قىرعىزستان رەسەيدەن ميگراتسيالىق ورتالىق قۇرۋدى ۇسىندى. بۇل ۇسىنىستى جوگوركۋ كەڭەش توراعاسى تالانت مامىتوۆ ماسكەۋدە ارىپتەسى ۆياچەسلاۆ ۆولودينمەن كەزدەسۋ كەزىندە ايتقان.

تاراپتار ەۋرازيالىق ينتەگراتسيا، ساۋدا-ەكونوميكالىق قارىم-قاتىناستى جانە مادەني-گۋمانيتارلىق سالانى دامىتۋ ماسەلەلەرىن تالقىلاعان. قىرعىزستان پارلامەنتىنىڭ سپيكەرى رەسەيگە جۇرگەن قىرعىز ميگرانتتارىنىڭ قۇقىق جاعدايىن جاقسارتۋعا بايلانىستى بىرنەشە ۇسىنىس بىلدىرگەن.

"رەسەي تاراپقا قىرعىز ازاماتتارىن قولداۋ ءۇشىن ميگراتسيالىق ورتالىق قۇرۋدى ۇسىندىق. بۇل رەسەيگە بارعان ازاماتتاردى ەڭبەكپەن قامتۋعا جانە ولارعا زاڭدىق تۇرعىدان كەڭەس بەرۋگە مۇمكىندىك بەرەدى", - دەدى تالانت مامىتوۆ.

قىرعىز پارلامەنتى ءباسپاسوز قىزمەتىنىڭ مالىمەتىنشە، بۇل ۇسىنىستى رەسەيلىك ارىپتەسى ۆياچەسلاۆ ۆولودين وڭ باعالاعان. ول بۇل ۇسىنىس ۇكىمەتكە جىبەرىلەتىنىن ايتقان.

2021 جىلدىڭ 29 جەلتوقسانىنان باستاپ رەسەيگە جۇمىس ىستەۋ ءۇشىن باراتىن شەتەل ازاماتتارى 30 كۇن ىشىندە مەديتسينالىق تەكسەرۋدەن ءوتۋى ءتيىس. رەسمي مالىمەت بويىنشا قىرعىزستاننىڭ 1 ملن 118 مىڭ ازاماتى شەتەلدە جۇمىس ىستەيدى. ولاردىڭ ميلليونى رەسەيدە ءجۇر.

Abai.kz