رەسەيدىڭ كورشىلەرىنە ساياسي بوپساسى مەن قىسىمى توقتار ەمەس. كەرىسىنشە "نە بىزبەنسىڭ، نە بىزگە قارسىسىڭ" پوزيتسياسى كۇشەيە ءتۇستى. بەيتاراپتىق ماسكەۋدىڭ پىكىرىنشە ەندى قاراما-قايشىلىق نە قارسىلاستى جاقتاۋ بولىپ سانالماق. 

بۇگىن رەسەي كاسپي قۇبىر كونسورتسيۋم جۇمىسىن سوت شەشىمى بويىنشا 30 كۇنگە توقتاتۋعا شەشىم قابىلدادى. نوۆوروسسيسك اۋداندىق سوتى تەڭىز تەرمينالىنان  روسترانسنادزور تاپقان كەمشىلىكتەردى تۇزەۋگە وسىنشا ۋاقىت كەتەدى دەيدى. تەكسەرىس مۇنايدى جەتكىزۋ بارىسىندا تەڭىزگە قالدىقتاردىڭ توگىلۋىنە بايلانىستى ىسكە اسقان دەگەن اقپارات بار.

كاسپي كونسورتسيۋمى قازاقستان ءۇشىن مۇناي ەكسپورتتاۋدىڭ باستى مارشرۋتى سانالادى. ەلىمىزدىڭ مۇنايىنىڭ 80% وسى باعىت ارقىلى جونەلتىلەدى. بۇل قۇبىر جىلىنا  67 ملن توننا مۇناي جەتكىزۋگە قابىلەتتى. قۇبىر جۇمىسىنىڭ ءتىپتى ءبىر كۇندىك جۇمىسىنىڭ ءوزى قازاقستان ەكونوميكاسىنا وراسان سوققى دەگەن ءسوز.

بۇل كاسپي كونسورتسيۋمى قۇبىر جولىنىڭ جۇمىسىنا بايلانىستى شىعىپ تۇرعان العاشقى شيكىلىك ەمەس. ناۋرىز ايىندا ءدال وسى قۇبىر جولىندا مۇناي تاسىمالداۋ جۇمىستارىنا توقتاتىلدى. باستى سەبەپ رەتىندە تەڭىزدەگى داۋىل اسەرىنەن قۇبىرعا زاقىم كەلگەنى ايتىلدى. ونداعان جىلدار بويى داۋىل مەن بورانعا توتەپ بەرگەن مۇناي قۇبىرى، ۋكراينا مەن رەسەي اراسىنداعى سوعىس باستالعان ساتتە، ىستەن شىعۋى دا كۇتىكدى.

اراعا ايلار سالىپ قۇبىر جۇمىسى تاعى دا ءبىرشاما ۋاقىتقا توقتادى. وعان تەڭىزدە ەكىنشى جاھان سوعىسىنان قالعان تەڭىز مينالارىنىڭ سۋ بەتىنە قالقىپ شىعۋى سەبەپكەر بولدى. نەتكەن سايكەستىك؟...

مىنە، ەندى ءۇشىنشى مارتە قۇبىر جۇمىسى توقتاتىلماق. باقانداي ءبىر ايعا. بۇل ارينە 30 كۇنمەن شەكتەلمەۋى دە مۇمكىن. رەسەي ءدال وسىنداي "سەبەپتەرمەن" قۇبىر جۇمىسىن توقتاتۋدى جيىلەتىپ، ساياسي قىسىمدى دا ارتتىرعان سىڭايلى. "رەسەي ورتالىق ازياداعى ءوز ىقپالىنىڭ تومەندەۋىنەن سەسكەنەدى، سوندىقتان دا ءتۇرلى قىسىم جاساۋ رىچاگتارىنىڭ بار ەكەنىن وا ەلدەرىنىڭ ەسىنە وقتىن-وقتىن سالۋدا" دەيدى ساراپشىلار.

Abai.kz