انە-مىنە 16 جەلتوقسان كەلە جاتىر. قازاق ءۇشىن ەڭ قاستەرلى، ەڭ قاسيەتتى كۇن. تاۋەلسىزدىك كۇنى. ونان سوڭ ىلدىم-جىلدىم جىل جابار باستالادى. كۇنتىزبە 2022-گە اۋىسادى.

جەلتوقسان ايى تۋعاننان اقوردا باستاپ، اينالاسى قوشتاپ، نەبىر اتاق-ماراپاتتار، وردەن-مەدالدار اسپاننان قارشا بوراپ، سول ماراپاتتاردان دامەلىسى بار، بەيقامى بار، جۇرت ءبىراز دۇنيەگە قارىق بولادى. بۇل جىلداعى داستۇرگە اينالعان.

بيىل دا سولاي. ءتىپتى دوڭگەلەك داتاعا ءدوپ كەلىپ وتىر. تاۋەلسىزدىكتىڭ 30 جىلدىعى قۇرمەتىنە اقوردا ەلدەگى بىرقاتار ادامدى وردەن-مەدالدارمەن ماراپاتتاپتى. سانى جۇزدەپ، ءتىپتى مىڭداپ سانالاتىن ۇزىن-سونار ءتىزىمدى (تاۋەلسىزدىكتىڭ 30 جىلدىعى مەداللىمەن ماراپاتتالعانداردى قوسا ايتقاندا) بۇگىن ءتىزىپ بىتپەسپىز.

دەسە دە، اقوردانىڭ رەسمي سايتى سۇيىنشىلەپ، اتتارىن اتاپ، ايدىكتەپ جازعان ءتىزىمدى قاراپ وتىرىپ، بۇرىنعى ءھام قازىرگى شەندى-شەكپەندىلەردىڭ، ەكس-پرەزيدەنت نۇرسۇلتان نازارباەۆتىڭ اينالاسىندا ءجۇرىپ تانىلعان ءبىرشاما ادامنىڭ بار ەكەنىن كوزىمىز شالىپ قالدى. قاراڭىز:

«قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» دەيتىن وردەن بار. 2001 جىلدىڭ مامارىندا بەكىتىلگەن ەكەن. جيىرما جىلدان اسىپ بارادى، مىنە. وسى ۋاقىتقا دەيىن 30-عا جۋىق لاۋازىمدى بيلىك وكىلى ماراپاتتالعان. شەتەلدىك مەملەكەت باسشىلارىنان بۇل وردەنمەن رەسەي پرەزيدەنتى ۆلاديمير پۋتين، بەلارۋس باسشىسى الەكساندر لۋكاشەنكو جانە قىرعىزستاننىڭ ەكس-پرەزيدەنتى سوورونباي جەەنبەكوۆ ماراپاتتالعان.

مىنە، بۇگىن بۇل وردەندى قر كونستيتۋتسيالىق كەڭەستىڭ توراعاسى قايرات مامي, «قازمۇنايگاز» اق باسقارما توراعاسى، ماڭعىستاۋ وبلىسىنىڭ ەكس-اكىمى اليك ايدارباەۆ, «Bazis Holding سompany» جشس ديرەكتورلار كەڭەسىنىڭ توراعاسى، «Forbes» تىزىمىندەگى ميلليونەر، قازاقستاننىڭ ەڭ ىقپالى 50 بايىنىڭ قاتارىنداعى الەكساندر بەلوۆيچ كەۋدەلەرىنە تاعىپتى.

ءى دارەجەلى «بارىس» وردەنىمەن:

«ENRC PLC» نەگىزىن قالاۋشى، ايگىلى ءجويت الەكساندر ماشكەۆيچ, ءماجىلىس دەپۋتاتى داريعا نازارباەۆا, «وتانداستار قورىنىڭ» پرەزيدەنتى نۇرتاي ابىقاەۆ, «زەنيت» ورال زاۋىتىنىڭ» ديرەكتورى ۆياچەسلاۆ ۆاليەۆ, «قازحرومنىڭ» پرەزيدەنتى ارمان ەسەنجولوۆ, الگىندە وفشوردا اتى اشكەرە بولىپ، ەل ىشىندە ەكس-پرەزيدەنتتىڭ كوڭىلقوستىسى اتانىپ جۇرگەن بالەتشى اسەل قۇرمانباەۆانىڭ اكەسى، «قازاق ۇلتتىق اگرارلىق زەرتتەۋ» ۋنيۆەرسيتەتىنىڭ رەكتورى تىلەكتەس ەسپولوۆ, بۇرىنعى دەپۋتات قۋانىش سۇلتانوۆ ت.ب. ماراپاتتالىپتى.

ءىى دارەجەلى «بارىس» وردەنىمەن ماراپاتتالعاندار قاتارىندا:

سەنات توراعاسى ماۋلەن اشىمباەۆ, ىشكى ىستەر ءمينيسترى ەرلان تۇرعىمباەۆتار بار.

ءىىى دارەجەلى «بارىس» وردەنى:

«Nur Otan» توراعاسىنىڭ ءبىرىنشى ورىنباسارى باۋىرجان بايبەككە, بۇرىنعى باس پروكۋرور راشيد تۇسىپبەكوۆكە, «نۇرسۇلتان نازارباەۆ» قورىنىڭ اتقارۋشى ديرەكتورى قانات جۇماباەۆقا, ءماجىلىس دەپۋتاتى بەكبولات تىلەۋحانعا, «BI Group» يەسى ايدىن راقىمباەۆقا, «قازاقمىس حولدينگ» ديرەكتورلار كەڭەسىنىڭ توراعاسى ەدۋارد وگايعا, «سامرۇق-قازىنا» باسشىسى الماسادام ساتقاليەۆكە, ەۇۋ رەكتورى ەرلان سىدىقوۆقا, «دۇنيەجۇزى قازاقتارى قاۋىمداستىعىنىڭ» ءبىرىنشى ورىنباسارى زاۋىتبەك تۇرىسبەكوۆكە بۇيىرىپتى.

II دارەجەلى «دوستىق» وردەنىن ادام قۇقىقتارى جونىندەگى ۋاكىل ەلۆيرا ءازىمبوۆا مەن «kaspi.kz» ەگەسى ميحايل لومتادزەلەر كەۋدەسىنە تاعىپتى.

بۇلاردان بولەك «قۇرمەت»، I جانە II دارەجەلى «داڭق»، I, II, III دارەجەلى «ايبىن» وردەندەرى دە ۇلەستىرىلگەن. اقوردا اقپاراتىنشا، ءىىى دارەجەلى «ەڭبەك داڭقى» وردەنىمەن ۇزىن-ىرعاسى 105 ەڭبەككەر ماراپاتتالسا، جالسى سانى 553 ادام قۇرمەت گراموتاسىمەن ماراپاتتالىپتى.

وتىز جىلدا ەل دامۋىنا ۇلەس قوسقان ەل ازاماتتارىنىڭ ەتكەن ەڭبەكتەرىن ەلەپ جاتسا قۇبا-قۇپ! الايدا، كوبىنە وسى ءبىر بولماشى مەدالدىڭ ءوزى اتاقۇمار، اتقۇمار ادامداردىڭ ۇساق ساۋداسىنا ءتۇسىپ كەتەتىنى وكىنتەدى. ال بۇل ماراپاتقا لايىق پا، جوق پا، ول جاعى ماراپاتتى ۇلەستىرۋشىلەردى دە، وعان ىنتا-شىنتاسىمەن ۇمتىلعانداردى دا ويلاندىرا قويۋى ەكىتالاي...

«ەڭ قىزىعى جاڭاعى وتىز جىلدىقتىڭ مەدالىن العاشقىلاردىڭ ءبىرى بولىپ الاتىن دا جوعارىداعى ءماميننىڭ «قاھارماندار» وتريادى بولاتىنى داۋسىز»، - دەپ جازدىق وسىدان ءبىراز كۇن بۇرىن.

داۋدەي وردەندەردى كەۋدەلەرىنە تاققان جوعارىداعى ازاماتتاردىڭ ەسىم-سويلارىنا قاراپ، «ساۋەگەيلىگىمىز» ناقتالدى دەگەنىمىز ەمەس، بىراق ءسوزىمىز ءسوز بولدى. ويتكەنى، تاۋەلسىزدىكتىڭ 30 جىلدىعى دەگەن قاسيەتتى داتا اتاققۇمارلىق اۋرۋى اسقىنعان قازاقستان بيلىگىندەگى از توپ ءۇشىن كەۋدەلەرىنە القا تاعۋدىڭ تاعى ءبىر مۇمكىندىگى عانا سەكىلدى كورىنەدى.

نۇرگەلدى ابدىعانيۇلى

Abai.kz