ساياساتتانۋشى دوسىم ساتپاەۆ قازاقستان اقپاراتتىق سوعىستا قورعانسىز ەكەنىن ايتىپتى. 

«قازاقستاننىڭ باسشىلىعىنا ەسكەرتكىم كەلەدى. قازاقستان اۋماعىندا اقپاراتتىق سوعىس ءجۇرىپ جاتىر. اقپاراتتىق سوعىس قازاقستان قوعامىن ەكىگە ءبولدى. قازاقستان بيلىگى بولىپ جاتقان وقيعالارعا دايىن ءارى مۇقيات بولۋى كەرەك. ويتكەنى، قازىر ازاماتتىق بەلسەندىلەرگە عانا ەمەس، قازاقستاننىڭ وزىنە «قوقان-لوقى» جاسالىپ جاتىر. سوندىقتان، اقپاراتتىق سوعىسقا دايىن بولىڭىزدار. جايباراقات جۇرەتىن كەز ەمەس، ەشكىم ودان 100% قورعانا المايدى.

وكىنىشكە وراي، بۇعان ءوزىمىز جول بەرىپ الدىق. 30 جىل بويى قازاقستاننىڭ مەدياسىن ءوز قولىمىزبەن جويىپ، ال، بوس قالعان ۆاكۋمدى ۇگىت-ناسيحاتىن جۇرگىزەتىن رەسەيلىك ارنالار تولتىردى»، - دەيدى ساتپاەۆ.

ول مەديا سالاسى ءالسىز قازاقستاندى تاس ساۋىتى جوق تاسباقاعا تەڭەگەن.

«ەگەر قازاقستاننىڭ مەديا قۇرىلىمدارى مىقتى بولسا، بۇل كەز كەلگەن ناسيحاتقا قارسى قۋاتتى قارۋ بولار ەدى. ول بىزدە جوق. ءبىز قورعانسىزبىز. مەن مۇنى ساۋىتسىز تاسباقا دەپ اتايمىن. ەگەر ەرتەڭ بىزگە گيبريدتى اقپاراتتىق سوققىلار جاسالسا، وندا ءبىز وعان توتەپ بەرە المايمىز. قارسى تۇرا المايمىز. ويتكەنى، قازاقستاننىڭ ۇلتتىق مۇددەسىن قورعايتىن ادامدار جانىمىزدان تابىلمايدى.  مەملەكەتتىڭ قازاقستاننىڭ ۇلتتىق مۇددەسىن قورعايتىن، اسىرەسە اقپاراتتىق سالادا قورعان بولاتىن بىردە-ءبىر قۋاتتى قۇرالى جوق»، - دەيدى ساياساتتانۋشى.

Abai.kz