سوڭعى ايلاردا كوپشىلىكتى «رەسەي پرەزيدەنتى پۋتين يادرولىق قارۋى بار ناتو ەلدەرىمەن قاقتىعىسقا تۇسە مە»، - دەگەن سۇراق قىزىقتىردى. وسىدان ون جىل بۇرىن ءدال وسىنداي يادرولىق قاقتىعىس تۋرالى سۇراق كۇلكىلى بولماق تۇگىلى، ابسۋرد بولىپ كورىنەتىن. قازىر پۋتين وزگەنگەن. ناتو شەندىلەرى رەسەي كونستيتۋتسياسىنىڭ كەپىلى سانالاتىن ۆلاديمير پۋتين يادرولىق قاقتىعىستى وپ-وڭاي ۇيىمداستىرا الادى دەپ الاڭدايدى.

رەسەي ۋكرايناعا سوعىس اشقان اقپان ايىنىڭ اياعىندا نەمەسە ناۋرىزدىڭ باس تۇسىندا پۋتين يادرولىق قارۋعا قول جۇگىرتۋى مۇمكىن بولىپ كورىنسە، قازىر جاعداي وزگەشە. ءپۋتيننىڭ ەندى يادرولىق قارۋعا ارقا سۇيەي قويۋى ەكىتالاي. مۇنىڭ بىرنەشە سەبەبى بار.

ءبىرىنشى سەبەپ – ءپۋتيننىڭ سىرتقى ساياساتىنىڭ نەگىزى – بوس بىلشىل (بلەف). ءسىز ۇزاق ۋاقىت «بلەف» جاساي الاسىز، بىراق، ۋاقىت وتكەن سايىن ولار سىزگە سەنۋدەن قالادى. پۋتين «رەسەيلىكتەرمەن بىرگە جۇماققا بارۋعا» دايىن ەكەنىن ايتتى. بىراق، قازىر ول ءوزىنىڭ وسى ءسوزىن ۇمىتتى. ءارى ءوزى دە جۇماققا ۇمتىلمايتىنى انىق.

ەكىنشى سەبەپ – ۋكراينا جورىعى رەسەي ارمياسىنىڭ السىزدىگى مەن وسالدىعىن كورسەتتى. بەس ايدان استام ۋاقىت ءوتتى. كرەملدىڭ اۋەلدەگى جوسپارىنىڭ تاس-تالقانى شىقتى. ال ۋكرايندار بىرتىندەپ رەسەي قورعانىسىن زەرتتەي باستادى. قارسى شابۋىلعا دايىندالۋدا.

ءۇشىنشى سەبەپ – اقش-تىڭ ەسكەرتۋى. پۋتين يادرولىق سوعىس تۋرالى ايتا باستاعاننان كەيىن اقش-تان ەسكەرتۋ الدى. اقش ءباسپاسوزى جازعانداي، پۋتين تاكتيكالىق يادرولىق قارۋ قولدانىلعان جاعدايدا ونىڭ رەسەي اۋماعىنداعى بارلىق بۋنكەرلەرى جويىلاتىنىن ەسكەرتىلدى. ال رەسەي اۋماعىندا ونداي بۋنكەرلەردىڭ ونشاقتىسى بار.

ءتورتىنشى سەبەپ – رەسەي ارمياسىنىڭ كۇش-قۋاتى، جەڭىلمەيتىندىگى تۋرالى قالاعانىڭىزشا ايتۋعا بولادى. بىراق ۋكرايناداعى سوعىس بۇل دوكتريناعا كۇمان كەلتىرەدى. سونىمەن قاتار، ناتو اسكەرلەرىنىڭ كۇشى جويىلعان جوق. «الەمنىڭ ەكىنشى ارمياسى» دەپ اتالاتىندار ناتو اسكەرىمەن كۇش سىناسقىسى كەلۋى ەكىتالاي.

وسىلايشا، ءپۋتيننىڭ « قىزىل تۇيمەنى باسۋعا» باتىلى بارمايدى. ءپۋتيننىڭ ءوزىن-ءوزى ساقتاۋ ينستينكتى جەتكىلىكتى دامىعاندىقتان، ونىڭ يادرولىق ماسەلەدە باسقا ەلدەردىڭ كۇشىن سىناۋى ەكىتالاي.

كەرىمسال جۇباتقانوۆ

Abai.kz