كۇنى كەشە قازاقستان پرەزيدەنتى قاسىم-جومارت توقاەۆ رەسەيگە ارنايى ساپارمەن باردى. پۋتين مەن توقاەۆ ەكى ساعاتتان استام كەلىسسوزدەر جۇرگىزىپ، ناتيجەسىندە 11 قۇجاتقا قول قويىلدى. كەزدەسۋ بارىسىندا پۋتين قازاقستانداعى «قاسىرەتتى قاڭتار» وقيعاسىنا بايلانىستى كوڭىل ايتىپ: «كورشىلەس ەلگە باندالىق قۇرىلىمدار شابۋىل جاسادى»، - دەپ اتادى. ءبىر قىزىعى رەسەيدىڭ سىرتقى بارلاۋ قىزمەتىنىڭ ديرەكتورى سەرگەي نارىشكين كەشە ۇلكەن سۇحبات بەردى. ول سۇحبات بارىسىندا قازاقستانداعى وقيعالاردى الدىن-الا بىلگەنىن ايتتى.

«بارلاۋ قىزمەتىندە قازاقستاندا ءبىر سۇمدىقتىڭ دايىندالىپ جاتقانى جايلى اقپاراتتار بولدى ما»، دەگەن سۇراققا، ول بىلاي دەپ جاۋاپ بەردى:

«ارينە بولدى. ەڭ الدىمەن سيرياداعى دايش سودىرلارى تالقاندالعان سوڭ، ورتالىق ازياعا كەلگەنىن بىلدىك. بۇل بىزگە دە، وزگە ەلدەرگە دە قۇپيا ەمەس اقپارات ەدى. ولاردىڭ كەلۋى كىمنىڭ جاسىرىپ-قولپاشتاۋىمەن ىسكە اسىرعانى دا بەلگىلى بولدى. بۇل ماسەلە بويىنشا ايماقتاعى بارلىق ەلدەر الاڭداۋشىلىق تانىتتى. ءبىز بۇل اقپاراتتارمەن ۇقشۇ قۇرامىنداعى ەلدەرمەن بولىستىك، ارينە قازاقستانمەن دە.

قازاقستانداعى وقيعالار ەكونوميكالىق ۇرانداردى تۋ ەتكەن باستاپقىداعى بەيبىت ميتينگتى دەسترۋكتيۆتى ساياسي كۇشتەر ءوز ماقساتىنا پايدالانىپ، ءتۇرلى-ءتۇستى رەۆوليۋتسيالار جاساۋعا ۇمتىلاتىنىن اڭعارتتى. بۇل كۇشتەر ءتۇرلى سودىرلاردى دا قولدانۋعا تىرىسادى. ولاردى باسقارۋ قالىپتى مەحانيزم ارقىلى ىسكە اسادى جانە 2014 جىلعى ۋكراينا وعان دالەل.

ۇقشۇ-عا مۇشە ەلدەردىڭ وسى ساتتەگى ارەكەتى ساياسي جىگەر مەن مەملەكەت باسشىلارىنىڭ ءبىر اۋىزدان ناقتى شەشىم قابىلداۋى ارقىلى تارتىپسىزدىكتەر مەن تەررورلىق شابۋىلداردى توقتاتۋعا بولاتىنىن انىق كورسەتتى. ەكسترەميستىك جانە تەررورلىق توپتاردىڭ قاۋىپتەرى سەيىلگەن جوق، ولاردىڭ تاجىريبەلەرى مول جانە قارجىلاي قولداۋعا يە. سوندىقتان ۇنەمى مونيتورينگ جاساپ، تەررورعا قارسى بارلاۋ قىزمەتتەرىنىڭ بىرلەسە ارەكەت ەتۋى ءتيىمدى بولماق»، - دەيدى ول.

وسىلايشا ول رەسەيدىڭ سىرتقى بارلاۋ قىزمەتتەرى قازاقستانداعى وقيعالاردىڭ ۇيىمداستىرىلىپ جاتقانىن بىلگەنى جايىندا ناقتى ايتتى.

ۇقشۇ ارنايى وپەراتسياسىنان كەيىن ۇيىمعا مۇشە مەملەكەتتەر اراسىندا جاتتىعۋلار سانى ارتاتىنى ايتىلدى.

«قازاقستان رەسپۋبليكاسىنىڭ اۋماعىندا ءبىز ۇقشۇ اسكەرلەرىنىڭ ءارتۇرلى قۇرامداس بولىكتەرىن دايىنداۋدى بىرىكتىرەتىن بىرلەسكەن جانە ارنايى وقۋ-جاتتىعۋلار وتكىزۋدى جوسپارلاپ وتىرمىز»، - دەپ حابارلادى ۇقشۇ بىرىككەن شتابى باسشىسى اناتولي  سيدوروۆ.

تاجىكستاندا ورتالىق ازيا ايماعىنىڭ ۇجىمدىق جەدەل ارەكەت ەتۋ كۇشتەرىمەن «شەكارا-2022» بىرلەسكەن وقۋ-جاتتىعۋى وتەدى. قاتىسۋشىلار حالىقارالىق لاڭكەستىك ۇيىمدارعا قارسى تۇرۋ بويىنشا تاپسىرمالاردى پىسىقتايدى. قورىتىندى كەزەڭدە قىرعىز رەسپۋبليكاسىنىڭ اۋماعىندا ۇقشۇ بىتىمگەرشىلىك كۇشتەرىمەن «مىزعىماس باۋىرلاستىق – 2022» كوماندالىق-شتابتىق وقۋ-جاتتىعۋىن وتكىزۋ جوسپارلانۋدا. وقۋ-جاتتىعۋ بارىسىندا بىتىمگەرشىلىك وپەراتسياسىن جۇرگىزە وتىرىپ، داعدارىس ايماعىنداعى جانجالدان كەيىنگى رەتتەۋ مىندەتتەرى پىسىقتالادى.

«قازىرگى تاڭدا ۇقشۇ-عا مۇشە مەملەكەتتەر اراسىندا اسكەري قاقتىعىستار مەن ساياسي داعدارىستار ۋشىعىپ تۇر. ۇيىمعا مۇشە ارمەنيا قاراباق داۋىنا بايلانىستى ازەربايجانمەن شيەلەنىسى ارتتى، ال قىرعىز ەلى مەن تاجىكستان اراسىندا شەكارالىق اتىس كوبەيگەن. بەلارۋس پەن رەسەي باتىستىڭ سانكتسياسىنىڭ استىندا جاتىر. بۇل قاقتىعىستار ۇيىمنىڭ بىرتۇتاستىعىنان بولەك، ەكونوميكالىق الەۋەتىنە دە كەرى اسەرىن تيگىزەدى»، - دەيدى.

Abai.kz