بيىل ەلدە كومىردىڭ باعاسى 5 پايىزعا قىمباتتاعان. شقو-دا باعانىڭ ءوسۋى بىردەن 11 پايىزدى قۇراسا، ال وڭتۇستىك وڭىرلەردە 7 پايىزعا جەتكەن، دەپ حابارلادى qamshy.kz سايتى.

ليگنيت پەن كومىر كونتسەنتراتىن قوسا العاندا، وندىرىلگەن كومىردىڭ كولەمى وسى جىلدىڭ قاڭتار-قىركۇيەك ايلارىندا 82,1 ملن تونناعا تەڭ. بۇل – 2020 جىلمەن سالىستىرعاندا 1,5 پايىزعا ارتىق.

ءوندىرىستىڭ جارتىسىنان كوبى ءداستۇرلى تۇردە پاۆلودار وبلىسىنا (47,9 ملن توننا), ۇشتەن ءبىرى – قاراعاندى وبلىسىنا (27,7 ملن توننا), ايتارلىقتاي بولىگى شىعىس قازاقستان وبلىسىنا (6 ملن توننا) تيەسىلى.

2021 جىلدىڭ قىركۇيەك ايىنىڭ قورىتىندىسى بويىنشا كومىر باعاسى ورتاشا ەسەپپەن ءبىر جىلدا 5,1 پايىزعا وسكەن. سەكتورداعى باعانىڭ ءوسۋى ەكىنشى جىل قاتارىنان بايقالادى.

باعا 17 ءوڭىردىڭ 14-ىندە ءبىرشاما وسكەن. ايتالىق، شىعىس قازاقستان وبلىسىندا (جىلىنا 10,8%-عا), ودان كەيىن جامبىل جانە تۇركىستان وبلىستارىندا (8,6%-عا) كۇرت وسكەن. تاس كومىر باعاسى تومەندەگەن جالعىز ءوڭىر – باتىس قازاقستان وبلىسى (1%-عا).

كومىردى ارزان باعامەن سەمەيدەن (تونناسى 9,8 مىڭ تەڭگە), قاراعاندىدان (10,8 مىڭ تەڭگە) جانە وسكەمەننەن (10,9 مىڭ تەڭگە) ساتىپ الۋعا بولاتىن بولسا، ورالدا كومىردىڭ باعاسى تونناسىنا 19,3 مىڭ تەڭگەدەنساتىلىپ جاتىر. تارازدا قاتتى وتىننىڭ تونناسى 15,6 مىڭ تەڭگە، تۇركىستاندا 15,3 مىڭ تەڭگەنى قۇرايدى.

Abai.kz