سەيسەنبى, 27 قىركۇيەك 2022
بۇ نە مازاق؟ 2683 24 پىكىر 12 تامىز, 2022 ساعات 15:47

ۇزىناعاش ورىس يمپەرياسىن ءالى ۇلىقتاپ ءجۇر

الماتى وبلىسىنداعى ۇزىناعاش اۋىلىنىڭ بەيىت ماڭىندا تاستان جاسالعان ۇلكەن ەسكەرتكىش ورناتىلعان. تاس باعاندا تاريح قويناۋىندا كەلمەسكە كەتكەن ورىستىڭ يمپەرلىك كوزقاراسىن اشىقتان-اشىق سيپاتتايتىن جازۋلار جازىلعان. بۇل تۋرالى باسپاگەر، پۋبليتسيست باقىتجان بۇقارباي ۆيدەو ۇندەۋىندە ايتىپ بەردى.

«وسىنداي تيپتەگى ستەلالاردى ورىس يمپەرياسى باسىپ العان جەرىنە قوياتىن بولعان. مۇنداعى جازۋى بار تاقتايشالار جاقىندا قويىلعانى كورىنىپ تۇر. تاقتايشانى ورناتقاندار يمپەرشىل كوزقاراستاعى ادامدار دەۋگە بولادى. ويتكەنى جازۋلار 1917 جىلعا دەيىن قولدانىلعان ورىس الىپبيىمەن جازىلعان. قازىرگى الىپبيمەن جازسا ءبىر ءسارى. دەمەك بۇلاردىڭ پيعىلى دۇرىس ەمەس»، - دەدى ول.

باقىتجان بۇقارباي ەسكەرتكىشتىڭ ەكى جاعىنا قويلعان ءتورت تاقتايشاداعى جازۋلاردى وقىپ بەردى.

بىرىندە: «1860 جىلى بولعان ۇزىناعاش شايقاسىندا جەڭىسكە جەتكەنىمىزدىڭ قۇرمەتى ءۇشىن ورناتتىق»، -  دەپ جازسا، ەكىنشىسىنە: «ۆو سلاۆۋ رۋسسكوگو ورۋجيە»، - دەپ، ۇشىنشىسىنە: «ۆ چەست وسۆوبوجدەنيە كازاحسكيح زەمەل وت بلاگودارنوگو نارودا»، - دەپ جازىپتى.

«بۇل ناعىز يمپەريانىڭ كورىنىسى. توبەسىندە بۇركىت ورناتىلعان ستەللا وبەليسكتەردى ورىستار بورودينو شايقاسىندا جەڭگەن كەزدە قويعان. بۇلار ورىس قارۋ-جاراعىنىڭ داڭقى ءۇشىن، اسكەردىڭ داڭقى ءۇشىن دەگەن ماقساتتا ورناتىلادى. ءتورت جاققا قاراتىپ ءتورت زەڭبىرەگىن قويعان»، - دەيدى باسپاگەر.

باقىتجان بۇقارباي بۇل ەسكەرتكىشتەگى جازۋلار قازىرگى قازاق يدەولوگياسىنا مۇلدە جات ەكەنىن ايتتى.

«بۇل نە ماسقارا؟ وزدەرى كەلىپ جەرىمىزدى باسىپ الىپ، «ءبىز قازاق جەرىن بوساتتىق» دەپ، وسىنداي ەسكى، ساسىق پيعىلىن كورسەتەتەىن دۇنيەنى ورناتىپ قويىپتى. بۇل قازىرگى قازاقتىڭ، جاڭا قازاقستاننىڭ يدەولوگياسىنا جات نارسە. بۇل تاقتايشالاردى الىپ تاستاۋ كەرەك. ءبىزدىڭ ۇندەۋ وسى»، - دەدى ول.

Abai.kz

24 پىكىر