وزبەكستان پرەزيدەنتى شاۆكات ميرزيەەۆتىڭ نۇر-سۇلتانعا مەملەكەتتىك ساپارى اياسىندا وتكەن قازاقستان-وزبەكستان ىسكەرلىك كەڭەسىنىڭ IV وتىرىسى بارىسىندا «ۋزاۆتوسانوات» اق ماشينا جاساۋ سالاسىندا  500 ميلليون دوللاردان استام ەكىجاقتى كەلىسىمدەرگە قول قويدى. بۇل تۋرالى وزبەكستاننىڭ ينۆەستيتسيالار جانە سىرتقى ساۋدا مينيسترلىگى حابارلادى.

وزبەكستان مەن قازاقستاننىڭ ەكى ماشينا جاساۋ كاسىپورنى «ۋزاۆتوسانوات» اق مەن «الليۋر كومپانيالار توبى» اق قوستاناي شاعىن توراپتى «سارىارقااۆتوپروم» زاۋىتىندا Chevrolet جەڭىل اۆتوموبيلدەرىن شىعارۋ بويىنشا ۋاعدالاستى. جوبانى جۇزەگە اسىرۋ ءۇشىن 65 ميلليون دوللار ينۆەستيتسيا جوسپارلانعان.

قازاقستانداعى تۇتىنۋشىلار اراسىندا Chevrolet ماركالى اۆتوكولىكتەرگە دەگەن جوعارى سۇرانىستى ەسكەرە وتىرىپ، وسى اۆتوموبيلدەردى قازاقستاندا شىعارۋ جوباسىن جۇزەگە اسىرۋ بويىنشا ىنتىماقتاستىقتى ودان ءارى دامىتۋعا ەكى جاقتى قىزىعۋشىلىق تۋىنداپ وتىر دەيدى وزبەكستان تاراپى. كەلىسىمدەر اياسىندا «سارىارقااۆتوپروم» بازاسىندا زاماناۋي جوعارى تەحنولوگيالىق ءوندىرىستى ەنگىزۋ جوسپارلانۋدا، بۇل ەكى ەل ەكونوميكاسىنىڭ ەكسپورتتىق الەۋەتىن ارتتىرادى.

قازاقستان رەسپۋبليكاسىمەن ىنتىماقتاستىقتى كەڭەيتۋ اياسىندا «ۋزاۆتوسانوات» قازاقستاندىق اۆتوكولىك ءوندىرۋشىسى «Qaztehna» جشس-مەن 15 ميلليون دوللار سوماسىنا كەلىسىمگە قول قويدى. قازاقستاندا وندىرىلەتىن ءونىم تۇرلەرىن كەڭەيتۋ ماقساتىندا «Qaztehna» بازاسىندا SINOTRUK HOWO جۇك كولىكتەرىن شىعارۋ ۇيىمداستىرىلادى.

قازاقستاندىق كومپانيالارمەن قول جەتكىزىلگەن بىرقاتار كەلىسىمدەر اۋىلشارۋاشىلىق ماشينا جاساۋ سالاسىنداعى ىنتىماقتاستىقتى كەڭەيتۋدى قامتىدى. «ۋزاۆتوسانوات» مەن «اگروماشحولدينگ KZ» اق 15 ميلليون دوللارعا ستراتەگيالىق سەرىكتەستىك تۋرالى كەلىسىمگە قول قويدى. قازاقستان رەسپۋبليكاسىندا اۋىل شارۋاشىلىعى تەحنيكاسىن، ونىڭ ىشىندە تراكتورلاردى ءوندىرۋ مەن ساتۋدى دامىتۋ كوزدەلىپ وتىر.

ماشينا جاساۋدىڭ نەگىزگى باعىتتارىمەن قاتار  قازاقستاندىق كومپانيالارمەن وزبەكستان رەسپۋبليكاسىنىڭ اۆتوموبيل نارىعىندا زاماناۋي تسيفرلىق شەشىمدەردى ەنگىزۋ تۋرالى 50 ملن دوللارعا كەلىسىم جاسالدى.

2020 جىلدىڭ ناۋرىز ايىنان باستاپ قوستانايدا «UzAuto Motors» كومپانياسىمەن بىرلەسىپ Chevrolet ماركالى اۆتوكولىكتەردى شىعارۋ قولعا الىنسا، بيىل «سارىارقااۆتوپروم» زاۋىتى «ساماۆتو» كومپانياسىمەن بىرلەسىپ SAZ LE60 تومەن ەدەندى اۆتوبۋستاردى شىعارۋدا. سونىمەن قاتار، 2019 جىلدىڭ قازان ايىنان باستاپ UzAuto Motors شىعارعان اۆتوموبيلدەر قازاقستانداعى ەڭ كوپ ساتىلاتىن اۆتوموبيلدەر رەيتينگىندە جەتەكشى ورىندارعا يە بولعان.

Abai.kz