قازاقستاندىق كاسىپكەر مارعۇلان سەيسەمباەۆ ۋكراينا ءجۋرناليسى دميتري گوردونعا بەرگەن سۇحباتىندا رەسەيدىڭ ۋكرايناعا اشقان سوعىسى قازاقستانداعى ورىستاردى رەسەيگە قارسى قويدى دەپ ەسەپتەيتىنىن ايتتى. ول قازاقستانننىڭ وڭتۇستىگىندەگى ورىستاردان گورى رەسەيگە جاقىن سولتۇستىكتەگى ورىستارعا كوبىرەك الاڭدايدى ەكەن.

«ۋايىم بار. قازاقستاننىڭ وڭتۇستىگىنەن گورى سولتۇستىگى ۋايىمداتادى. مەن جاقىندا قازاقستاننىڭ سولتۇستىگى مەن سولتۇستىك-شىعىسىنا بارىپ، كوپتەگەن ورىس جىگىتتەرىمەن سويلەستىم. ۋكرايناعا قاتىستى جاعداي، سانكتسيالار، ديكتاتۋرا، كەدەيلىك، رەسەيدىڭ قۇردىمعا كەتۋى قازاقستاندا تۇراتىن ورىستاردى قاتتى قورقىتتى»، - دەيدى كاسىپكەر.

سەيسەمباەۆ ءسوز اراسىندا قازاقستانداعى ورىستاردىڭ كوبى قازاق ءتىلىن ۇيرەنىپ، وزدەرىن «قازاقپىز» دەپ سانايتىندارىن  ايتتى.

«كوپتەگەن ورىستار «ءبىز قازاقستاندىقپىز، ءبىز قازاقپىز» دەيدى. ولار رەسەيدىڭ جاعدايىن كورىپ وتىر. دەگەنمەن بولمىسى مەن ساناسى قازاقپەن بىرگە. ولار رەسەيدە اقشاسىن شىعارا الماي، جيناپ-تەرگەندەرىنەن، جۇمىسىنان ايىرىلعان تۋىستارىنىڭ جاعدايىنا كۋا. رەسەيدەگىلەر ءتىپتى شەتەلگە شىعىپ دەمالا المايدى، ولارعا ۆيزا بەرمەيدى، ۇشاقتار ۇشپايدى»، - دەدى كاسىپكەر.

ول بەلگىلى كومپانيالار رەسەيدەن جاپپاي كوشىپ كەتكەننەن كەيىن رەسەيلىكتەر قازاقستانعا شوپينگ تۋرلارمەن كەلە باستاعانىن بايقاعان.

«بىزدە قاۋىپسىزدىك بار.  قازاقستان قازىردىڭ وزىندە ولار ءۇشىن... جارايدى، دۋباي ەمەس، بىراق بارلىق برەندتەر بار، ورىسشا سويلەيتىن ەل»، - دەدى سەيسەمباەۆ.

ۋكراينادا بولىپ جاتقان وقيعالاردى كورگەننەن كەيىن قازاقستانداعى ورىستار رەسەي ءبىزدى دە «ازات ەتكىسى كەلۋى مۇمكىن» دەپ قورىقتى.

«مەن سولتۇستىككە بارىپ كورگەننەن كەيىن قازاقستاننىڭ سولتۇستىگىندەگى ورىستار رەسەيدى ەمەس قازاقستاندى تاڭداپ تۇرعانىنا كوزىم جەتتى. ءبىز ەلىمىزدەگى ورىستاردىڭ رەسەيلىك ورىستاردان باسقا ەكەنىن ۇعۋىمىز كەرەك. مەنىمەن كەلىسپەيتىندەر بار شىعار، بىراق ءبىزدىڭ ورىستار رەسەيلىك ورىستار ەمەس. ولار ۇگىت-ناسيحاتپەن ۋلانباعان»، - دەيدى سەيسەمباەۆ.

«بۇل جەردەگى پارادوكسالدى جاعدايعا نازار اۋدارۋعا بولادى. رەسەي پرەزيدەنتى پۋتين ناتو-دى ىعىستىرۋعا تىرىستى، ال ناتو، كەرىسىنشە، ونى قورشاپ الدى. پۋتين دونباستاعى «ورىستاردى قورعايمىن» دەدى، ناتيجەسىندە قازاقستاننىڭ سولتۇستىگىندە ورىستاردى وزىنەن الىستاتتى. سولتۇستىك قازاقستانداعى ورىستار حاركوۆتاعى، دونباستاعى ورىستاردىڭ باسىنان وتكەن جاعدايدى كورىپ، شوشىندى. مەنىڭ ويىمشا، ءبىزدىڭ ورىستار مۇنى قالامايدى»، - دەپ قورىتىندالادى سەيسەمباەۆ.

Abai.kz