بۇگىن مەملەكەت باسشىسى قاسىم-جومارت توقاەۆ سانكت-پەتەربۋرگ قالاسىندا وتكەن تمد مەملەكەتتەرى باسشىلارىنىڭ بەيرەسمي كەزدەسۋىنە قاتىستى.

جيىنعا ازەربايجان پرەزيدەنتى يلحام اليەۆ، ارمەنيا پرەمەر-ءمينيسترى نيكول پاشينيان، بەلارۋس پرەزيدەنتى الەكساندر لۋكاشەنكو، رەسەي پرەزيدەنتى ۆلاديمير پۋتين، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، وزبەكستان پرەزيدەنتى شاۆكات ميرزيوەۆ كەلدى.

پرەزيدەنت قاسىم-جومارت توقاەۆ رەسەي باسشىسى ۆلاديمير ءپۋتيندى 70 جاس مەرەيتويىمەن قۇتتىقتاپ، ونىڭ قازاقستان مەن رەسەي اراسىنداعى ستراتەگيالىق سەرىكتەستىكتى نىعايتۋعا قوسقان ۇلەسىن اتاپ ءوتتى.

ءوز كەزەگىندە ۆلاديمير پۋتين قازاقستان پرەزيدەنتىنىڭ ورىس ءتىلىن قولداۋ جانە ىلگەرىلەتۋ ماقساتىندا تمد اياسىندا حالىقارالىق ۇيىم قۇرۋ تۋرالى باستاما كوتەرگەنىنە العىس ايتتى.

"قاسىم-جومارت توقاەۆ تمد اياسىندا ورىس ءتىلىن قولداۋ جانە ىلگەرىلەتۋ بويىنشا حالىقارالىق ۇيىم قۇرۋ تۋرالى باستاما كوتەرگەنىن دە قۋانا اتاپ وتكىم كەلەدى. پرەزيدەنت توقاەۆقا ءبىزدىڭ العىسىمىز شەكسىز، بۇل بارلىعى ءۇشىن ماڭىزدى باستاما دەپ ويلايمىن. ورىس ءتىلى، ارينە، مەملەكەتارالىق قارىم-قاتىناس ءتىلى بولىپ سانالادى. سونداي-اق رەسەيدە ميلليونداعان تمد ازاماتتارى جۇمىس ىستەيدى. ولار ءبىر جاعىنان رەسەيدىڭ دامۋ جوسپارلارىن جۇزەگە اسىرۋعا كومەكتەسسە، ەكىنشى جاعىنان تاپقان قاراجاتىنا ءوز وتباسىلار اسىراپ وتىر»، – دەدى ۆلاديمير پۋتين.

پۋتين 2023 جىل تمد-دا ۇلتارالىق قاتىناس ءتىلى رەتىندە «ورىس ءتىلى جىلى» دەپ جاريالانعانىن ەسكە سالدى.

جيىن بارىسىندا تمد ەلدەرىنىڭ باسشىلارى ۇيىم قىزمەتىنىڭ باسىم باعىتتارىن، ءوزارا ءتيىمدى ىنتىماقتاستىقتى نىعايتۋ جانە ودان ءارى دامىتۋ جونىندەگى جوسپاردى تالقىلادى.

Abai.kz