2022 جىلى 15 اقپان كۇنى رەسەي مەملەكەتتىك دۋما دەپۋتاتتارى دونباسس پەن لۋگانسكى ايماقتارىن تاۋەلسىز رەسپۋبليكا دەپ جاريالاۋ تۋرالى قاۋلىنى ءبىر اۋىزدان ماقۇلداعان ەدى. ناقتىراق ايتساق، 351 دەپۋتات قولداپ داۋىس بەردى.

باسىندا مۇنداي اۆانتيۋريستتىك قۇجاتتى قولداپ داۋىس بەرگەن رەسەي دەپۋتاتتارىنىڭ كەيبىرى بۇل ىسىنە وكىنە باستادى. سولاردىڭ ءبىرى كپرف پارتياسىنىڭ دەپۋتاتى – ميحايل ماتۆەەۆ. العاشقىلاردىڭ ءبىرى بولىپ ۇكىمەتتەن ۋكراينانى بومبالاۋىن توقتاتۋدى تالاپ ەتتى.

دەپۋتاتپەن BBC تىلشىسى سۇحباتتاسىپ، نەگە مۇنداي قادامعا بارعانىن سۇراپ كوردى. سۇحباتىنان ءۇزىندى ۇسىنامىز.

"مەملەكەتتىك دۋماعا كەلگەن قۇجاتتا دحر مەن لحر-ءدى تاۋەلسىز ەل دەپ جاريالاۋ جايلى، سول ارقىلى دونباستا بولىپ جاتقان سەگىز جىلدىق سوعىستى دوعارۋ ماقساتى عانا كورسەتىلگەن-تۇعىن. بەيبىت اسكەر كىرگىزۋ جايلى عانا ءسوز بولدى. ابحازيا مەن وڭتۇستىك وسەتيانى تاۋەلسىز ەل دەپ مويىنداعانىمىز سىندى ستسەناري بولادى دەپ ويلادىق. بۇكىل دەپۋتات سولاي ويلادى، ويىندا سول عانا بولدى. مۇمكىن ارامىزدان كەي دەپۋتات پەن سەناتورلار الدا نە بولارىن ىشتەي بىلگەن دە، سەزگەن دە بولار. بىراق ولاردىڭ كىم ەكەنىن مەن بىلمەيمىن. حابارىم جوق. ءدال قاي تۇستان كەمشىلىك كەتتى – ونى دا بىلمەيمىن. ءبىز قابىلداعان قاۋلىنىڭ مۇنداي الىپ سوعىسقا اكەلەتىنىن كىم بىلگەن؟ بەيبىت اسكەر دونباسقا كىرىپ، تاۋەلسىز رەسپۋبليكانىڭ قاۋىپسىزدىگىن قامتاماسىز ەتۋى ءتيىس ەدى. بىراق قۇجاتقا داۋىس بەرۋدىڭ سوڭى كيەۆتى بومبالاۋعا اكەلەتىنىن، رەسەيدىڭ بۇكىل اسكەري كۇشى ۋكرايناعا باسىپ كىرەرىن كىم بىلگەن؟ ەرتەڭىندە رەسەيدىڭ ۋكرايناعا باسىپ كىرگەنىن كورىپ-ەستىپ، شالقامنان تۇسە جازدادىم. دەپۋتتاردىڭ ەشكىمى دە مۇنى كۇتپەدى، شىنى كەرەك. مەملەكەتتىك دۋمادان شىققان قۇجات پەن فەدەراتسيا كەڭەسىندە تالقىلانعان ماسەلەنىڭ اراسىندا الشاقتىق بار", - دەيدى ماتۆەەۆ.

ونىڭ ويىنشا، اسكەري باسقىنشىلىق جاساماي رەسەي باسشىلىعى ۋكراينا بيلىگىمەن بەيبىت كەلىسىمگە كەلۋى كەرەك ەدى.

"سوعىستى باستاعان بيلىك پارتياسى ("ەدينايا روسسيا" - رەد.)  ۋكراينا بيلىگىمەن كەلىسىم جاساپ كورۋگە تىرىسپاعان دا سىڭايلى. ويى دونباستى قورعاۋ ەمەس. رەسەي مىنا ماشتابتى اسكەري باسقىنشىلىعىن توقتاتۋى ءتيىس. سوعىستىڭ سوڭى قالاي ۋشىعىپ كەتكەنىن ءدال ايتۋ قيىن. بىراق ۋكراينادا بولىپ جاتقان جاعداي – بۇل ناعىز كاتاستروفا. رەسەي دە، ۋكراينا دا، بۇكىل الەم بۇل كونفليكتىنى شەشۋگە اتسالىسۋى كەرەك. ۋكراينا بيلىگىنىڭ ۇلتشىل ەكەنىن ءبارىمىز بىلەمىز. بىراق رەسەي ەشقاشان ءوزى سوعىس باستاماعان ەل ەدى عوي. تاريحتا ابىرويدى ۇستاپ تۇرعان دا وسى قاسيەت ەدى. ەندى بۇدان ايىرىلعالى تۇرمىز. رەسەي بيلىگىنىڭ قاتەلىگى دە سول – ماسەلەنى بەيبىت جولمەن شەشۋدىڭ بۇكىل دۇنيەجۇزىلىك ءتاسىلىن، جولدارىن قولدانىپ كورمەي، بىردەن شابۋىلعا شىعۋى. ۋكراينا دا ساۋ سيىردىڭ بوعى دەي المايمىن. بىراق رەسەي اعالىق، اراعايىندىق جاساۋى، ىزەت كورسەتۋ كەرەك ەدى", - دەيدى دەپۋتات.

دەرەككوزى: bugin.kz

Abai.kz