قازاقستاندا جاڭا كونستيتۋتسيا اياسىندا بيلىك ينستيتۋتتارىن قايتا جاساقتاۋدىڭ ماڭىزدى كەزەڭى باستالدى. مەملەكەت باسشىسى قاسىم-جومارت توقاەۆ قۇرىلتاي توراعاسى لاۋازىمىنا ايبەك دادەبايدىڭ كانديداتۋراسىن ۇسىنىپ، ۇكىمەتتىڭ وتستاۆكاعا كەتۋى تۋرالى جارلىققا قول قويدى.

«جوعارىدا اتاپ ءوتىم، جاڭا كونستيتۋتسياعا سايكەس بيلىك ينستيتۋتتارىن جاساقتاۋ جۇمىسىن باستاۋ ءۇشىن ءبىز بىرقاتار ءراسىمدى وتكىزۋىمىز كەرەك.

ەڭ الدىمەن، قۇرىلتايدىڭ باسشىلىق قۇرامىن سايلاپ، قۇرىلىمىن قالىپتاستىرۋ قاجەت. وزدەرىڭىزگە ءمالىم، كونستيتۋتسيانىڭ 57-بابىنا سايكەس قۇرىلتاي توراعاسىنىڭ لاۋازىمىنا كانديداتۋرانى پرەزيدەنت ۇسىنادى.

مەن جاۋاپكەرشىلىگى زور بۇل لاۋازىمعا ايبەك ارقابايۇلى دادەبايدىڭ كانديداتۋراسىن ۇسىنامىن.

سىزدەر بۇل تۇلعانى جاقسى بىلەسىزدەر. ول مەملەكەتتىك باسقارۋ جۇيەسىندە كوپ جىل قىزمەت ەتتى. تاجىريبەسى مول دەپ ايتۋعا بولادى. ءوزىنىڭ ءبىلىمدى، وتانشىل، ادال ازامات ەكەنىن ناقتى ىستەرىمەن دالەلدەدى.

سوندىقتان ونى وسى لاۋازىمعا لايىق دەپ سانايمىن. قۇرىلتاي دەپۋتاتتارىنان ايبەك ارقابايۇلى دادەبايدىڭ كانديداتۋراسىن قولداۋدى سۇرايمىن»، — دەدى پرەزيدەنت.

دادەباي بۇعان دەيىن پرەزيدەنت اكىمشىلىگىن باسقارىپ، كەيىن قىزمەتىنەن كەتكەن. ارتىنشا جاڭادان قۇرىلعان بيلىكشىل «ادىلەت» پارتياسىنا توراعا بولدى.

بۇگىن رەسمي تۇردە انت بەرگەن سوڭ، قۇرىلتاي دەپۋتاتتارى پارلامەنت سپيكەرى ەتىپ ايبەك دادەبايدى تاڭدادى. 

Abai.kz