مەديتسينالىق كادرلارعا دەگەن تاپشىلىق قوستاناي قالاسى تۇرعىندارى ءۇشىن شەشىلمەيتىن تۇيىنگە اينالعالى قاشان. مۇنداعى جۇرتتىڭ «باسى اۋىرىپ، بالتىرى سىزداسا»، بارىپ كورىنەتىن دارىگەرلەرىن كۇندىز ماي شاممەن ىزدەسەڭ دە تابا المايسىڭ. سوسىن امال جوق، ازداعان تيىن-تەبەنىنەن ۇنەمدەپ، باعاسى اسپانداپ كەتكەن اقىلى ەمحانالاردىڭ ەسىگىن توزدىرۋعا ءماجبۇر. ال جەرگىلىكتى بيلىك مۇنداي پروبلەمانىڭ بار ەكەندىگىنەن مۇلدەم حابارسىز با دەپ قالاسىڭ.  ويكەنى بۇلار ءۇشىن مەديتسينانىڭ جاي-كۇيى اسا ماڭىزدى ماسەلەلەر قاتارىنا جاتپايتىن سەكىلدى.

ماسەلەن، ءبىر كەزدەرى قوستاناي قالالىق اۋرۋحاناسى وزگە وڭىرلەردەن وسىندا مۇلدەم جەتىسپەيتىن ءبىر توپ دارىگەردى پاتەرمەن قامتاماسىز ەتەمىز دەپ انت-سۋ ءىشىپ، جۇمىسقا ارنايى شاقىرعان. ولارمەن بەس جىلعا شارت تا جاساسقان. سونان سوڭ، ولاردىڭ مۇندا بار-جوعىن مۇلدەم ۇمىتقان. قازىر بۇلاردىڭ بارلىعى دا جالدامالى پاتەردەن-پاتەرگە قاڭعىپ، پاتەر اقىسىن ءوز قالتالارىنان تولەپ ءجۇر. بيلىك بولسا، كەزىندە وحدەرى بەرگەن ۋادەلەرىنەن تايقىپ كەتىپ، بۇگىندەرى ەشتەڭە بولماعانداي كەيىپ تانىتادى. ال وزگە وڭىرلەردەن ات ارىلتىپ كەلگەن جاس مامانداردىڭ بۇگىنگى كۇيى كۇي ەمەس. سولاردىڭ ءبىرى – قالاداعى اۋرۋحاناداعى جالعىز گاستروەنتەرەلوگ ايجان زەينەتاي. شەنەۋنىكتەردىڭ سوزىنە قۇدايداي سەنگەن جاس مامان وسىدان ءۇش جىل بۇرىن وتباسىمەن قوستانايعا كوشىپ كەلىپ، كىسى ەسىگىندە كۇن كورىپ جاتىر. ايلىعىنىڭ جارتىسىنان استامى جالدامالى پاتەر اقىعا كەتەدى.

«مەن مينيسترلىككە دە ارنايى حات جازىپ ەدىم. الايدا «قازىر پاندەميا، سوندىقتان اقشا جوق، ودان مۇلدەم دامەتپەڭدەر» دەگەن جاۋاپ الدىق. سوندا مۇنى قالاي تۇسىندىك؟ ءبىز ءبارىن تاستاپ، وسىندا كوشىپ كەلدىك. مىنە، ءۇش جىلدان بەرى ادال قىزمەت اتقارىپ كەلەمىز»، - دەيدى ايجان زەينەتاي.

مۇنداي اۋىرتپالىقتى ايجانمەن قاتار تاعى دا ءۇش دارىگەر – گينەكولوگ، ترامۆاتولوگ پەن ۋرولوگ تا باستان كەشىپ وتىر. ولاردىڭ بارلىعى دا «پاتەرمەن قارق قىلامىز» دەگەن ۋادەگە سەنىپ كەلگەن.

«ءبىز ەشتەڭەنى دە تەگىن سۇرامايمىز. بىزگە پاتەردى جەڭىلدىكپەن بەرسە دە جارايدى. «وتباسى بانكىدە» دە بولدىق. بۇلاردان پاتەر الۋ ءۇشىن بىردەن سول پاتەردىڭ قۇنىنىڭ 50 پايىزىن تولەۋ قاجەت كورىنەدى. ول اقشانى قايدان تابامىز»، - دەيدى گينەكولوگ-دارىگەر نازرۋللو ءتالىپوۆ.

ءبىز، ارينە، وسى قالالىق اۋرۋحانانىڭ باسشىلىعى قۋراي باسىن دا سىندىرىپ وتىرعان جوق دەۋدەن اۋلاقپىز. الايدا، ولاردىڭ دا قولى قىسقا. باس دارىگەر دانيار جانداەۆتىڭ ايتۋىنا قاراعاندا مۇندا پاتەرگە مۇقتاج دارىگەرلەردىڭ سانى جيىرمادان اسىپ جىعىلادى. ولاردىڭ تورتەۋىنىڭ جاعدايى ادام توزگىسىز.

«ءبىز بىلتىرعى جىلدىڭ تامىز ايىنا دەيىن بۇلاردىڭ پاتەر اقىسىن تولەپ كەلدىك. الايدا ءبىز كەيىن ينفەكتسيالىق ستاتسيونارعا اينالعاننان كەيىن اقىلى قىزمەت كورسەتىپ، ءوزىمىز اقشا تابا المايمىز. سوندىقتان دا بۇگىنگى تاڭدا پاتەر اقىسىن تولەۋگە مۇمكىندىگىمىز جوق»، - دەيدى باس دارىگەر.

وبلىستىق دەنساۋلىق ساقتاۋ باسقارماسىنان دا ءۇمىت شامالى بولىپ تۇر. ولار «دارىگەرلەرگە كومەك كورسەتۋگە ەش مۇمكىندىگىمىز جوق» دەگەندى اشىق ايتىپ وتىر. پاتەرلەر سوڭعى كەزدەرى تىم قىمباتتاپ كەتكەن كورىنەدى. ال قازاقستاننىڭ يپوتەكالىق كومپانياسى تۇرعىن ۇيلەردى ارزانداۋ باعامەن بەرۋگە مۇلدەم كەلىسپەيدى. «بىلاي تارتساڭ اربا سىنادى، بىلاي تارتساڭ وگىز ولەدىنىڭ» كەرى كەلىپ تۇر.

ال الگى دارىگەرلەر بولسا، مۇلدەم تىعىرىققا تىرەلگەن جايى بار. ويتكەنى ولار اۋرحانامەن بەس جىلعا شارت جاساسقان. وسى مەرزىم بىتپەي ولار ەشقايدا دا كەتە المايدى. ەندى  بەس جىل قاشان بىتەدى دەپ سارعايا كۇتىپ وتىر. سويتە تۇرا، مۇندا جاڭاعىداي ماماندار عانا ەمەس، قاراپايىم تەراپەۆت سەكىلدى ماماندارعا دەگەن زارۋلىك وتە كوپ.

ال ەندى قالا تۇرعىندارىنىڭ مۇنداي مۇشكىل ءحالى قالا باسشىلىعىن دا، وبلىس باسشىلىعىن دە اسا تولعاندىرا قويمايتىن سەكىلدى. بۇلار «جاڭا قازاقستاندا» ەمەس، بۇرىنعى، وزدەرىنە اسا قولايلى «ەسكى قازاقستاندا» ءومىر سۇرگەندى قالايتىن ءتارىزدى. الدە وسى سولتۇستىك وڭىردە قازاقتاردىڭ، ونىڭ ىشىندە جاس كادرلاردىڭ كوبەيىپ، قاتارىمىزدىڭ مولايعاندىعى بىرەۋلەردىڭ ءتۇن ۇيقىسىن ءتورت ءبولىپ، ىشكەن اسى بويىنا تارامايدى ما ەكەن؟ ەگەر ازعانتاي عانا ماماندارعا وسىلاي قاراساق، كۇنى ەرتەڭ وسى تەرىستىك وڭىرلەردى قايتىپ قازاقتاندىرامىز؟

جايبەرگەن بولاتوۆ

Abai.kz