سونىمەن  سەربيا مەملەكەتىنىڭ استاناسى سوڭعى 15 -20 جىل كولەمىندە الەمنىڭ گەوساياسات كارتاسىندا دۇمپۋىمەن اتى شىققان بەلگراد قالاسىندا تىنىشتىق ورناعانىنىڭ ءبىر بەلگىسىندەي ايبا (بۇكىل الەمدىك بوكس قاۋىمداستىعى) ۇيىمداستىرعان بوكستان ەرەسەكتەر اراسىنداعى الەم بىرىنشىلىگى ءوتتى.

بۇل الەم بىرىنشىلىگىنىڭ بيىلعى توكيو وليمپياداسى وتكەن سوڭ ەكى اي تولىق وتپەي جاتىپ ءوتۋىنىڭ وزىندىك سەبەبى - پاندەمياعا بايلانىستى توكيو وليمپياداسىنىڭ ءبىر جىلعا كەشىپ ءوتۋى سەبەپ بولىپ وتىر.  ايتپەسە بوكستان الەم بىرىنشىلىگى مەن وليمپيادا قاتار كەلمەۋى ءىرى سپورت جارىستارىندا قاتاڭ ساقتالاتىن. وعان سەبەپ سپورتشىنىڭ سپورتتىق بابىن ءبىر جىلدا ءارى قىسقا مەرزىمدە  الامانعا قاجەتتى جاعدايعا دايىنداۋ فيزيكالىق جانە پسيحولوگيالىق تۇرعىدا وتە قيىن ءارى مۇمكىن ەمەس،مەدەتتسينالىق تۇرعىدان ءتىپتى قاۋپتى دەپ سانالادى.

سونىمەن،  بۇل بىرىنشىلىكتە ايبا كۇتپەگەن جەردەن (بۇرىن باق بەتىندە تالقىلانباعان) جاڭادان باس دەپ ايتۋعا بولاتىن ەكى جاڭالىق ەنگىزدى...

1. سالماق كاتەگوريالارى 10-نان 13-كە دەيىن ءوستى.

2. جەڭىمپازدارعا ايبا تاراپىنان قوماقتى اقشالاي بونۋس تاعايىندالدى.

التىن مەدالعا - 100.000$,

كۇمىس مەدالعا - 50.000$,

قولا مەدالعا - 25.000$.

الدىنا الا مويىنداعانىمىز ءجون بولار، ايبا-نىڭ ەنگىزگەن ەكى جاڭالىعى دا ءبىزدىڭ وڭ جاق جامباسىمىزدان كەلدى.

سالماق دارەجىسىنىڭ كوبەيۋى ءبىزدىڭ ءارتۇرلى سەبەپتەرمەن تاسادا قالىپ جۇرگەن بوكسشىلارىمىزعا ءوز مۇمكىندىكتەرىن كورسەتۋگە، جەرشىلدىكتىڭ شىرماۋىنان شىعا الماي ۇنەمى ءىرى دودان تىس قالىپ جۇرگەن جىگىتتەرىمىز شارشى الاڭدا ەرەجە شەڭبەرىندە توبەلەسۋگە مۇمكىندىك الدى.

تاعى ءبىر ەرەكشە اتاپ وتۋگە تۇرارلىق ىشكى قبف-نىڭ جاڭالىعى - ول قازاقستان قۇراماسىنىڭ توكيو وليمپياداسىنان كەيىن باس جاتتىقتىرۋشىسىن اۋىستىرۋى بولدى.

جاڭا قىزمەتكە وسىعان دەيىن ون شاقتى جىل جاستار قۇراماسىمەن جۇمىس ىستەگەن جانە وتە جاقسى ناتيجەسىمەن كوزگە تۇسكەن قايرات ءساتجانوۆ اتتى ادام كەلدى. كەلدى دە، يۋلي تسەزار ايتپاقشى، «باردى، كوردى، جەڭدى» بولدى.

حوش... ءبارىن ەندى رەت-رەتىمەن سارالاۋعا تىرىسايىق.

بارعان 13 بوكسشىمىزدان 10 سپورتشىمىز شيرەك فينالعا دەيىن جەتىپ، ۋاقىتشا بولسا دا كوماندالىق ەسەپتى ءبىرىنشى ورىندا ۇستاپ تۇردىق.

ونىڭ بەسەۋى تەمىرتاس ءجۇسىپوۆ 48 كگ،  ساكەن  بيبوسىنوۆ 51  كگ، ماحمۋد سابىرحان 54 كگ،  سەرىك تەمىرجانوۆ 57 كگ، ابىلايحان ءجۇسىپوۆ 67 كگ جارتىلاي فينالعا دەيىن جەتىپ، ەڭ بولماسا قولا  مەدال بار، دەپ ءبىر دەمالىپ الدى. الدا ەڭ اۋىر ەكى ايقاس كۇتىپ تۇردى. ول جارتىلاي فينال مەن فينالدىق توبەلەستەر.

ول مەجەنى تەمىرتاس ءجۇسىپوۆ، ساكەن بيبوسىنوۆ، ماحمۋد سابىرحان، سەرىك تەمىرجانوۆ سىندى بوكسشىلارىمىز جەڭىسپەن جالعاسا، قۇرامامىزدىڭ كاپيتانى ابىلايحان ءجۇسىپوۆ قولا مەدالدى قاناعات تۇتتى.

ءبىر باسىپ، ەكى باسىپ فينالعا دا جەتتىك-اۋ...

فينالدا ءتورت بىردەي وعلانىمىز تۇر جاۋ قايداسىڭ دەپ، شيىرشىقتاپ، ءبىز وتىرمىز دەلەبەزەردىڭ الدىندا تاقىمىمىزدى قىسىپ، جەڭگەلەرىنەن ەكى جۇما بولدى ۇيقى بەرمەدىڭ. دەگەن سوگىستى ەكى بۇكتەپ قالتاعا سالىپ...

نەسىن ايتاسىڭدار، جان بەرىپ جان الىسقان ايقاستار بولدى. توكيودا قولدان سۋسىپ كەتكەن جەڭىستە كەلدى (ساكەن بيبوسىنوۆ), جارق ەتىپ شىققان جاس قىران دا بولدى (تەمىرتاس ءجۇسىپوۆ), وكىنىشتى ورتەگەن سۇرەڭسىز توبەلەس تە بولدى (سەرىك تەمىرجانوۆ), تاجىريبەنىڭ ازدىعىنان ەموتسياعا جول بەرىپ ءوز مۇمكىندىگىنەن تومەن ونەر كورسەتىپ، قولدان سۋسىپ شىعىپ كەتكەن التىنعا دەگەن وكىنىشتەن كوزدەن اققان جاس تا  بولدى (ماحمۋد سابىرحان)...

مىنە بوكس دەگەن جاۋىنگەرلەرگە عانا ءتان الىپتار ايقاسىنا كۋا بولىپ تارقاستىق.. ازداپ جاڭىمپازدارعا تاعى توقتالساق.

تەمىرتاس ءجۇسىپوۆ (48 كگ) 33 جاستا ەكەن، سوڭعى 10 جىلدىڭ كولەمىندە ۇلكەن جارىستان قانشا تىس قالىپ جۇرسە دە ءوز مۇمكىندىگىن كۇتىپ جۇرە بىلگەن توزىمدىلىگى ءۇشىن سيلاۋعا تۇرارلىق ەر ازاماتتىڭ مىنەزى بولدى.

ساكەن بيبوسىنوۆ. «توكيوداعى جارتىلاي فينالداعى ادىلەتسىزدىكتىڭ ورنىن تولتىرامىن» التىن الامىن»، - دەدى. الدى! ازامات! وعلان!

ماحمۋد سابىرحان - بار جوعى 20 جاستا. تالانت.

نەگىزگى جەڭىستەرى ءالى الدا. ءتىل-كوزدەن امان بولسىن. فينالدىق كەزدەسۋى الداعى كۇندەرى ساباق بولارى ءسوزسىز. بۇل بالا فينالعا دەيىن پسيحولوگيالىق تۇرعىدا جانىپ كەتتى. توبەلەستى. تاكتيكالىق تۇرعىدا قاتە قويدى. جاتتىقتىرۋشىلاردىڭ تاپسىرماسىنان شىعىپ كەتتى. بىراق بولاشاعىنان ۇلكەن ءۇمىت ارتۋعا بولادى.

سەرىك تەمىرجانوۆ - جارتىلاي فينالدا كۋبانىڭ قابىلانىن ايقىن باسىمدىقپەن ۇتقان ەدى. ال فينالدا وتە ناشار بوكستاستى. شارشاڭقى بولدى.

ءبىر جىلدا ەكى رەت سپورتتىق بابتى رەتتەۋ قيىن بولاتىنىنىڭ دالەلى. بۇل جىگىتكە ريزا بولعانىم، «توكيودا جەڭىلگەندە ءوزىم كىنالىمىن، كەلەسى جارىستا ۇياتقا قالدىرمايمىن»، دەپ سۇحبات بەرىپ ەدى. سوزىندە تۇردى. جىگىت!

ابىلايحان جۇسىپوۆقا كەلسەك، تاعى دا قولا مەدال. ارينە وسى قولا مەدالعا دا جەتە الماي وتكەن مىڭداعان وعلان بار، ءبىز تەك بۇل جاۋىنگەردىڭ مۇمكىندىگىن جوعارى ەكەنىن بىلەمىز.

تەك اۋىر سوققى قاجەت سالماق قوي، سول تۇرعىدا ىزدەنىس كەرەك، دەپ كەڭەس بەرەيىك.

ءسوز سوڭىندا  قالعان بوكسشىلار تۋرالى...

اعايىندى ورالبايلار،تولتپەۆتار ەكى كەزدەسۋدەن وتكىزىپ، جەڭىستەرى بولدى. مىناداي ءىرى الەمدىك دودا دا ءبىر جەڭىستىڭ ءوزى جوعارى ناتيجە ەكەنىن ەسكەرسەك ولاردىڭ بولاشاعى پاريج وليمپياداسى دەۋگە حاقىمىز بار. ۋاقىتتارى دا بار. تەك توقمەيىلسىمەۋ قاجەت-اق..

اسىلبەك شىمبەرگەنوۆ تۋرالى ءبىر وي... وتە تالانتتى، ەڭبەكقور جىگىت. تاعىدا سول اۋىر سوققىسى بولماعان سوڭ ورتادا تىرەسىپ توبەلەسكەن دە ۋكراينالىق بوكسشىعا ەسەسىن جىبەرىپ الدى (زاحاريەەۆ).

اسلانبەكتىڭ وزبەك بوكسىنىڭ ماقتانىشى شاحرام گياسوۆتى ۇتۋى - بۇل بوكسشىمىزدىڭ شەبەرلىگىنىڭ بيىكتىگىن كورسەتەدى. ءۇمىت ارتايىق.

ءسوز سوڭىندا وسى الەم بىرىنشىلىگى بىزدە اۋىر سالماقتاردا باس قاتىرارلىق  شارۋا  شاش ەتەكتەن ەكەن كورسەتتى. بەك نۇرماعامبەتوۆ پەن نۇرلان تۋرالى سپورتشىلار ءوز اراسىندا تۋريست بولىپ بارىپ قايتتى، دەپ قىسقا عانا قايىرادى... وسىعان قوسارىم شامالى.

باس جاتتىقتىرۋشى قايرات ءساتجانوۆ تۋرالى توقتالساق، باستاماسى وتە كوڭىلگە تولارلىق. ءۇمىت باسىم. ەڭ باستىسى كومانداسى نەگىزى جاستار ،ياعني پاريج وليمپياداسىنا تاس-ءتۇيىن كەلۋگە مۇمكىندىك جەتەرلىك. ولاي بولسا جەڭىستى كۇندەردە جۇزدەسكەنشە...

نۇربول داۋىتباەۆ،

(بوكستان سسسر سپورت شەبەرلىگىنە كانديدات)

Abai.kz