ۋكراينادا سوعىس باستالعالى بەرى رەسەيلىك ازاماتتار وزگە ەلگە كەتۋدى ەسەلەپ ارتتىرعان. رەسمي ستاتيستيكا بويىنشا ولاردىڭ سانى 3,8 ملن ادامدى قۇرايدى. ولاردىڭ ىشىندە 204 مىڭى قازاقستانعا كەلگەن. 

ەل حالقى قالالىق حقكو-لاردا قىزمەت الۋشى رەسەيلىكتەردىڭ سانى ارتقانىن ايتادى. باسىم كوپشىلىگى جسن الۋعا جۇگىنەدى. كۇنى كەشە عانا رەسەيلىك تانىمال ءانشى لەۆ لەششەنكو الماتى قالاسى، مەدەۋ اۋدانىنداعى حقكو ورتالىعىنا بارعان سۋرەتى جەلىدە تاراپ، حالىق اراسىندا قىزۋ تالقىعا ءتۇستى.

لەۆ لەششەنكوعا قاتىستى قانداي قىزمەت ءتۇرى كورسەتىلگەنى ناقتى ايتىلمادى. ويتكەنى ول ءىىم اقپاراتىنا سەنەتىن بولساق، ءار جەكە ادامنىڭ رۇقساتىنسىز ايتىلۋعا بولمايتىن اقپارات تۇرىنە جاتادى. الايدا ول ازاماتتىق الۋ ماسەلەسى بويىنشا جۇگىنبەگەنى انىقتالدى.

قوعام قايراتكەرى، "سەرپىن" باعدارلاماسىنىڭ نەگىزىن قالاۋشى مۇرات ابەنوۆ حقكو-عا كەلگەن لەۆ لەششەنكوعا قاتىستى جازبا ارناپ، مينيستر ءمۋسيندى ءبىر ءبۇرىپ الدى.

"كەزىندە ساياساتتان تىسپىن دەپ مالىمدەسە دە، كەيىن قىرىمدى باسىپ الۋدى قولداعان لەششەنكو شىن مانىندە سەپاراتيزم مەن ۋكراينا سوعىسىن جاقتاۋشىنىڭ ءبىرى. مينيستر مۋسين مىرزا، ءسىز بىرەسە سبەر كەلىسىمىن ايتتىڭىز، بىرەسە رەسەيگە "بوران" زىمىران كەمەسىن بەرەيىك دەدىڭىز. رەسەيلىك باعىتقا دەگەن قانداي ماحاببات بۇل؟ قالايشا جسن بەرۋ وسىنداي دەڭگەيگە ءتۇستى جانە نەگە ءاربىر كەلۋشىگە بەرىلە بەرەدى؟ رەسمي جاۋاپ بەرۋىڭىزدى سۇرايمىن", - دەپ جازدى ول.

باعدات مۋسين لەزدە جاۋاپ قاتتى. ول ءوز پاراقشاسىنا بىلاي دەپ جازدى:

"جسن-ءدى رەزيدەنت ەمەس ادامدارعا راسىمدەۋ - تسون-دار (“ازاماتتارعا ارنالعان ۇكىمەت” فرونت- وفيستەرى) ارقىلى كورسەتىلەتىن قىزمەتتەردىڭ ءبىرى. بۇگىنگى تاڭدا 600-دەن استام قىزمەت تسون مەن ەگوۆ ارقىلى كورسەتىلەدى. مۋرات ابەنوۆ جاقسى بىلەتىندەي، قىزمەت كورسەتۋ نورماتيۆتىك اكتىلەرگە سايكەس جۇرگىزىلەدى. ال سول اكتىلەر قىزمەت كورسەتەتىن مەملەكەتتىك ورگانداردا جازىلادى، بەكىتىلەدى. ناقتى بۇل قىزمەت ءتۇرىن ىشكى ىستەر مينيسترلىگى اتقارادى. ءبىز ەگوۆتا الدە تسون-داردا سول قىزمەتتى الۋ پروتسەسىن جەڭىلدەتەمىز، راسىمدەيمىز.
مۇرات ابەنوۆ شىندىققا جاناسپايتىن اقپاراتتى تاراتپاۋىڭىزدى سۇرايمىن!", - دەدى. 

الايدا جەلى قولدانۋشىلارى مەن قوعام بەلسەندىلەرى: "جسن الىپ، بانك كارتوچكاسىن جاساتۋ ارقىلى رەسەيلىكتەر سانكتسيانى اينالىپ ءوتۋ جولدارىن ىزدەستىرۋدە، وسى ارقىلى ولار قازاقستانعا دا سانكتسيا سالدىرۋى مۇمكىن. قازاقستان جاناما سانكتسيانىڭ استىندا قالۋى عاجاپ ەمەس", - دەگەن ويدا.

ال ساراپشىلار "قازاقستانعا سانكتسيا سالىنبايدى، سەبەبى قازاقستان باتىس سالعان سانكتسيالاردى اينالىپ وتۋگە نەمەسە بۇزۋعا جول بەرمەيتىنىن رەسمي مالىمدەگەن ەلدىڭ ءبىرى" دەگەندى كەلتىرۋدە.

Abai.kz