رەسەيدىڭ اقپاراتتىق-باقىلاۋ كەڭىستىگىندە “جوسپارلى تۇردە ازىق-تۇلىك تاپشىلىعىن جاساۋ» دەگەن ماعىناداعى حابارلار بەلسەندى تۇردە تاراتىلا باستادى، دەپ جازادى «رپۋ دانك» تەلەگرام ارناسى.

قازاقستاننىڭ سولتۇستىگىندەگى قوستاناي وبلىسىندا ورماندار مەن بيداي القاپتارى ورتەنىپ جاتىر، جاقىن ماڭداعى ەلدى مەكەندەردە بىرقاتار «تۇسىنىكسىز» ءورت شىقتى. زارداپ شەككەندەر بار، اكىمشىلىك ورتالىققا، قوستاناي قالاسىنا اپاراتىن باستى تاس جول جابىلدى. ايتا كەتۋ كەرەك، ليساكوۆسكىدە بىرنەشە كۇن بۇرىن 600-گە جۋىق ساياجاي ورتەندى. فەرمەرلەردىڭ حابارلاۋىنشا، قازىر ەگىن جيناۋ ناۋقانى جانە ءدال وسى ۋاقىتتا بيدەيدىڭ ورتەنۋى بەكەر ەمەس.

ەستەرىڭىزگە سالا كەتەيىك، بۇعان دەيىن ەۋرازيالىق ەكونوميكالىق كوميسسيا وتىرىسىندا رەسەي ءۇشىنشى ەلدەرگە استىق ەكسپورتىن جۇرگىزۋ ءۇشىن كۆوتالار مەن باج سالىعىن ەنگىزۋدى قازاقستاننان تالاپ ەتكەن بولاتىن. رەسەي بۇل تالابىن ەاەو ەلدەرى ارقىلى شەكتەۋلەردى اينالىپ ءوتىپ، رەسەيلىك استىقتىڭ كەرى ەكسپورتىن الدىن-الۋدىڭ جالعىز جولى دەپ تۇسىندىرگەن.

قازاقستان رەسەيلىك تالاپقا ءۇزىلدى-كەسىلدى قارسى، ويتكەنى شەتەلگە استىق جەتكىزۋدى ءوزى ودان ءارى دامىتقىسى كەلەدى. ورتالىق ازيا ەلدەرى قازاقستاندىق استىقتى – بيداي مەن ارپانى وتكىزۋدىڭ باستى نارىعى بولىپ تابىلادى.

رەسەي مەن ۋكراينا الەم نارىعىنداعى استىق شىعاراتىن الپاۋىتتار. بىراق سوعىس باستالعاننان سوڭ استىق ەكپورتىندا ۇلكەن وزگەرىستەر بولدى. رەسەي ۋكراينانىڭ باسىپ العان ايماقتارىنان استىق تاسىپ، زاڭسىز شەتكە جونەلتىپ جاتىر. سونداي-اق رەسەي ەۋرازيا ەكونوميكالىق كوميسسياسىنىڭ 20 مامىرداعى جينالىسىندا رەسەي ەاەو ەلدەرىنە ءۇشىنشى ءبىر ەلگە استىق ەكسپورتتاۋعا كۆوتا مەن باج سالىعىن ەنگىزسىن دەگەن تالاپ قويعان. وسىلايشا اگرەسسور الەمدە استىق تاپشىلىعىن جاساۋعا بەكىگەن. بۇل ۇسىنىسقا ارمەنيا مەن قىرعىزستان كەلىسكەنىمەن، قازاقستان قارسى شىقتى. ويتكەنى مۇنداي شەشىم جەرگىلىكتى شارۋاشىلىقتارعا حالىقارالىق مىندەتتەرىن ورىنداۋعا كەدەرگى جاسايدى.

قازاقستان كەرىسىنشە، استىق پەن ۇن ەكسپورتتاۋعا قويىلعان ءبىرشاما شەكتەۋلەردى الۋ تۋرالى شەشىم قابىلدادى. ول شەشىم 10-قىركۇيەكتە كۇشىنە ەنۋى ءتيىس. بيىل جوسپار بويىنشا 13 ميلليون توننا استىق جينالۋى كەرەك، ونىڭ 6,5-7 ميلليون تونناسى ىشكى نارىققا شىعارىلىپ، قالعانى ەكسپورتقا دەپ دايارلانعان ەكەن.

Abai.kz