تامىزدىڭ جيىرماسىندا «ورىس الەمىنىڭ» ناسيحاتشىسى الەكساندر دۋگيننىڭ قىزى داريا دۋگين ماسكەۋدە كولىك جارىلىسىنان قازا تاپتى. ول اكەسىنىڭ كوزقاراسىن جاقتايتىن. داريا دۋگين وتىرعان كولىك موجايسك تاس جولىندا جارىلىپ كەتكەن.

ال كرەمل وقيعانى ءوز پايداسىنا تولىق پايدالانباق. ولار ۋكراينا تاراپىنان بولعان قاستاندىق ەكەنىن ايتۋدا.

كۋاگەرلەردىڭ ايتۋىنشا، اكەسى مەن قىزى «ءداستۇر» فەستيۆالىنە قاتىسقان. ءىس-شارادان كەيىن ولار ماسكەۋگە ءبىر كولىكپەن قايتپاقشى بولادى. بىراق قايتار كەزدە جوسپار وزگەرىپ، الەكساندر دۋگين باسقا كولىككە وتىرادى. وسىلايشا ءپۋتيننىڭ يدەولوگى اجالدان امان قالادى.

بۇل وقيعادان كەيىن رەسەيلىك باق پەن Telegram ارنالاردا ناعىز پىكىر-تالاس باستالدى. رەسەيلىك شەنەۋنىكتەر ۋكراينانى كىنالادى. رەسەي سىرتقى ىستەر مينيسترلىگىنىڭ وكىلى ماريا زاحاروۆا «ۋكراينانىڭ ارەكەتى» دەگەن كۇدىكتىڭ نەگىزگى نۇسقا رەتىندە قاراستىرىلاتىنىن اشىق ايتتى.

كوپتەگەن جىلدار بويى الەكساندر دۋگين ءوز قىزىنان «يدەولوگيالىق قارۋ» قالىپتاستىردى. داريا دۋگين ءوزىن «ناعىز ورىس قىزى» رەتىندە كورسەتۋگە تىرىستى. ول ۋكراينداردى جەك كورىپ رەسەيدىڭ ۋكرايناعا سوعىسىن قولدادى. رەسەيدىڭ ءبىرىنشى ارناسىنان ۇگىت-ناسيحات جۇرگىزدى.

«ءبىز ارنايى وپەراتسيانى مۇقيات باستادىق، بىزگە قاتال ءارى كەشىرىمسىز بولۋ كەرەك»، - دەگەن ەدى داريا. ول رەسەي باسىپ العان ماريۋپول قالاسىنا، ازوۆستالعا بارىپ قايتتى.

بىراق ۋكراينادا جانە تمد ەلدەرىندە داريا دۋگين سيمونيان مەن سكابەەۆا سياقتى تانىمال ەمەس. ول تۋرالى ەشكىم بىلمەيدى. سوندىقتان ۋكراينا تاراپىنىڭ ونى ولتىرەتىندەي سەبەبى جوق.

ءبىر قىزىعى، دۋگين قىزى قايتىس بولعان كۇنى ءوزىنىڭ Telegram ارناسىندا رەسەيدە بولىپ جاتقان وقيعالار مەن قابىلدانۋى كەرەك شارالار تۋرالى كرەملدىڭ كوڭىلىنەن شىقپايتىن جازبا جاريالاعان. ول كرەمل مەن ءپۋتيننىڭ ستراتەگياسىن قامشىلاپ، ىشكى وزگەرىستەر قاجەتتىگىن ايتقان.

«بيلىك 22 جىل بويى ازدى-كوپتى ءتيىمدى باسقارۋدى ۇيرەندى، تۇسىنەمىن. بىراق ول كەزەڭ ءوتتى. ارنايى اسكەري وپەراتسيا ءبارىن وزگەرتتى. بيلىك وزگەرىستى قالاي ما، قالاماي ما، ماسەلە وندا ەمەس. بىزگە پاتريوتتىق كونسەرۆاتيۆتى-رەۆوليۋتسيالىق وزگەرىستەر كەرەك ەكەنى انىق...ارنايى اسكەري وپەراتسيا قازىر بيلىكتەن ماڭىزدىراق»، - دەپ جازدى دۋگين.

«ورىس الەمىنىڭ» باستى ناسيحاتشىسى «ارنايى وپەراتسيانىڭ» ساتسىزدىگىن ءتۇسىنىپ، كرەملدىڭ باقىلاۋىنان شىعا باستادى. ول ەندىگى جەردە رەسەي ءۇشىن «ۋ قۇيىلعان قۇتى» سياقتى. سوندىقتان ولار بارلاۋ باسقارماسىمەن بايلانىسى بار دۋگيندى جولدان الىپ تاستاۋدى شەشتى. مۇنى ۋكرايناداعى كوپتەگەن ساتسىزدىكتەردەن كەيىن ءوزىن اقتاۋعا تىرىسقان فەدەرالدى قورعانىس قىزمەتىنىڭ جۇمىسى دەپ تولىق ايتۋعا بولادى.

كەرىمسال جۇباتقانوۆ

Abai.kz