رەسەيدىڭ ۋكرايناعا باسىپ كىرگەنىنە 5 ايدان استى. رەسەي حالقى بۇل سوعىستى قولدايدى جانە ولاردىڭ سانى از ەمەس دەيدى ساراپشىلار. سوعىس باستالعان ساتتە، ءپۋتيننىڭ اگرەسسيالىق ارەكەتىن 86 پايىز حالىق قولداعان-مىس. بۇل وتە جوعارى كورسەتكىش سانالادى. 

اراعا التى ايعا جۋىق ۋاقىت سالىپ، رەسەيلىكتەردىڭ سوعىسقا قاتىستى كوزقاراسىن سۇراپ، ساۋالناما جۇرگىزىپتى. ءپۋتيننىڭ "كيەۆكە قايتا شابۋىل جاساۋ" تۋرالى شەشىمى بولسا، ءداپ قازىر ونى رەسەيلىكتەردىڭ 60% قولداپ، 26% رەسەيلىك قارسى بولار ەدى. ساۋالناما ناتيجەسى سولاي دەيدى.

ال سوعىستى توقتاتۋ تۋرالى شەشىمدى، رەسەيلىكتەردىڭ تىلىمەن ايتساق ارنايى وپەراتسيانى اياقتاۋدى 65% رەسەيلىك قولداپ، ال 28% رەسەيلىك قارسى بولار ەدى. جالپى اسكەري قيمىلدى جالعاستىرۋ كەرەك دەيتىندەردىڭ سانى باسىم بولىپ تۇر. ساۋالناماعا سۇيەنسەك 52% رەسەيلىك سوعىستى جالعاستىرۋ كەرەك دەيدى، 38% رەسەيلىك بەيبىت كەلىسىمگە كەلۋ جولدارىن قاراستىرۋ قاجەتتىگىن ايتادى.

ارنايى وپەراتسيانى رەسپوندەنتتەردىڭ 69 پايىزى قولداسا، 23 پايىزى قولدامايدى. ناۋرىزدىڭ ورتاسىنان شىلدەنىڭ اياعىنا دەيىنگى ارالىقتا ارنايى وپەراتسيانى قولداۋشىلار مەن قارسىلاردىڭ اراقاتىناسى ءىس جۇزىندە وزگەرىسسىز قالدى.

رەسەيلىكتەردىڭ 62%-ى ارنايى وپەراتسيانىڭ ءساتتى ءوتىپ جاتقانىنا سەنىمدى. قاراما-قارسى پىكىردى 19% ادام ۇستانادى ەكەن. رەسەيلىكتەردىڭ 59%-ى رەسەيدىڭ ۋكرايناداعى ارنايى اسكەري وپەراتسياسى "ۇزاققا سوزىلدى" دەپ ەسەپتەيدى. رەسپوندەنتتەردىڭ 41%-ى "ۋكرايناداعى اسكەري وپەراتسيانىڭ بارىسى تۋرالى جاڭالىقتاردان شارشاعانىن" مويىندادى، بىراق ولاردىڭ 56% ولاي ەمەس دەگەن ويدا.

رەسپوندەنتتەردىڭ 30%-ى ۋكرايناداعى ارنايى وپەراتسيا ءبىر جىلدان استام جالعاسادى دەسە، 18%-ى سوعىس قيمىلدارى ءبىر جىلدىڭ ىشىندە اياقتالادى دەپ ەسەپتەيدى. رەسپوندەنتتەردىڭ 20%-ى سوعىستى التى اي ىشىندە اياقتاۋعا ۇمىتتەنەدى. رەسپوندەنتتەردىڭ 13 پايىزى سوعىس قيمىلدارىنىڭ ءبىر-ءۇش ايدىڭ ىشىندە اياقتالۋىن كۇتىپ وتىر ەكەن.

ساۋالناماعا قاتىسقان ەر ادامداردىڭ 62%-ى ۋكرايناداعى سوعىس قيمىلدارىنا جەكە قاتىسۋعا دايىن ەمەس، مامىر ايىندا سوعىسقا قاتىسۋعا دايىن ەمەستەردىڭ سانى 56%-دى قۇراعان بولاتىن، ياعني ولاردىڭ سانى ارتقان دەگەن ءسوز. رەسپوندەنتتەردىڭ 29%-ى ارنايى وپەراتسياعا قاتىسۋعا نيەت بىلدىرگەن، مۇنى كوبىنەسە 45 پەن 59 جاس ارالىعىنداعى ادامدار ايتقان، ال 18 بەن 29 جاس ارالىعىنداعى ەرلەردىڭ سانى ازداۋ. 67 پايىزى ارنايى وپەراتسيانى قولداۋ ءۇشىن ءوز قاراجاتىن بەرۋگە دايىن ەمەس، ال 12 پايىزى ايىنا 1000 رۋبلدەن بەرىپ تۇرۋعا دايىن.

ساۋالنامانىڭ ناتيجەسىنە قاراپ، ءالى دە رەسەيلىكتەردىڭ اگرەسسيانى ناقتى قولدايتىنىن تۇسىنۋگە بولادى. رەسەيگە سالىنعان سانكتسيالار رەسەي بيلىگىن دە، حالقىن دا اگرەسسيالىق كوزقاراستان جاقىن ارادا ايىقتىرا المايتىن سياقتى.

Abai.kz