بۇگىن پارلامەنت ءماجىلىسىنىڭ توراعاسى ەرلان قوشانوۆ پارلامەنتارالىق وداق توراعاسى، پورتۋگاليا رەسپۋبليكاسى اسسامبلەياسىنىڭ دەپۋتاتى دۋارتە پاشەكۋمەن كەزدەستى. پارلامەنتشىلەر ىنتىماقتاستىقتى دامىتۋ باعىتتارىن تالقىلاپ، بىرلەسكەن ءىس-شارالار وتكىزۋ جونىندە كەلىسىمگە كەلدى.

ە.قوشانوۆ پەن د.پاشەكۋ الەمدىك جانە ءداستۇرلى دىندەر كوشباسشىلارىنىڭ VII سەزىننەن العان اسەرلەرىمەن ءبولىستى. كەشە القالى جيىنعا پارلامەنتارالىق وداقتىڭ باسشىسى دا قاتىسقان بولاتىن. ءماجىلىس سپيكەرى دۋارتە پاشەكۋعا دىنارالىق ديالوگتى نىعايتۋداعى قازاقستان ساياساتىنا قولداۋ بىلدىرگەنى ءۇشىن العىس ايتتى. – سەزد ناتيجەسى مەن دەكلاراتسياسى الەم ەلدەرىنىڭ ۇكىمەتتەرى، حالىقارالىق ۇيىمدار، سونىڭ ىشىندە بۇۇ ينستيتۋتتارى ءۇشىن تولەرانتتىلىق، ءوزارا قۇرمەت پەن بەيبىتشىلىك مادەنيەتىن ىلگەرىلەتۋدە ماڭىزدى باعدار بولارىنا سەنەمىن.

كەيبىر ماسەلەلەر پارلامەنتارالىق وداقتىڭ الداعى ءىس-شارالارىنىڭ كۇن تارتىبىنە دە ەنگىزىلۋى مۇمكىن، – دەدى ە.قوشانوۆ. ءوز كەزەگىندە دۋارتە پاشەكۋ الەمدەگى قاقتىعىستاردىڭ كوبى ءدىني سەبەپتەردەن تۋىندايتىنىن ايتتى. سوندىقتان رۋحاني كوشباسشىلار حالىققا ءدىننىڭ جانجالعا سەبەپ بولمايتىنىن ءتۇسىندىرۋى كەرەك ەكەنىنە نازار اۋداردى.

– بۇل تۇرعىدا قازاقستاننىڭ جانە ەل پرەزيدەنتىنىڭ ءرولى ايرىقشا ەكەنىن اتاپ وتكەن ءجون. ويتكەنى ءسىزدىڭ ەل ءتۇرلى ءدىني اعىم وكىلدەرى بەيبىت ءومىر سۇرە الاتىنىنىڭ ۇلگىسىنە اينالىپ وتىر. ال قاسىم-جومارت توقاەۆتىڭ سەزد جۇمىسىن جالعاستىرۋ جانە نىعايتۋ جونىندەگى ۇستانىمى – بۇكىل الەم ءۇشىن وتە جاقسى باستاما، – دەدى پارلامەنتارالىق وداقتىڭ توراعاسى.

تاراپتار ىنتىماقتاستىقتى دامىتۋ باعىتتارىن تالقىلاي كەلە، پارلامەنت ءماجىلىسى مەن پارلامەنتارالىق وداق اراسىنداعى بايلانىستى نىعايتۋعا كەلىستى. اسىرەسە، ەكولوگيالىق ماسەلەلەردىڭ وزەكتىلىگىنە ەرەكشە ءمان بەردى. – قازاقستاننىڭ ەكولوگيانى جاقسارتۋعا باعىتتالعان رەفورمالارى ورتالىق ازيا ەلدەرىنە ۇلگى بولا الادى، – دەدى د.پاشەكۋ.

سوڭىندا د.پاشەكۋ كەلەسى جىلى پارلامەنتارالىق وداق ءىس-شارالارىنىڭ ءبىرىن قازاقستان استاناسىندا وتكىزۋدى ۇسىنىپ، قازاقستاندىق پارلامەنتشىلەردى اتالعان وداق پەن اسسامبلەيانىڭ ءىس-شارالارىنا قاتىسۋعا شاقىردى. كەزدەسۋگە پورتۋگاليانىڭ قازاقستانداعى توتەنشە جانە وكىلەتتى ەلشىسى ماريا دە فاتيما ۆەلەس دە اندرادە مەندەش جانە پارلامەنت سەناتى مەن ءماجىلىس دەپۋتاتتارى قاتىستى.

ايتا كەتۋ كەرەك، پارلامەنتارالىق وداق – قۇرامىنا 179 مەملەكەت كىرەتىن ەڭ كونە حالىقارالىق پارلامەنتتىك ۇيىم. شتاب-پاتەرى جەنەۆادا ورنالاسقان. وداق بۇۇ-مەن تىعىز ىنتىماقتاستىقتا جۇمىس ىستەيدى جانە ونىڭ ماقسات-مىندەتتەرىن باسشىلىققا الادى. قازاقستان پارلامەنتىنىڭ دەپۋتاتتارى وداقتىڭ رەسمي ءىس-شارالارىنا تۇراقتى تۇردە قاتىسىپ كەلەدى. بۇل پارلامەنتارالىق وداقتىڭ توراعاسى دۋارتە پاشەكۋدىڭ قازاقستان استاناسىنا ەكىنشى ساپارى. العاش رەت 2021 جىلدىڭ جەلتوقسان ايىندا كەلگەن بولاتىن.

Abai.kz