وسىدان بىرنەشە جىل بۇرىن عانا رەسەيدىڭ وككۋپانت بيلىگى قىرىمدى «ءجۇز پايىز قورعالعان، ەشقانداي قاۋىپ توونبەيتىن، تىنىش ءارى گۇلدەنگەن كۋرورتتىق ايماق» رەتىندە الەمگە جار سالىپ، ماقتانىشپەن جارنامالايتىن ەدى.

ال بۇگىن ءبارى وزگەرگەن. جوعارىداعى سۇلۋ سوزدەردىڭ بارلىعى دەرلىك ساعىمعا اينالعان. ۋكراينا قىرىمدى مىقتاپ قىسپاققا الۋدا. لوگيستيكاعا كۇن سايىن سوققى جاساۋدا. ەلەكتر ەنەرگياسى تاپشى. ۋكراينانىڭ وت تۇمسىقتى تەمىر قۇستارى قىرىمداعى ەلەكتر ستانتسيالارىن اياۋسىز توپەشتەپ جاتىر. جانارماي تاپشىلىعى ءورشي تۇسكەن. قىرىمعا اپاراتىن قۇرلىق جولدارى سوققىدان كوز اشپاي وتىر. ءتىپتى، تۇبەككە جانارمايدى تانكەرلەر ارقىلى تاسۋ دا مۇڭعا اينالدى. ۋكراينا قارا تەڭىز بەن ازوۆ اسپانىندا «اڭشىلىق ناۋقانىن» باستاپ، كوزگە كورىنگەن تانكەردى تەسىپ تۇسۋدە. بۇنىڭ ءبارى قىرىم حالقىنىڭ ىعىرىن شىعارىپ، تىرشىلىگىن تۇرالاتقان.

«The Guardian» وسىنداي بەيشارا كۇيدەگى قىرىم تۋرالى كەرەمەت ءبىر سيۋجەت جاساپتى. سول ماقالادا ەۆپاتورياداعى شاعىن قوناقۇيلەر مەن دەمالىس ورىندارىن باسقاراتىن مارينا ەسىمدى كاسىپكەر ايەل زار جىلاپتى. «بيىلعى جاز ماۋسىمىنىڭ استاڭ-كەستەڭى شىقتى. قوناق ۇيلەر قاڭىراپ بوس قالدى. تۋريستەر جوق. تىرشىلىك توقتادى»، - دەيدى.

شىنى سولاي. قازىردىڭ وزىندە قىرىمدا بەنزين جوق، كاسىپورىندار مەن دۇكەندەرگە ەڭ قاجەتتى ازىق-تۇلىك ونىمدەرىن جەتكىزۋدىڭ ءوزى مۇڭعا اينالعان. جارىقسىز، سۋسىز...

2014 جىلى قىرىمدى اننەكتسيالاپ العان رەسەيدىڭ ورناتقان «گۇلدەنگەن الەمى» وسى قازىر. ۋكراينا اينالاسى 1 اپتانىڭ ىشىندە قىرىمداعى «گۇلدەنگەن الەمنىڭ» بىت-شىتىن شىعارا ءبىلدى.

جاڭاعى مارينا باستاعان قىرىمداعىلاردىڭ وزدەرى قازىر: «بىزگە 12 جىل بويى قىرىم 100 پايىز قورعالعان دەپ ايتىپ كەلدى. ال ءبىر ايدىڭ ىشىندە ءبىزدى تاس داۋىرىنە قايتا اپارىپ تاستادى: جارىق جوق، سۋ جوق، جانارماي جوق»، - دەپ ويبايلاۋدا.

ال كرەمل تاعايىنداعان جەرگىلىكتى بيلىك وتكەن ايدا رەسمي تۇردە توتەنشە جاعداي جاريالاپ، اسكەري تەحنيكا مەن شۇعىل قىزمەتتەردىڭ قورىن ساقتاۋ ماقساتىندا جەكە كولىكتەرگە بەنزين ساتۋعا ۋاقىتشا شەكتەۋ قويۋعا ءماجبۇر بولدى. قىرىمنىڭ شامامەن 2,5 ميلليون تۇرعىنىنىڭ 70 پايىزدان استامى جارىقسىز قالعان. «ءبىز قازىر ءومىر ءسۇرىپ جاتقان جوقپىز، ءبىز تەك امان قالۋدىڭ امالىن جاساپ ءجۇرمىز»، – دەيدى جەرگىلىكتى تۇرعىندار.

كرەمل ءۇشىن قىرىم ارقاشان ستراتەگيالىق ماڭىزدى گەوساياسي اۋماقتارىنىڭ ءبىرى بولىپ سانالعان. 2022 جىلى ۋكرايناعا سوعىس اشقاندا ءدال وسى قىرىمدى اسكەري پلاتسدارم ەتكەن. ال قازىر كرەمل قىرىمدى قورعاي الماي، «شاقشاداي باسى شاراداي» بولىپ تۇر.

ال ۋكراينا قىرىمدى نىساناعا الۋ ارقىلى بولاشاق بەيبىت كەلىسسوزدەردە ءوز پوزيتسياسىن ايتارلىقتاي كۇشەيتۋدى كوزدەيدى. كيەۆ ءاۋ باستا قىرىمدى رەسەيدەن وقشاۋلايتىنىن ايتقان. قازىر سونى ىسكە اسىرۋدا قارقىندى تۇردە جۇرگىزۋدە.

اسكەري ساراپشىلاردىڭ پىكىرىنشە، ۋكراينا الداعى اپتالاردا قىرىم كوپىرىنە (كەرچ كوپىرىنە) قارسى شابۋىلدارىن كۇشەيتىپ، تۇبەكتەگى تاپشىلىقتى ودان ءارى ۋشىقتىرۋعا تىرىسۋى مۇمكىن.

نۇرگەلدى ابدىعانيۇلى

Abai.kz