ۋكراينا شەكاراسىنا رەسەي ءجۇز مىڭنان استام اسكەرىن توپتاستىردى. وككۋپاتسياداعى قىرىمعا دا اسكەري تەحنيكانى شوعىرلاندىرۋدا. باتىس ەلدەرى رەسەي جاقىن ارالىقتا ۋكرايناعا باسىپ كىرۋى مۇمكىن ەكەنىن بولجاپ وتىر.

ريگا قالاسىندا ناتو ەلدەرىنىڭ سىرتقى ىستەر مينيسترلەرى جيىن وتكىزدى. جيىن بارىسىندا ۋكراينانىڭ سىرتقى ىستەر ءمينيسترى دميتري كۋلەبا ءسوز الىپ، بىلاي دەدى:

«وتە ۋشىققان جاعدايدا ستسەناري كەلەسىدەي بولۋى مۇمكىن. رەسەي ەۋروپادا قالىپتاسقان قاۋىپسىزدىك شەڭبەرىن بۇزىپ، 2008 جىلى گرۋزيانى نەمەسە 2014 جىلى قىرىمدى تارتىپ العانداي ارەكەت ەتۋى مۇمكىن. وسىلايشا ول دونباسستا سوعىس اشپاق». 

ۋكراينا سىرتقى ىستەر ءمينيسترىنىڭ سوزىنشە شەكارا ماڭىندا رەسەيدىڭ 115 مىڭ اسكەرى توپتاسقان. ءبىر اپتا ىشىندە رەسەي قوسىمشا 23 مىڭ اسكەر اكەلگەن. شەكارا ماڭىندا رەسەيدىڭ مىڭداعان ارتيللەرياسى، تانكتەرى مەن ۇشاقتارى دا تۇر. ال قىرىم مەن دونباسستا رەسەي قورعانۋعا ەمەس، شابۋىلعا ارنالعان تەحنيكالار ءتۇرىن شوعىرلاندىردى.

ساراپشىلاردىڭ پىكىرىنشە، رەسەي اسكەرى ۋكرايناعا باسىپ كىرسە، ۇرىس قيمىلدارى قارا تەڭىزدە دە بولۋى مۇمكىن. رەسەيدىڭ بۇل ارەكەتتەرىنە رۋمىنيا دا الاڭداۋشىلىق ءبىلدىرىپ وتىر. ماسكەۋ ۋكراينا ماڭىنا اسكەرىن شوعىرلاندىرۋىن ءبىرىنشى مارتە جاساپ جاتقان جوق. 2021 جىلدىڭ كوكتەمىندە ءدال وسىنداي جاعداي بلدى. رەسەي اسكەرىن شوعىرلاندىرىپ، ءىرى اسكەري جاتتىعۋ وتكىزدى. ارتىنشا اقش پرەزيدەنتى بايدەنمەن كەلىسسوز ءوتىپ، رەسەي اسكەرىن كەرى اكەتتى. ال پەنتاگوننىڭ بۇل جولعى بارلاۋشىلارى رەسەيدىڭ اسكەرى ەندىگى تاڭدا شىنايى نەگىزدە باسىپ كىرۋى مۇمكىن دەيدى. ماسكەۋ بارلىق ايىپتاۋلاردى جوققا شىعارىپ وتىر.

ۆاشينگتون رەسەي ۋكرايناعا باسىپ كىرسە، وندا قاتاڭ جاۋاپ بەرەتىنىن جەتكىزدى. ماسەلەن ەكونوميكالىق سانكتسيالار سالۋدان باستاپ، ءتۇرلى حالىقارالىق ۇيىمداردان شىعارۋ، عالامتوردان اجىراتۋ دا بولۋى ىقتيمال.

وسى رەتتە ۋكراينانىڭ وزىندە ەل باسشىسى زەلەنسكيگە قارسى تولقۋلار بولىپ جاتىر. حالىقتىڭ ءبىر بولىگى ونىڭ تاقتان كەتۋىن قالاسا، ەكىنشى بولىگى «پرەزيدەنتپەن ەمەس، رەسەيمەن كۇرەسەيىك» دەگەن ۇران ۇستانۋدا. ءبىر اپتا بۇرىن زەلەنسكي 1 جەلتوقسان كۇنى ەلدە توڭكەرىس بولۋى مۇمكىن دەگەن ەدى.

Abai.kz