ادامزات بالاسى ىنتى-شىنتىسىمەن تەپسىنگەندە عانا ءوز جۇرەگىنە تەرەڭ بويلاپ، جاراتىلىس جۇمباعىن شەشىپ، اسىل سەزىمىن اللاعا ارناي الادى. تەگىندە، حاق-تاعالا ءبىزدىڭ بويىمىزعا عاشىقتىق سەزىمنىڭ التىن ۇرىعىن ەككەن. ال، عاشىقتىق سەزىمنىڭ يەسى كەمشىلىك اتاۋلىدان ادا، كىناراتسىز، نۇقسانسىز، ءمىنسىز، پاك بولۋى ءتيىس. الايدا، اللا-تاعالا تىرشىلىك يەلەرىنىڭ ءبارىن كەمشىلىكپەن جاراتقان.

ادامزات بالاسى ىنتى-شىنتىسىمەن تەپسىنگەندە عانا ءوز جۇرەگىنە تەرەڭ بويلاپ، جاراتىلىس جۇمباعىن شەشىپ، اسىل سەزىمىن اللاعا ارناي الادى. تەگىندە، حاق-تاعالا ءبىزدىڭ بويىمىزعا عاشىقتىق سەزىمنىڭ التىن ۇرىعىن ەككەن. ال، عاشىقتىق سەزىمنىڭ يەسى كەمشىلىك اتاۋلىدان ادا، كىناراتسىز، نۇقسانسىز، ءمىنسىز، پاك بولۋى ءتيىس. الايدا، اللا-تاعالا تىرشىلىك يەلەرىنىڭ ءبارىن كەمشىلىكپەن جاراتقان.

ءتىپتى، ءبىر-بىرىنە ولەردەي عاشىق بولىپ، اقىل-ەستەن ايىرىلۋعا شاق قالعان قىز بەن جىگىتتىڭ ءوزى ۇيلەنىپ، وتاۋ تىككەننەن كەيىن سۇيىسپەنشىلىكسەزىمى سۋالىپ، تاۋى شاعىلعانداي بولادى. سەبەبى، ولاردىڭ اتقاقتاعان عاشىقتىق سەزىمى كەمشىلىكسىز، اپپاق-ايدىن پاكتىكتى ىزدەگەن-ءتىن. ولار ەتەنە جاقىنداسقاننان سوڭ بارىپ، جۇبايلىق ءومىردىڭ بايىبىن باعامداپ، عاشىقتىق سەزىمنىڭ يەسىن تابا الماعانىن سەزىنەدى. تىرشىلىك جاراتىلعاننان بەرى اقىل-وي يەلەرى ادامزات بالاسىنىڭ نە ءۇشىن جاراتىلعانىنىڭ قۇپياسىن تابا الماي، بار كۇش-جىگەرىن سارقا جۇمساپ، ساناسىن سارسىلتىپ، پايىمىن تۇگەسىپ، وزىندىك تۇرعىدان بايلامدار جاساپ، ۇشاڭ-تەڭىز ەڭبەكتەر جازىپ، ارتىنان توم-توم كىتاپتار قالدىردى. نەبىر ويى ۇشقىر اقىلماندار مەن زەردەلى عۇلامالار وسى سۇراقتىڭ جاۋابىن تابۋ ماقساتىندا زەيىنىنە سالماق ءتۇسىرىپ، قيالىنا قانات ءبىتىرىپ، عارىشقا ۇشىپ، عالامدى كەزىپ، جاراتىلىس جۇمباعىن شەشۋدە بار عۇمىرىن سارپ ەتتى. الايدا، جالاڭ اقىلعا جۇگىنگەندەر تىرشىلىك قۇپياسىن كوكتەن دە، جەردەن دە تابا الماي دىمى قۇرىپ، دارمەنسىز كۇي كەشىپ كەلەدى. سەبەبى، تىرشىلىك قۇپياسىنىڭ كىلتى ساقتالعان ار-ۇجدانمەن جۇرەكتەن قۋات الىپ، ساناعا سىلكىنىس جاسامايىنشا، اقىل-وي يەلەرىنە اقيقاتتىڭ اۋىلى الىس بولىپ قالا بەرەدى.

زادىندا، ۇلى جاراتۋشى تىرشىلىكتى تۇگەسىلمەيتىن ماحابباتىمەن جاراتقان. اسىرەسە، تىرشىلىكتە ادامزات بالاسىن يلاھي شۋاعىنا مالىندىرىپ، ەرەكشە ماپەلەپ، جەتىقات كوكتى، جەتى قابات جەراستىنداعى ءتۇرلى بايلىقتاردى، جەر-انا قىرتىسىنداعى نەبىر اسىل تاستار مەن قازىنالاردى، جەر بەتىندەگى ۇشقان قۇس پەن جۇگىرگەن اڭدى، ءتۇرلى وسىمدىكتەر مەن داراقتاردى، تاۋ مەن تاستى، ورمان مەن كولدى، وزەن مەن تەڭىزدى، ونى مەكەندەگەن ءتۇرلى جاندىكتەردى، جەمىس-جيدەك پەن ءتۇرلى ءدان-داقىلدى، تۇنگى اسپانداعى جىمىڭ قاققان جۇلدىزداردى، يبالى كەلىندەي ءيىلىپ تۋعان تۇنگى ايدى، كەنەزەسى كەۋىپ سۋساعان توپىراققا قازباۋىرلاپ كەلىپ تامشىسىن توگىپ-توگىپ كەتەتىن قويۋ قارا بۇلتتى، قىلاياعى مۇلگىگەن تىنىشتىققا قوزعاۋ سالاتىن كەرىمسال جەلدى، ءتىپتى، تىرشىلىككە نۇرىن توگەتىن الىپ كۇننىڭ ءوزىن ادامزات بالاسىنىڭ يگىلىگى ءۇشىن جاراتقان. عالامنىڭ جاراتىلىسىنداعى ۇيلەسىمدىكتەر مەن يلاھي زاڭدىلىقتار، جان-جانۋارلاردىڭ ءوز تىرشىلىگىندەگى ۇندەستىگى، ادامزات بالاسىن ورتاق تۇسىنىستىككە جەتەلەيتىن عۇمىرلىق ولشەمدەر، ونىڭ ىشىندە اتا-اناعا، اعايىن-جۇراعاتقا دەگەن جىلى سەزىم، تۋعان جەر مەن وتانعا دەگەن ىنتىزارلىق، ادال جار مەن قيماس دوس-جارانعا دەگەن سۇيىسپەنشىلىك، تاربيەلى ۇل مەن ۇلاعاتتى ۇرپاققا دەگەن ىزگى تىلەك، ءبارى-ءبارى اللانىڭ ادامزاتقا دەگەن ماحابباتىنىڭ كورىنىسى ەكەنى تالاسسىز شىندىق.

ايتسەدە، وسىنشاما زور جاراتىلىس ءتاڭىر-تاعالانىڭ ماحابباتىنىڭ ۇشقىنى، يلاھي زور سۇيىسپەنشىلىكتىڭ سىنىعى ىسپەتتى. ال، مەيىرىمى شەكسىز ۇلىجاراتۋشىنىڭ تولىق ماحابباتىمەن قاۋىشۋ اقىل يەلەرى ءۇشىن اقىرەت الەمىندەگى جاسىل باق جانناتقا قالدىرىلعان. ياعني، تىرشىلىكتە تۇيسىنە المايتىن، ءتىل مەن ايتىپ جەتكىزە المايتىن ماحاببات ءلاززاتىن ادامزات بالاسى حاق ديدارىمەن قاۋىشقاندا عانا سەزىنەدى. الايدا، رۋحانياتتىڭ بۇل بيىگىنە كوتەرىلۋ ءۇشىن پەندەلەرىن حاق-تاعالا الدىمەن سىناق الەمىنە جىبەرگەن. سىناق الەمىندە ادامزات بالاسى وسىنشاما عالامدى وزىنە قىزمەت ەتتىرىپ قويعان ۇلى جاراتۋشىنىڭ جاقسىلىعىنىڭ قارىمتاسىن قايتارۋى شارت. ال، قارىمتا قايتارۋدىڭ كىلتىن تابا الماسا، سىناقتان ءسۇرىنىپ، قۇر الاسۇرعان كۇيى شاڭ قاۋىپ قالا بەرمەك.

سوندا ءبىزدى ماڭگى مازالايتىن، تەك پاكتىكتى قالايتىن بويىمىزداعى عاشىقتىق سەزىمنىڭ يەسى كىم؟ ول اسىل سەزىم كىمگە ارنالۋى ءتيىس؟

«ماحاببات» ءسوزىنىڭ ءتۇبىرى «قاببا»، ياعني، ءدان ماعىناسىن بەرەدى. ۇرىق سەبىلگەننەن كەيىن، توپىراقتى بۇركەنىپ جاتقان دانگە جەل مەن جاۋىن زيانىن تيگىزە المايدى. سول سەكىلدى ءاۋ باستان جۇرەگىمىزگە ەگىلگەن عاشىقتىق سەزىمگە ەشكىم زارارىن تيگىزە المايدى. سەبەبى، عاشىقتىق سەزىمدى يەسىنىڭ ءوزى قورعايدى. ءاسىلى، كەمشىلىك اتاۋلىدان ادا، ينەنىڭ جاسۋىنداي كىناراتى جوق، پاك بولعان ۇلىجاراتۋشى عانا. سوندىقتان، پەندەسى الدەقانداي جاعدايمەن عاشىقتىق سەزىمىن جاراتىلعاندارعا ارناسا، حاق-تاعالا وزىنە ءتان يلاھي قىزعانىشقا بەرىلىپ، قۇلىنىڭ اداسقاندىعىن قاتاڭ ەسكەرتەدى (عايراتۋللاھ). ال، ساليح قۇلدار بولسا، ماڭدايىمەن ساجدەنى وپكەندە «سۋبحانا راببيلالاانى» (اللاعانا كەمشىلىكسىز) تىلمەن عانا ەمەس، دىلىمەن ايتىپ، عاشىقتىق سەزىمنىڭ يەسىنە قۇلشىلىق جاساپ قاۋىشقانىنا ءوزىن شەكسىز باقىتتى سانايدى. عاشىقتىق دەرتىنە شالدىققان ساليح قۇلدار عيبادات ۋاقىتىندا عانا ەمەس، اقىل-ەسىنەن ايىرىلعان ءپارۋاناداي ءتاڭىرىن ۇدايى ەسكە الادى. جاراتۋشىنى ءبىر ءسات جادىنان شىعارىپ السا، ءوزىن كۇناھار سەزىنىپ، كوزىنىڭ جاسى مەن كوڭىلدىڭ كىرىن كەتىرۋگە كۇش سالادى. مۇنداي شاقتا دۇنيەنىڭ وتكىنشى قىزىقشىلىعىنا مۇلدە كوڭىل-قوشى سوقپايدى. ءتىپتى، الەم استاڭ-كەستەڭ بولىپ جاتسا دا دەگدارلىق قالپىن جوعالتپاي، جۇرەگىن حاققا بۇرىپ، ماڭگىلىك باقىتتىڭ ۇشقىنىنان ءنار الىپ، ۇدايى ۇلى جاراتۋشىنى زىكىر ەتەدى. حاق-تاعالانىڭ ءاربىر ىستەگى ۇكىمىن جان-تانىمەن قالتقىسىز ورىنداپ، ونىڭ رازىلىعىن الۋعا قۇمبىل بولىپ تۇرادى. ءتاڭىر تاراپىنان بەكىتىلگەن يلاھي مىندەتتەردى ءوزىن كۇشتەپ ەمەس، بويىنداعى اتوي سالعان العاداي سەزىممەن ءمىنسىز اتقارىپ شىعادى. جان ازىعىن جاراتۋشىدان الىپ كەمەلدەنگەن رۋح، باقاي-ەسەپ الاڭىنان الشاقتاپ، حاقيقات ماقامىنا يەك ارتادى. ماڭدايىنا اقيقات ءمورى باسىلعاننان كەيىن، حاقتىڭ رازىلىعى ءۇشىن قالىڭ بۇقارانىڭ قامىن جەيتىن قارا نارعا اينالىپ، جانسەبىل راۋىشتە ادامزات بالاسىن اقيقاتتى تانۋعا ۇندەيدى. ياعني، جۇرەك كوزى اشىلىپ، رۋح ءنارى مەن سۋسىنداعان اردا ەمگەن مومىندار ۇلى جاراتۋشىنىڭ جامالىنا كۇيىپ-جانىپ، ماحابباتتىڭ قارىمتاسىنا ماحابباتپەن قارايدى.

رامازان ايىنداعى حاقتىڭ رازىلىعى ءۇشىن تارتقان تاقسىرەت پەن شەككەن ازاپتىڭ قارىمتاسى حاق پەن قاۋىشۋعا، ياعني، ماڭگىلىك باقىتقا كەنەلۋگە جەتەلەيدى. وسى تۇرعىدا، ءىبىلىس تۇعىرى تاكاپپارلىق تاعىنان ءتۇسىپ، وي-سانامىزدى مەڭدەپ العان مەكەرلىكتەن ارىلا الماساق، تىرشىلىكتىڭ قۇپياسىن ەڭسەرۋىمىز استە مۇمكىن ەمەس. جاراتىلىس جۇمباعىن شەشۋدە حاق قۇزىرىنا ەنىپ، ماۋەسىن كوتەرە الماعان مايىسقاق اعاشتاي ءيىلىپ تۇرۋىمىز اسا ماڭىزدى. سوندا، بويىمىزداعى عاشىقتىقتىڭ ءدانى ءوز كاۋسارىنان سۋسىنداپ، بۇرشىك جارادى. اۋىز بەكىتكەندە ءتانىمىز ازاپ شەككەنىمەن، رۋحىمىز ءناپسىنىڭ قالاۋلارىن اۋىزدىقتايدى. پەيىلىمىز «پارۋاديرگارمەن» جىمداسىپ، اقيقات تۇنىعىنان قانىپ ءىشىپ، جان-سارايىمىز جادىرايتۇسەدى. حاقتان العان جىلۋارمەن «ماحاببات مايەگى» ماۋەلى باققا اينالىپ، اقيقات ىزدەگەن جۇرتشىلىققا ءۇيىپ-توگىپ مول جەمىسىن ۇسىنادى. ەندەشە، قاسيەتتى رامازاندا لايىم حالقىمىزعا حاقيقاتپەن قاۋىشۋ ءناسىپ بولسىن دەپ تىلەيمىز!

«اباي-اقپارات»