قازاقستان فۋتبول فەدەراتسياسىنىڭ باس حاتشىسى ازامات ايتحوجين 2022 جىلعى الەم چەمپيوناتىنا ىرىكتەۋ كەزەڭى اياسىندا فرانتسيامەن وتكەن ماتچتىڭ (0:8) ناتيجەسىنە قاتىستى پىكىر ءبىلدىردى. 

ايتحوجين وسى جانە الدىڭعى جىلى قازاقستان فۋتبول فەدەراتسياسىنا مەملەكەت بيۋدجەتىنەن 200 ميلليون تەڭگە بولىنگەنىن، بۇل قاراجات ءتۇرلى ۇلتتىق قۇرامالاردى حالىقارالىق جارىستارعا – جاستار (U17, U19), U21 جاسوسپىرىمدەر، جاسوسپىرىمدەر، جاستار اراسىنداعى وقۋ-جاتتىعۋ جيىندارى، Blind-Football (سوقىرلارعا ارنالعان فۋتبول), ايەلدەر، ۇلتتىق، جاعاجاي جانە فۋتزال كوماندالارىن دايىنداۋعا جانە ۇيىمداستىرۋعا جۇمسالعانىن ايتتى.

ونىڭ ايتۋىنشا، كەلەسى جىلدان باستاپ قازاقستان فۋتبول فەدەراتسياسى مەملەكەتتىك جانە كۆازيمەملەكەتتىك قۇرىلىمدار ەسەبىنەن قارجىلاندىرۋدان باس تارتۋ تۋرالى شەشىم قابىلدادى. ۇيىم ۋەفا-دان تۇسكەن قاراجات ەسەبىنەن، سونداي-اق دەمەۋشىلىك اقشانى تارتۋ ەسەبىنەن قارجىلاندىرىلادى.

"سوندىقتان ۇلتتىق قۇرامانىڭ ساتسىزدىگىنەن كەيىن ءوزىن جارنامالاعىسى كەلەتىن سىنشىلار مەن پوپۋليستەرگە ايتارىم: تىم بولماسا ماسەلەنىڭ ءمانىن تۇسىنۋگە تىرىسىڭىز، بوس ءسوز ايتپاس بۇرىن ءمان-جايدى زەرتتەڭىز. ءبىزدىڭ ەلدە فۋتبول ارقاشان بولعان جانە ءومىر سۇرەتىن بولادى. بۇل ميلليونداعان ادامدار ءومىر سۇرەتىن ءبىرىنشى سپورت ءتۇرى ەكەنى ءسوزسىز. ارينە، ونى جاڭا دەڭگەيگە كوتەرۋ ءۇشىن جىلدار مەن شىنايى قولداۋ قاجەت. ۇلتتىق قۇراما جەڭىسكە جەتكەندە، كەشەگى وسى جىگىتتەردى سونشا جامانداعانىڭدى ۇمىتىپ، ۇنەمى قولدادىم دەيسىڭ. سوندىقتان، جەڭىلگەن كۇندەرىندە دە، جەڭىسكە جەتكەن كۇندەرى دە ارقاشان كوماندامەن بىرگە بولۋ كەرەك", - دەدى قفف باس حاتشىسى.

Abai.kz