قىتايدىڭ شي توراعاسى ەرتەڭ، 14 قىركۇيەكتە قازاقستانعا كەلەتىنىن وسىعان دەيىن ايتتىق. وزبەكستاننىڭ سامارقانىندا وتەتىن شىۇ ءسامميتىنىڭ الدىندا ات باسىن قازاقستانعا بۇرىپ، ءبىر ايالداپ بارىپ وزبەك اتتانادى، شي مىرزا.

شي مىرزانىڭ بۇل ساپارى تۋرالى قازاقستاننىڭ سىرتقى ىستەر مينيسترلىگى اپتا بۇرىن الاقايلاپ ايتقانىمەن، قىتاي تارابى رەسمي مالىمدەمە جاساماعان ەدى. بار بولعانى رەسەيدىڭ قىتايداعى ەلشىسى ءبىر اپتادان كەيىن پۋتين شي جيپيڭمەن كەزدەسەدى دەگەن اقپار تاراتتى. بولدى.

ءۇش جىلعا جۋىق شەكارا سىزىعىن اتتاماعان (ەشبىر ەلگە) شي مىرزانىڭ قىتايداعى پارتيا سيەزىنىڭ ءدال الدىندا قازاقستان مەن وزبەكستانعا اتتانىپ كەتۋى كوپ جاعدان حابار بەرەتىنى انىق. ونىڭ ۇستىنە بۇل جولعى پارتيا سيەزى ءشيدىڭ كەلەشەك تاعدىرىن انىقتايتىن ماڭىزدى شارا. قازىر شي تاعىن ساقتاپ قالا ما، جوق پا دەگەن سۇراق قىتاي قوعامىندا ءھام ساياسي ەليتاسىندا باستى سۇراق. وسىنداي ماڭىزدى ۋاقىتتا شەت ەلگە شىققان شي توراعا داۋدەي ماقالا جازىپتى. وندا قازاقستانعا ساپارى تۋرالى دا ءسوز قوزعاعان ەكەن. بۇيدەيدى...

ءشيدىڭ ماقالاسىنان ءۇزىندى:

«وسى التىن كۇزدە پرەزيدەنت قاسىم-جومارت توقاەۆتىڭ ارنايى شاقىرتۋىن قابىل الىپ، مەن بىزگە دوس سانالاتىن قازاقستاندا مەملەكەتتىك ساپارمەن بولامىن. اراعا 5 جىل سالىپ، اسا زور ىقىلاس تانىتىپ، شەكسىز جازىق دالاسى مەن زاڭعار بيىك تاۋلارى، سوزىلىپ جاتقان وزەندەرى مەن كەڭ قۇشاق حالقى بار سىزدەردىڭ ەلدەرىڭىزدە بولماقپىن. بۇل سىزدەردىڭ ەلگە ءتورتىنشى مارتە كەلۋىم. مەن بۇل ساپارعا كوپ ءۇمىت ارتامىن.

قىتاي قازاقستانمەن ارىپتەستىكتى دامىتۋعا اركەز مۇددەلى. اسىرەسە، قۇقىق قورعاۋ، ارنايى قىزمەت پەن قورعانىس ۆەدومستۆوسى سالالارىندا بايلانىستى نىعايتۋ ۋاقىت تالابى.

سونداي-اق، جاھاندىق قاۋىپسىزدىك تۋرالى باستامالاردى باسشىلىققا الا وتىرىپ، ورتاق كەشەندى كونتسەپتسيالارعا ءومىر بەرۋ، قىتاي مەن وا ەلدەرى اراسىنداعى قاۋىپسىزدىك ماسەلەلەرى جونىندەگى باستامالاردى جۇزەگە اسىرۋ، ءۇشىنشى كۇشتەرمەن بىرلەسىپ كۇرەسۋ، ترانسۇلتتىق ۇيىمداسقان قىلمىستىق توپتار مەن زاڭسىز ەسىرتكى بيزنەسىمەن كۇرەسۋ، سىرتقى كۇشتەردىڭ ەلىشىلىك ماسەلەلەرگە ارالاسۋىن بولدىرماۋ، ايماقتا بەيبىتشىلىك پەن تۇراقتىلىقتى ساقتاۋعا بىرلەسىپ كۇش سالۋ كۇن تارتىبىندە قارالماق»، - دەپتى.

ءتۇيىن: بۇعان دەيىن سوڭعى ءبىر جىل ىشىندە قازاقستانعا قىتاي حالىق رەسپۋبليكاسى مەملەكەتتىك كەڭەسىنىڭ مۇشەسى، سىرتقى ىستەر ءمينيسترى ۆان ي، قورعانىس ءمينيسترى ۆەي فەنحەن كەلىپ كەتكەن.

Abai.kz