22 قىركۇيەككە دەيىن قازاقستانعا 9-12 مىڭعا جۋىق رەسەيلىك كەلىپ-كەتىپ جۇرسە، 22 قىركۇيەكتەن باستاپ ولاردىڭ سانى كۇنىنە 2-3 ەسەگە كوبەيگەن. بۇل تۋرالى قر ءىىم كوشى-قون كوميتەتى توراعاسىنىڭ مىندەتىن اتقارۋشى اسلان اتالىقوۆ ايتتى.

ونىڭ ايتۋىنشا، جىل باسىنان بەرى ەلىمىزگە 4 ملن 399 مىڭ شەتەلدىك كەلگەن. ونىڭ ىشىندە، رەسەيدەن 1,7 ملن ادام، وزبەكستاننان 1,5 ملن ادامنان كوپ، قىرعىزستاننان 547 مىڭ ادام، تاجىكستاننان 200 مىڭنان استام ادام ەلگە كىرگەن.

وسى ۋاقىت ىشىندە ەلدەن 4 ملن 155 مىڭ شەتەلدىك كەتتى. رەسەيدەن 1 ملن 666 مىڭ ازامات، وزبەكستاننان 1,770 مىڭ ادام، 540 مىڭ قىرعىز ازاماتى مەن 196 مىڭ تاجىك ازاماتى كەتكەن.

«رەسەي ازاماتتارىنىڭ يمميگراتسياسىنا توقتالا وتىرىپ، كەلەسى تالداۋدى اتاپ وتكىم كەلەدى. 2019 جىلى پاندەميا بولماعان كەزدە قازاقستانعا 2 ملن 875 مىڭ رەسەيلىك كەلدى. ياعني سول كەزدە 3 ملن-عا جۋىق ادام كىردى. ال بيىل 9 ايدا 1,6 ملن ادام كەلدى. الايدا رەسەي بيلىگىنىڭ تاياۋداعى شەشىمدەرىنەن كەيىن وتكەن اپتادان باستاپ رەسەيدەن ەمميگرانتتار اعىنى كوپتەگەن باعىتتا، ونىڭ ىشىندە قازاقستانعا دا ۇلعايدى. ونىڭ ءبارىن ازاماتتار الەۋمەتتىك جەلىلەردەن كورىپ ءجۇر»، - دەيدى ول.

Abai.kz