پرەزيدەنت توقاەۆتىڭ بيلىك پەن حالىقتىڭ اراسىن جاقىنداتۋدى كوزدەيتىن «ەستيتىن ۇكىمەت» جوباسىنىڭ ءمانىن شەنەۋنىكتەر ءالى كۇنگە دۇرىس تۇسىنبەي، تۇسىنسە دە ەسكى ادەتتەرىنە باسىپ، بويىنا سىڭىرە الماي كەلە جاتقانى انىق بايقالادى. ۇزەڭگى باۋى التى قارىس اتقا مىنەرلەرگە قارالى قاڭتار وقيعاسى دا ساباق بولماعان سياقتى. ەل ءىشى بۇلىنگەن سول الماعايىپ كەزدە الماتى وبىلىسىنىڭ اكىمى قانات بوزىمباەۆ ەرەۋىلشىلەرگە بوقتىق ءسوز ايتىپ ەستە قالسا، قالا اكىمى باقىتجان ساعىنتاەۆ ەرەۋىلشىلەردىڭ دە، ەلدىڭ دە الدىنا شىقپاي، قاتاڭ سىنعا ۇشىراپ ەدى. ناتيجەسىندە لاۋازىمىنان بوساتىلىپ، ورىنىن ەربولات دوساەۆ باسقان. دوساەۆ كەلە سالا سەنبىلىككە قاتىسىپ، تال ەگىپ، جاڭا قىرىنان كورىنە باستاعان. كەشەگى قالا حالقىمەن كەزدەسۋىندە اشۋعا بوي الدىرىپ، سونىڭ ءبارىن سەلگە كەتىردى.

الماتىداعى قىمبات رەستوراندا ۇلىنىڭ تويىن دۇركىرەتىپ وتكىزگەن قىزىلوردانىڭ جاڭا اكىمى نۇرلىبەك نالىباەۆكە قاراعاندا رەسپۋبليكامىزداعى ەڭ ءىرى مەگاپوليس سانالاتىن الماتىنىڭ تىزگىنىن ۇستاعان دوساەۆتىڭ ارقالاعان جۇگى دە، موينىنا العان جاۋاپكەرشىلىك تە سالماقتى ەكەنى بەلگىلى. وڭتۇستىك استانامىزعا توقاەۆ تىلگە تيەك ەتكەن «ۇياتسىز بلوگەر»، «جاعىمپاز زيالىلار» مەن ساياساتسوعارلار توپتاسقان. قازىرگى كۇندە قىمباتشىلىققا ۇرىنىپ، تاپقانىن تاماعىنا جەتكىزە الماي وتىرعان اشۋلى جۇرتتىڭ كوڭىلىن تابۋ دوساەۆقا عانا ەمەس، ەلورداداعى اقجاعالىلارعا دا قيىن سوعىپ تۇر. پرەزيدەنت جاقىندا عانا ۇكىمەتتىڭ اتقارعان جۇمىسىنا كوڭىلى تولمايتىنىن ايتىپ، بىرنەشە مينيسترگە سوگىس جاريالادى. باقىت سۇلتانوۆتى لاۋازىمىنان بوساتتى.

دوساەۆتىڭ قالا تۇرعىندارىمەن كەزدەسۋىندە ايتقان: «باراحولكا مەنىڭ قۇزىرىم دا ەمەس»، «سىزبەن سوتتا كەزدەسەمىن»، «ارىزىڭىزدى مەنىڭ قاسىمداعى پروكۋرورلارعا قالدىرىڭىز»، «ءسىزدىڭ تالابىڭىزدى ورىنداۋ ءۇشىن قولدانىستاعى زاڭدى وزگەرتۋگە تۋرا كەلەدى» دەگەن سوزدەرىنەن حالىقتان ەمەس، ەسكى جۇيەدەن، ءونىمسىز جۇمىس تاسىلىنەن، بۇرىننان قوردالانىپ قالعان ماسەلەلەردەن ابدەن شارشاعانى اڭعارىلادى. جۇيكەسى سىر بەرگەن شەنەۋنىك جالعىز دوساەۆ ەمەس ەكەنى ءمالىم. ونىڭ الدىندا مادەنيەت جانە سپورت ءمينيسترى داۋرەن اباەۆ تا ەل رۋحانياتىنا قاتىستى ورىندى پىكىر ايتقان اقساقالدارعا قيسىنسىز ءسوز ايتىپ، قىڭىر مىنەز كورسەتكەن. ءماجىلىس دەپۋتاتى ايدوس سارىم مىرزا دا ارىپتەسى ساياساتتانۋشى دوسىم ساتاەۆقا شۇيلىگىپ: «ءبىر-ەكى كۇن قۇجاتپەن اينالىسىپ كور، اۋسەلەڭدى كورەيىن» دەگەن مازمۇندا ءسوز ايتقان. اشىق ايتپاعانمەن ونىڭ دا قاعازباستىلىقتان ابدەن قاجىپ، باياعى «باسى بوس» وپوزيتسيا كەزىن اڭساپ جۇرگەنى سەزىلەدى.

كوپشىلىككە جۇگىرىپ ءجۇرىپ قىزمەت كورسەتۋگە ءتيىس شەنەۋنىكتەردىڭ حالىق الدىندا ءوزىن اسقاق ۇستاۋىنىڭ ءتۇپ-توركىنى اكىمدى حالىق داۋىس بەرىپ سايلايتىن ەمەس، جوعارىدان تىكەلەي تاعايىندايتىن ەسكى جۇيەدە جاتقانى اقيقات. شىن مانىندە شەنەۋنىكتەردىڭ سوڭعى ۋاقىتتاعى حالىق الدىنداعى سابىرسىزدىعى، ءوزىن ۇستاي الماي، دۇرسە قويا بەرۋى ەلدىڭ ەكونوميكالىق، الەۋمەتتىك احۋالىنىڭ مۇشكىل ەكەنىن، ءتۇيىندى ماسەلەلەردىڭ شەشىلۋدىڭ ورنىنا كۇردەلىلەنىپ بارا جاتقانىن كورسەتەدى. ونى شەشۋدىڭ ۇتىمدى جولى بۇرىنعىداي كادر اۋىستىرۋ ەمەس، باتىل ساياسي رەفورما ەكەنى ايدان انىق.

ەسبول ۇسەنۇلى

Abai.kz