ءبىلىم بەرۋ ۇيىمدارىندا جازعى كەزەڭدە بارلىعى 1150 ۇيىرمە مەن سەكتسيا جۇمىس ىستەيدى. وقۋشىلار ءۇشىن جازعى دەمالىس وتە ماڭىزدى. پسيحولوگتار وقۋشىنىڭ وقۋ جىلىنداعى جەتىستىگى جازعى دەمالىسىنىڭ قالاي وتكەنىنە دە تىكەلەي بايلانىستى دەيدى. ياعني وقۋشى جازدا سەرۋەندەپ، قاجەتتى فيزيكالىق جاتتىعۋلار جاساۋ مەن ۇيىرمەلەرگە قاتىسۋىن توقتاتپاۋى ءتيىس. بۇل بالانىڭ جەتىلۋى مەن ءبىلىم الۋعا دەگەن قۇشتارلىعىن ارتتىرا تۇسەدى. مىنە، سوندىقتان الماتى قالاسىنىڭ ءبىلىم مەكەمەلەرى وقۋشىلارعا ارنالعان ۇيىرمەلەردى جاز مەزگىلىنە ساي جاساقتادى. 

جازعى كەزەڭدە الماتىلىق وقۋشىلاردى جۇمىسپەن قامتۋ كەلەسى باعىتتار بويىنشا ۇيىمداستىرىلادى:

26 مامىردان باستاپ 17 ماۋسىمعا دەيىن 1-8 سىنىپ وقۋشىلارى ءۇشىن جازعى مەكتەپ جۇمىس ىستەيدى. جازعى مەكتەپتە نەگىزگى ساباقتاردان باسقا دەنە شىنىقتىرۋ مينۋتتارى، قوزعالمالى ويىندار، فلەشموبتار ۇيىمداستىرۋ جوسپاردا بار. 30 وقۋشىلاردى قاتىسا الادى.

7-13 جاستاعى بالالارعا ارنالعان جازعى مەكتەپ جانىنداعى لاگەر ەكى تۇردە: تولىق كۇنگە تاماقپەن جانە تولىق ەمەس كۇنگە تاماقسىز جۇمىس جاسايدى. جۇمىس ۋاقىتى 2022 جىلعى 1 ماۋسىمنان 27 تامىزعا دەيىن. 26 مىڭنان استام بالا قامتىلادى.

مەكتەپتەردە سپورتتىق سەكتسيالار، ۇيىرمەلەر، ستۋديالار، وقىرمان كلۋبتارى مەن مەكتەپ كىتاپحانالارى جۇمىس ىستەيتىن بولادى. ءبىلىم بەرۋ ۇيىمدارىندا جازعى كەزەڭدە بارلىعى 1150 ۇيىرمە مەن سەكتسيا (بەينەلەۋ ونەرى، توقۋ، قولدانبالى ونەر، سپورت سەكتسيالارى) جۇمىس ىستەيتىن بولادى. شامامەن 28 مىڭنان استام بالا قامتىلادى.

الماتىدا جازدا بالالارمەن قوسىمشا ءبىلىم بەرۋ ۇيىمدارى (وقۋشىلار سارايى، التى وقۋشىلار ءۇيى، 44 جەكە قوسىمشا ءبىلىم بەرۋ ۇيىمدارى) جۇمىس ىستەۋى جوسپارلانىپ وتىر. جازعى دەمالىس كەزەڭىندە بالالارعا ارنالعان قوسىمشا ءبىلىم بەرۋ ۇيىمدارىندا بارلىعى 1200-گە جۋىق ۇيىرمەلەر مەن سەكتسيالار قولجەتىمدى. 28 مىڭنان استام بالا قامتىلادى.

ساۋىقتىرۋ دەمالىسىمەن ءبىرىنشى كەزەكتە الەۋمەتتىك وسال ساناتتاعى بالالار: كوپ بالالى، از قامتىلعان وتباسىلاردان شىققان بالالار، ەرەكشە ءبىلىم بەرىلۋىنە قاجەتتىلىگى بار بالالار قامتىلاتىن بولادى. 33 مىڭنان استام بالا قامتىلادى.

الماتى وقۋشىلار جازدا دەمالىپ، ءبىلىم الۋعا ۇلكەن قۇشتارلىقپەن، التىن ۇياسىنا دەگەن ساعىنىشپە كەلەتىنىنە سەنىمدىمىز.

قازتاي جانەركە جاندوسقىزى

Abai.kz