بالالاردىڭ دەنساۋلىعىن جاقسارتۋ ماقساتىندا ەلىمىزدىڭ ەڭ ءىرى مەگاپوليسىندە بالالار دەنساۋلىعىن وڭالتۋعا بايلانىستى ءتۇرلى شارالار ۇيىمداستىرىلادى. قالادا بالالارعا مەديتسينالىق كومەك كورسەتۋ ورتالىقتارىنىڭ سانى جەتكىلىكتى. ولار ساپالى قىزمەت كورسەتۋدە. 

الماتىداعى «بالالار شۇعىل مەديتسينالىق جاردەم ورتالىعىنان» جارتى جىلدا 10 مىڭعا جۋىق ءبۇلدىرشىن ەمدەلىپ شىققان. بۇل تۋرالى مەكەمە قىزمەتكەرلەرى ءمالىم ەتتى.

دارىگەرلەر سوڭعى ۋاقىتتا ناۋقاستاردىڭ جيىلەي تۇسكەنىن دە جاسىرمادى. سوڭعى مەديتسينالىق ۇلگىدەگى قۇرىلعىلارمەن جابدىقتالعان اۋرۋحانا بىلىكتى مامانداردىڭ كومەگىمەن ەڭ قيىن وتالاردى جاساپ ءجۇر.

الماتىلىق اينۇر اقىلبەك ۇلىن بالالار اۋرۋحاناسىنا ەكىنشى رەت اكەلىپ وتىر. سەبەبى جاسى 2-گە دە تولماعان ارسلانعا جەدەل ىشەك وتىمسىزدىگى دياگنوزى قويىلعان. اناسىنىڭ سوزىنشە، اس باتپاعان سوڭ بالادا ءال قالماي، شۇعىل مەديتسينالىق كومەك قاجەت بولعان.

«بالامنىڭ قۇسا باستادى. ۇلكەن دارەتى جاسىل ءتۇستى بولعاندىقتان، اۋرۋحاناعا كەلدىك. ماعان №2 اۋرۋحاناعا بارسىن دەگەن، بىراق مەن وسى جەرگە كەلدىم. سەبەبى مۇنداعى دارىگەرلەردىڭ تاجىريبەسى مول»، – دەدى قالا تۇرعىنى اينۇر اقىلبەك.

حيرۋرگ ساماتبەك مىرزاحمەتتىڭ سوزىنشە، اۋرۋحاناعا تۇسكەن نارەستەلەردىڭ كوبىندە تۋا بىتكەن دامۋ اقاۋلارى ءجيى بايقالعان. سوندىقتان دارىگەرلەر ەم-دوم الۋعا كەلگەن ءار بالانى تولىق قاراپ شىعادى. دەرت انىقتالعان جاعدايدا دياگنوز قويىپ، مىندەتتى تۇردە وتا جاسايدى.

«بيىل 6 اي ىشىندە بىزگە 30 نارەستە ءتۇستى، 27 نارەستەدە تۋا بىتكەن دامۋ اقاۋى انىقتالدى. ونىڭ ىشىندە وڭەشتىڭ، اسقازان، ىشەك جولدارىنىڭ دامۋ اقاۋى بار»، – دەدى بالالار شۇعىل مەديتسينالىق جاردەم ورتالىعىنىڭ ءبولىم مەڭگەرۋشىسى ساماتبەك مىرزاحمەت.

دارىگەر نارەستەلەر اراسىندا ءولىم-ءجىتىم سانى ەداۋىر ازايعانىن ايتادى. قالاداعى بالالار اۋرۋحاناسىنىڭ ءوزى سوڭعى مەديتسينالىق ۇلگىدەگى قۇرىلعىلارمەن جابدىقتالىپتى.

دارىگەرلەردىڭ دەرەگىنشە، بۇل اۋرۋحاناعا كۇنىنە، ورتا ەسەپپەن، 300-دەي بالا كەلسە، 40 ناۋقاس ەم الۋعا جاتقىزىلادى.

Abai.kz