كەيبىر بىلەرمەندەر حاكىم اباي ولەڭىنىڭ "قازاقتىڭ وزگە جۇرتتان ءسوزى ۇزىن" دەگەن ءبىر تارماعىن العا تارتىپ، ءشۇباسىز اقيقات ساناپ، ۇلتىمىزدى ءسوز ساپىرۋدان باسقا تىرلىگى جوق، قاۋقارسىز حالىقتاردىڭ ساناتىنا قوسادى. قازىرگى قوعامدىق پىكىر الاۋىزدىعىنىڭ، وپپوزيتسيانىڭ ساياسي بەرەكەسىزدىگىنىڭ تۇپكى سەبەبى سونىڭ كەسىرىنەن دەپ تون پىشەدى.

قازىرگى ينتەرنەت دامىعان ساندىق تەحنولوگيا داۋىرىندە قازاق قانا ەمەس، كۇللى الەم جۇرتى ءسوز باعىپ وتىر. وعان دالەل جاھاننىڭ ماڭداي الدى قالتالى ادامى سانالاتىن يلون ماسكتىڭ تۆيتتەردە جاريالاعان جازباسىنا دەگەن جۇرتتىڭ رەاكسياسى. قازاننىڭ 3-كۇنى ماسك رەسەي مەن ۋكراينا سوعىسىنا بايلانىستى ءوزىنىڭ "بەيبىتشىلىك جوباسىن" كوپ تالقىسىنا ۇسىندى. ونىڭ جوباسى 4 ءتۇرلى مازمۇننان تۇرادى: ءبىرىنشىسى - اتالمىش رەسەيگە قوسىلدى دەلىنگەن 4 وبلىستا بىرىككەن ۇلتتار ۇيىمىنىڭ باقىلاۋىندا قايتادان حالىقتىق رەفەرەندۋم وتكىزۋ. ەكىنشىسى - ۋكراينانىڭ كىرىمنىڭ رەسەيگە تيەسىلى ەكەنىن مويىنداۋى. ءۇشىنشى - قىرىمدى سۋمەن قامداۋ. ءتورتىنشى - ۋكراينا بەيتاراپ مايداندا قالۋ.

ماسكتىڭ جوباسىنا ونلاين داۋىس بەرگەن 2 ميلليون 74 مىڭ ادامنىڭ تەڭ جارتىسىنان استامى، اتاپ ايتقاندا 60 پايىزى ونى قولداماعان. بىرىنشىسىنەن باسقاسى كرەملگە، ارينە، مايداي جاقتى. قازاقستاننىڭ سولتۇستىگى ورىس جەرى دەپ جازبا سالعان مەدۆەدەۆ تە، دۋما سەركەلەرى دە، ماسكتىڭ ساياسي كورەگەندىگىنە ريزاشىلىقتارىن ءبىلدىردى. ەرجۇرەك زەلەنسكي قاراپ قالسىن با، "سىزدەرگە ۋكراينانى قولدايتىن ماسك ۇناي ما، جوق، رەسەيدى قولدايتىن ماسك ۇناي ما؟" دەپ پەتيتسيا جاريالادى. وعان قاتىسقان 2 ميلليون ادامنىڭ 80 پايىزعا جۋىعى ۋكراينانى قولدايتىن ماسكتى تاڭداعان. پىكىرتالاس سالدارىنان تەسلانىڭ جارناسى 9 پايىزعا قۇلدىراپ، ماسك دەمدە 10 ميلليون دوللارىن جوعالتقان.

ءوز ەلىندە وگەيدىڭ كۇيىن كەشىپ وتىرعان قازاقتىڭ قولىندا نازارباەۆ داۋىرىندە ەل بايلىعىنىڭ مايلى جىلىگىنە يە بولعان وليگارحتاردىڭ قىمبات اكتسيالارىنىڭ بىردە-ءبىر ۇلەسى جوق ەكەنى شىندىق. ەكونوميكالىق دارمەنسىزدىك ساياسي دارمەنسىزدىككە اكەلىپ سوعىپ وتىر. سول ۇشىندە اۋزى قيسىق بولسا دا ءسوزى ءوتىمدى باي بالالارىنىڭ ساياسي ۇستانىمىنا بايلانىستى قولدان كەلەر قايران جوق. "باس كەسپەك بولسا دا، ءتىل كەسپەك جوق", دەيتىن قازاقتى ءتاڭىر بوزىنەن ايىرسا دا، سوزىنەن ايىرماسىن.

ءجۇز تومدىق بابالار ءسوزىنىڭ جارىق كورگەنى بەلگىلى. وعان نوتاعا تۇسكەن 10 مىڭ ءان مەن 7 مىڭ كۇيدى قوسىڭىز. الەمدە ەشبىر ۇلتتا جوق بۇل بايلىقتى قازاق "ونەر الدى - قىزىل ءتىل" دەگەن سوزۋارلىعى، قۇيما قۇلاقتىعى ارقاسىندا، ينتەرنەت جوق زامانداردان بىزگە جەتكىزىپ وتىر.

قازاقتىڭ ءسوزىنىڭ ساياسيلانۋى، تاپتىق كۇرەستىڭ قۇرالىنا اينالۋى قىزىل يدەولوگيانىڭ كەسىرىنەن ەكەنى ءمالىم. سونىڭ كەسىرىنەن ارامىزدا جۇرەكتىڭ ءسوزىن ەمەس، تۇلكى زاماننىڭ ءسوزىن سويلەيتىندەردىڭ كوبەيگەنى جاسىرىن ەمەس. جاڭا قازاقستان قۇرامىز دەسەك، بابالار سەرتى مەن باتىستىڭ ءسوز بوستاندىعىن توعىستىرىپ، ۇلتتىق بولمىسىمىزعا قايتۋ باستى تۇعىرىمىز بولۋ كەرەك.

ەسبول ۇسەنۇلى

Abai.kz