قاڭتارداعى قايعىلى جاعداي ءبارىمىزدىڭ قابىرعامىزدى قايىستىرعانمەن، مەملەكەتىمىزدىڭ ىرگەسى بۇزىلعان جوق. ەلىمىزدى تەڭسەلتۋگە جاسالعان  سوققى قاتتى بولعانمەن، شاڭىراعىمىزدى  شايقاي المادى. قوعامدى، حالىقتى قيراتا المادى. مەملەكەتىمىزدى ساقتاپ قالا الدىق. قازاقستانداعى بۇل احۋالدى بيلىكتى باسىپ الىپ، كۇشپەن وزگەرتكەن كورشىلەس قىرعىزستانداعى جاعدايمەن سالىستىرۋعا بولمايدى. ەل باسىنا كۇن تۋعان ساتتە پرەزيدەنت قاسىم-جومارت توقاەۆقا دا وڭاي سوقپاعانى راس. كىمنىڭ بۇلىكشى، كىمنىڭ بەيبىت تۇرعىن ەكەنىن اجىراتا المايتىن قيىن ساتتە كوش باستاۋشىنىڭ كورەگەندىك تانىتۋى، سوزىنە سەندىرە ءبىلۋى ماڭىزدى ەدى. پرەزيدەنت بۇل ۇدەدەن شىقتى.

حالىقتىڭ بەيبىت ميتينگىسىمەن باستالىپ، اياعى بۇلىنشىلىككە ۇلاسقان بۇل وقيعانىڭ سەبەپ-سالدارى بولاشاقتا جان-جاقتى زەرتتەلەتىن بولادى. وندا ءبىرتالاي ادام قۇربان بولدى. ولار جايدان-جاي ءومىرىن قيعان جوق. ارينە ميتينگكە شىققانداردىڭ ءبارىن سودىر دەۋگە بولمايدى. ارانداتۋشىلار بولدى. ونى جوققا شىعارۋعا بولمايدى. مەملەكەت پەن جەكەمەنشىكتىڭ مۇلكىن ورتەپ، ادامداردى ولتىرگەن ادامدى سودىر ەمەس دەسەك، كۇناھار بولامىز. بيلىك ورگاندارىن باسىپ الۋ، ورتەۋ ءبىزدىڭ تاريحىمىزدا ەشقاشان بولماعان جاعداي. سوندىقتان بۇل قازاق حالقىنا ۇلكەن سىناق بولدى. بۇعان دەيىن ءبىز ساياسي جاعىنان دا، ەكونوميكالىق جاعىنان دا ايماقتاعى ەڭ تۇراقتى ەلمىز دەگەندى كوپ ايتاتىنبىز. ءبىزدى تاعدىر سىنادى. ەڭ باستىسى، سىناقتان قۇلامادىق.

وسى ساتتە مەملەكەت باسشىسىنىڭ حالىققا جولداعان ۇندەۋى مەن مالىمدەمەلەرى دەر كەزىندە جاسالدى. ويتكەنى قينالعان، باعدارىنان اجىراعان حالىقتىڭ دەمەۋدى وزگەدەن ەمەس، ءوزى سايلاعان پرەزيدەنتتەن كۇتەتىنى بەلگىلى. مۇنداي قىم-قۋىت كەزدە مەملەكەت باسشىسىنىڭ جانىندا ەكەنىن، حالىقپەن بىرگە ەكەنىن سەزىنۋدەن قۋاتتى ەشتەڭە جوق.

سوڭعى 30 جىلدا ءبارمىز بۇيتەمىز، سۇيتەمىز، قاتىرامىز دەگەن ءسوزدى كوپ ەستىدىك. وسى ۋاقىتقا دەيىن قانشاما مەملەكەتتىك باعدارلامالار قابىلداندى. ءاردايىم وزگەرىس تۋرالى ايتۋ جەڭىل بولعانمەن، ونى ورىنداۋ قيىندىق تۋدىردى.  بيىلعى «قاڭتار قاسىرەتى» سونىڭ ناتيجەسى دەۋگە بولادى. ءبىز ودان ۇلكەن ساباق الۋىمىز كەرەك. ونى قايتا-قايتا ايتا بەرۋدىڭ دە ەندى قاجەتى جوق. وتكەن كۇنگە عانا قايرىلا بەرمەي، الداعى ومىرىمىزدە مۇنداي جاعدايدىڭ ەندى قايتالانباۋى ءۇشىن بيلىك ورگاندارىنان باستاپ، ازاماتتىق قوعامنىڭ بارلىق وكىلى وزگەرىسكە دايىن بولۋ كەرەك. ەگەر ءبارىمىز ءبىر كىسىدەي جۇمىلىپ، ءبىر جاعادان باس، ءبىر جەڭنەن قول شىعاراتىن بولساق الىنبايتىن قامال جوق.

ءبىزدىڭ ءومىرىمىزدى ەشكىم سىرتتان كەلىپ جاقسارتىپ بەرمەيدى. مەن وسى ۋاقىتقا دەيىن بيلىكتىڭ دە، وپپوزيتسيانىڭ دا حالىققا بەرگەن ۋادەلەرىن تۇگەل ەستىدىم، كوردىم. ءتىپتى ءوزى شەتەلدە جاتىپ، بىزگە اقىل ايتقاندار از بولعان جوق. جەمە-جەمگە كەلگەندە بارلىق جاعدايمەن بەتپە-بەت قالىپ، ءومىردىڭ اششىسىن دا، تۇششىسىن دا كورىپ، ءبىلىپ، سەزىپ، بارلىق قيىندىقتى قايىسپاي كوتەرىپ كەلگەن ەلدىڭ بىرلىگى مەن ىنتىماعى ەل باسىنا كۇن تۋعان كەزدە تاعى ءبىر سىننان ءوتتى.

«جاڭا قازاقستان» باعدارلاماسى ءبىر كۇننىڭ نە ءبىر ايدىڭ، بولماسا ءبىر جىلدىڭ ىشىندە جۇزەگە اساتىن وڭاي شارۋا ەمەس. ەلدىڭ سەنىمىن ارقالاپ، ءۇمىتىن ۇكىلەگەن پرەزيدەنتتىڭ يىعىنا تۇسكەن جۇكتى دە جەڭىل دەپ ەشكىم ايتا الماسى انىق. وسىنداي سىن ساعاتتا حالقىمەن بىرگە بولىپ، ونىڭ ورتاسىنان تابىلعان قاسىم-جومارت توقاەۆتىڭ الدىندا ءالى كوپ سىناق تۇر. وسىنداي قىسىلتاياڭ كەزەڭدە ەلگە جاعاتىن ءسوز ايتۋ دا، كوپكە ۇلگى بولاتىن ءىس جاساۋ دا وڭاي شارۋا ەمەس.  ءبىز سوزدەن  ەشكىمگە ەسەسىن جىبەرەتىن حالىق ەمەسپىز. ەندى ءسوزىمىزدى ىسىمىزبەن دالەلدەپ، ءوز الدىمىزعا دەربەس ەل بولا الاتىنىمىزدى جانە  ۇلتتىق مەملەكەت قۇرا الاتىنىمىزدى وزگەدەن بۇرىن ەڭ الدىمەن وزىمىزگە تاعى ءبىر رەت دالەلدەپ، سودان كەيىن ونى وزگەلەرگە مويىنداتۋعا ارەكەت جاساۋعا ءتيىسپىز. سوندا عانا الەمنىڭ دامىعان ەلدەرىمەن يىق تىرەستىرىپ تۇرا الاتىن، ءوزىنىڭ كۇش-قۋاتى مەن الەۋەتىنە سەنىمدى ەل رەتىندە الەمدىك قاۋىمداستىقتاعى ءوز ورنىمىزدى ساقتاپ قالا الامىز.

راحمان الشانوۆ،

ەكونوميكا عىلىمدارىنىڭ دوكتورى،
تۋران ۋنيۆەرسيتەتىنىڭ رەكتورى.

Abai.kz