«كرەمل ۋكراينامەن سوعىستا عانا ەمەس، ەۋروپاعا اشقان مۇناي-گاز سوعىسىنان دا جەڭىلىپ جاتىر»، - دەپ ەسەپتەيدى رەسەيلىك وپپوزيتسيونەر، الەۋمەتتانۋشى يگور ەيدمان. ول بۇل تۋرالى ءوزىنىڭ Facebook پاراقشاسىندا جازدى.

«ول قازىر ەسكى ورىس ەرتەگىسىندەگىدەي «قاسقىردىڭ قۇيرىعى ءۇسىپ قال، ءۇسىپ قال» دەپ ەۋروپانى قورقىتىپ وتىر. ال، ەۋراپا ودان ىعار ەمەس. پۋتين ءوزى باستاعان ەكى سوعىستان دا جەڭىلدى: ءبىرى – ۋكرايناداعى قاندى سوعىس، ەكىنشىسى – ەۋروپامەن مۇناي-گاز سوعىسى»، - دەدى ەيدمان.

سونىمەن قاتار، جاقىن ارادا رەسەي بيۋدجەتى نەگىزگى ەۋروپالىق نارىققا ەنەرگيا تاسىمالداۋشىلاردى ەكسپورتتاۋدان تۇسەتىن كىرىستەن ايىرىلادى. ەۋروپادان كەلەتىن  مۇناي دوللارلارىنىڭ اعىنى الداعى جىلدىڭ باسىندا توقتايتىن بولادى.

«ەۋروپانىڭ رەسەي گازىنان جاقىن ۋاقىتتا باس تارتاتىن ويى بولماعان. بىراق پۋتين پروتسەستى ءوزى جەدەلدەتتى. كرەملدىڭ قىڭىرلارى گەرمانيانى گازبەن بوپسالاۋ ارقىلى تىزە بۇكتىرۋگە بولمايتىنىن تۇسىنبەدى. قازىر نەمىس قوعامىندا كرەملگە دەگەن جەككورۋشىلىك ودان ءارى ۇلعايىپ، رەسەي گازىنا تاۋەلدىلىكتەن قۇتىلۋعا شەشىم قابىلدادى. اقىماق بوپسالاۋدىڭ ناتيجەسىندە كرەمل ەۋروپالىقتار جوسپارلاعاننان ءبىر جارىم جىل بۇرىن گاز ساتۋدان تۇسكەن كىرىستەردەن ايىرىلادى.

پۋتين جارىق استاۋدىڭ قاسىندا قالسا دا، «ءبىز ەشتەڭەدەن ايىرىلعان جوقپىز» دەپ قايتالاۋدان تانبايدى. ءيا، ارينە، ەگەر ونداعان مىڭ ادام ءومىرىن، تريلليونداعان رۋبل اقشانى، سوعىسقا جارامدى اسكەردى (قازىر ولاردىڭ ورنىن سوتتالعاندارمەن تولتىرىپ جاتىر), اقپاراتتىق تەحنولوگيادان باستاپ  اۆتوموبيل قۇراستىرۋعا دەيىنگى ەكونوميكانىڭ ماڭىزدى سالالارىن، ەكسپورتتى قوسپاعاندا «ەشتەڭەنى جوعالتپادى». بۇل تەك قانا باسى»،-دەپ جازدى ساراپشى.

وسىلايشا رەسەي تەرروريستىك ەل ەكەنىن كورسەتتى. ءتىپتى جاي عانا تەرروريست ەمەس، يادرولىق لاڭكەس، باسقىنشى جانە گەنوتسيد جاساۋشى، زۇلىم يمپەريانى جاڭارتقىسى كەلەتىن مەملەكەت. وركەنيەتتى الەم الدىندا رەسەي بارلىق جاعىنان سەنىمسىز سەرىكتەس ەكەنىن كورسەتتى.

كەرىمسال جۇباتقانوۆ

Abai.kz