن وردا تاقىرىبى اياسىندا اتقارىلاتىن ءبىرشاما ءىستى اتاپ وتكەن.

تاۋەلسىز ەل بولىپ، بوساعامىزدى بەكىتكەننەن كەيىن كەڭەس كەزىندە تيىم سالىنعان «التىن وردا» تاقىرىبى قايتا جانداندى. التىن وردانى اقتاۋ پروتسەسىنە ارنالعان 2013-2014 جىلدارى جاريالانعان ەلباسى نۇرسۇلتان نازارباەۆ پەن مۇرات مۇحانبەتقازىۇلى ءتاجيننىڭ «قازاق حاندىعى التىن وردانىڭ زاڭدى مۇراگەرلەرىنىڭ ءبىرى» ماقالاسى جارىق كورگەن بولاتىن.

ماقالا قازاق حالقىنىڭ التىن وردا تاريحىندا الاتىن ورنىن ايقىنداپ بەردى.

جيىندا ءسوز سويلەگەن وبلىس اكىمى ماحامبەت دوسمۇحامبەتوۆ «التىن ورداعا ارنالعان 20 شاقتى نىسان سالۋدى جوسپارلاپ وتىرعانىن» ايتتى. قازىرگى كۇنى سارايشىق مۋزەيىندە 4600 جادىگەر ساقتالعانىن،ەندىگى ماقسات وسى جادىگەرلەردى ناسيحاتتايتىن التىن وردا مۇراجايىن اشۋ ەكەنىن ايتتى.

جوسپاردا تۇرعان كەشەننىڭ ءبىرى گۇلستان پرومەنادى. وندا جىلقى، تۇيەگە ءمىنىپ، سەرۋەندەۋگە بولاتىن ەتىپ جاسالدى. بۇگىندە سارايشىق مەموريالدى كەشەنىنە كەلۋشىلەر سانى 20 مىڭ بولسا، بولاشاقتا 700 مىڭعا دەيىن كوبەيەدى دەگەن جوسپار دا جوق ەمەس. كونفەرەنتسياعا كەلگەن عالىمداردىڭ ەل الدىنا پاش ەتكەن عىلىمي جاڭالىقتارى مەن تىڭ دەرەكتەرىنەن ارنايى جيناق باسىلىپ شىعادى. كەلەشەكتە پرەزيدەنتتىڭ قولعا العان باستامالارى ىسكە اسىرىلىپ ، التىن وردا تاريحى جاڭا قىرىنان اشىلا تۇسپەك.

Abai.kz

0 پىكىر