بەيسەنبى, 19 قاراشا 2026
82 0 پىكىر 19 قاراشا, 2026 ساعات 18:14

بەيبىت يساباەۆ: «تالدىقورعاننىڭ ساۋلەتتىك كەلبەتىن جاڭارتۋدى كەشەندى تۇردە قاراستىرامىز»

سۋرەت: gov.kz سايتىنان الىندى

جەتىسۋ وبلىسىنىڭ كىندىك قالاسى - تالدىقورعان قالاسىندا وبلىس ورتالىعىنىڭ ساۋلەتتىك-كوركەمدىك كەلبەتىن جاقسارتۋ جوباسى جالعاسۋدا. وبلىس قۇرىلعاننان بەرى قالادا 130 اۋلا كۇردەلى جوندەۋدەن وتكىزىلىپ، 113 كوپقاباتتى تۇرعىن ءۇيدىڭ شاتىرى، 44 كوپقاباتتى ءۇيدىڭ قاسبەتى جوندەلدى. قالاداعى جۇمىستاردىڭ بارىسىمەن جانە قالالىق ورتانى ودان ءارى جاڭارتۋ جوسپارلارىمەن وبلىس اكىمى بەيبىت يساباەۆ قالانى ارالاۋ بارىسىندا تانىستى.

اتاپ ايتقاندا، بيىل جانسۇگىروۆ كوشەسىنىڭ بويىنداعى 24 كوپقاباتتى تۇرعىن ءۇيدىڭ قاسبەتى جانە 7 ءۇيدىڭ شاتىرى جوندەلدى. كەلەسى كەزەڭدە نازارباەۆ داڭعىلىنىڭ بويىندا ورنالاسقان كوپپاتەرلى تۇرعىن ۇيلەردىڭ قاسبەتتەرى ساۋلەتتىك-كوركەمدىك تۇرعىدا بەزەندىرىلىپ، شاتىرلارى جوندەلەدى.

 

- تالدىقورعاننىڭ ءۇش ۇزىن كوشەلەرى - قابانباي باتىر، جانسۇگىروۆ كوشەلەرى مەن نازارباەۆ داڭعىلى. بيىل جانسۇگىروۆ كوشەسىن اباتتاندىردىق. جۇمىسقا كەشەندى تۇردە كىرىستىك: الدىمەن ماگيسترالدى جىلۋ جەلىسىن رەكونسترۋكتسيالادىق، سودان كەيىن اسفالت توسەلدى. سونىمەن قاتار كوشە بويىنداعى كوپقاباتتى تۇرعىن ۇيلەردىڭ قاسبەتتەرى مەن شاتىرلارى جوندەلدى. ەندى كەلەسى جىلى نازارباەۆ داڭعىلىن اباتتاندىرۋدى جوسپارلاپ وتىرمىز. قاسبەتتەردى جاڭارتۋدىڭ بىرىڭعاي ءتاسىلى ايقىندالدى: بەس قاباتقا دەيىنگى ۇيلەر قاپتالادى، ال بەس قاباتتان جوعارى عيماراتتار ساپالى، سۋعا ءتوزىمدى ماتەريالدارمەن بويالادى. جالپى، 36 ءۇيدىڭ قاسبەتى، سونداي-اق قاجەتتىلىگىنە قاراي 13 ءۇيدىڭ شاتىرى جوندەلەدى، - دەدى ب. يساباەۆ.

كوپقاباتتى تۇرعىن ۇيلەردىڭ قاسبەتتەرى مەن شاتىرلارىن جاڭارتۋمەن قاتار جول جابىنىن جوندەۋ دە كوزدەلگەن. اتاپ ايتقاندا، كەلەسى جىلى نازارباەۆ داڭعىلىنىڭ ورتالىق الاڭنان اينالما جولعا دەيىنگى بولىگى، سونداي-اق جانسۇگىروۆ كوشەسىنىڭ گاگارين كوشەسىنەن اينالما جولعا دەيىنگى ارالىعى جانە كوپىرگە دەيىنگى قالعان بولىگى جوندەلەدى. ال قابانباي باتىر كوشەسى بىلتىر جوندەلگەن.

- وسىلايشا، جۇيەلى قاراستىرۋ ارقىلى قالانىڭ ءۇش نەگىزگى كوشەسىن كەزەڭ-كەزەڭىمەن بىرىڭعاي ساۋلەتتىك كەلبەتكە كەلتىرەمىز. بۇل جول ينفراقۇرىلىمى مەن تۇرعىن ءۇي قورىن جاقسارتىپ قانا قويماي، تالدىقورعاننىڭ ورتالىق بولىگىنىڭ سىرتقى كەلبەتىن كەشەندى تۇردە جاڭارتۋعا مۇمكىندىك بەرەدى، - دەدى ب. يساباەۆ.

جۇمىس ساپارىنىڭ سوڭىندا ءوڭىر باسشىسى قالا اكىمىنە قالانىڭ ساۋلەتتىك كەلبەتىن كەشەندى تۇردە جاڭارتۋ جۇمىستارىن جالعاستىرۋدى تاپسىردى. جوسپارلانعان شارالاردى جۇزەگە اسىرۋ ورتالىق كوشەلەرگە بىرىڭعاي زاماناۋي كەلبەت بەرىپ، قالالىق ورتانىڭ ساپاسىن جاقسارتۋعا جانە تۇرعىندار ءۇشىن قولايلى جاعداي جاساۋعا وڭ ىقپالىن تيگىزبەك.

Abai.kz

0 پىكىر