بۇل سەرگەي سۋروۆيكين دەگەن ورىس گەنەرالى. ۋكراينا مايدانىنا جاۋاپتى بولىپ، وتكەن سەنبىدە عانا تاعايىندالعان. 10 قازانداعى ۋكراينانىڭ قالالارىن، بەيبىت تۇرعىندارىن، تۇرعىن ۇيلەر مەن بالالار الاڭدارىن ت.ب. جاپپاي بومبالاۋعا جاۋاپتى ادام.

56 جاستا. رەسەي باتىرى. ارميا گەنەرالى. تامىز توڭكەرىسى، ءسۇريا، شەشەن سوعىستارىن كورگەن.

1991 جىل: گكچپ وقيعاسى.

1991 جىلى تامىزدا كاپيتان شەندى سۋروۆيكين 2-گۆارديالىق موتواتقىشتار ديۆيزياسىنىڭ 1-موتواتقىشتار باتالونىن باسقارىپ، گكچپ بۇيرىعى بويىنشا، سادوۆايا كولتسودا (ماسكەۋ) پوست ورناتۋ ءۇشىن بارادى. ولاردىڭ الدىنا نارازى حالىق شىعىپ، جولدارىن كەسىپ، توقتاتپاق بولادى. سۋروۆيكين ماسەلەنى سوزبەن شەشە الماعان سوڭ، اۋەگە ەسكەرتۋ رەتىندە وق اتىپ، نارازىلاردى تاپتاپ وتۋگە بۇيرىق بەرەدى. سول جەردە 3 ادامدى سۋروۆيكيننىڭ بمپ-سى مىجىپ وتە شىعادى. ال گكچپ جەڭىلىسىنەن كەيىن سۋروۆيكين تۇتقىندالىپ، 7 اي بويى قاماۋدا بولادى. كەيىن ول بار بولعانى بۇيرىقتى ورىنداۋشى سانالىپ، ايىپ الىنادى.

1995 جىل: قارۋ ساتۋ

اسكەري اكادەميادا وقىپ جۇرگەندە، ماسكەۋ اسكەري سوتى سۋروۆيكيندى زاڭسىز قارۋ ساتىپ الۋ جانە ساتۋ ىسىنە ايىپتى دەپ تانىپ، 1 جىلعا شارتتى جازاعا كەسكەن. كەيىن بۇل ايىپتى دا الىپ تاستاعان. ول تاپانشا ساتقان.

2004 جىل: قاراماعىنداعىلاردى ۇرىپ-سوعۋ

2004 جىلدىڭ ناۋرىزىندا پودپولكوۆنيك ۆيكتور تسيبيزوۆ ءوزىن گەنەرال-مايور سۋروۆيكين «ساياسي كوزقاراستارى ءۇشىن ۇرىپ-سوققتى» دەپ ايىپتادى. تسيبيزوۆ سول جىلى ناۋرىزدا دۋماعا ۇمىتكەر زيابلەتسەۆا دەگەن ادامنىڭ سايلاۋالدى شتابىنا باقىلاۋشىلىق جاساعان. سۋروۆيكين ونىڭ ساياسي كوزقاراسى ءۇشىن ايىپتاعان. كەيبىر ورىس اقپاراتى، سۋروۆيكيننىڭ پودپولكوۆنيك تسيبيزوۆتى جەكە كابينەتىنە شاقىرىپ، اۋىر سوزدەرمەن بالاعاتتاپ، ۇرىپ-سوققانىن جازعان. سۋروۆيكين سوتتا بۇل ايىپتىڭ ەشبىرىن مويىنداماعان. ول «پودپولكوۆنيك ءوز جۇمىس ورنىن 30 تاۋلىككە قالدىرىپ كەتتى»، - دەپ ايىپتاعان. سۋروۆيكين مەن تسيبيزوۆتىڭ كابينەتتەگى ايقايىنان كەيىن، تسيبيزوۆ سۋروۆيكيننىڭ كابينەتىندە ءوزىن-ءوزى اتىپ تاستاعان. (كەي دەرەكتەردە سۋيتسيد جاساۋشى اندرەي شتوكال دەگەن ادام دەپ اتالادى).

ۋكراينا مايدانىنا جاۋاپتى بولىپ گەنەرال سۋروۆيكيننىڭ تاعايىندالعانىنا ەڭ ءبىرىنشى بولىپ قۋانعان شەشەنستان باسشىسى رامزان قادىروۆ پەن جاك «ۆاگنەردىڭ» قوجايىنى ەۆەگني پريگوجين. بريتان اسكەري ساراپشىلارى سۋروۆيكيندى «قانقۇمار، قاتال» باسشى دەپ اتاعان.

شەشەن سوعىسى

2004 جىلدىڭ ماۋسىمىندا سۋروۆيكين 42-گۆارديالىق موتواتقىشتار ديۆيزياسىنىڭ كومانديرى بولدى. بۇل ديۆيزيا شەشەن سوعىسىنا جاۋاپتى ەدى.

2005 جىلى سۋروۆيكين ديۆيزياسىنداعى «شىعىس» باتالونى بورودزينوۆسكايا ەلدىمەكەنىنە كىردى. سۋروۆيكيننىڭ سولداتتارى قاراپايىم حالىقتىڭ ۇيلەرىن توناپ، ۇرىپ-سوعىپ، ۇرلىق جاساۋمەن اتى شىقتى. جەرگىلىكتى ورىستار مەن اۆارلاردى مەكتەپ اۋلاسىنا كۇشپەن اپارىپ، ەركەكتەردىڭ بارلىعىن اياق-قولدارىن بايلاپ، ەت بەتىنىنەن جەرگە جاتقىزىپ قويعان. الگىلەر 6 ساعات جاۋىننىڭ استىندا، سولاي جاتقان. جاي جاتپاعان. سۋروۆيكيننىڭ سولداتتارىنىڭ تەپكىسىن جەپ جاتقان.

دونەتسككە اسكەر جىبەرۋ

سۋروۆيكين 2014 جىلى دونەتسككە اسكەر جىبەرۋگە جاۋاپتى بولعان. رەسەي موبيليزاتسيانى سول كەزدە-اق باستاپ كەتكەن.

ءسۇريا: باشار اسادتى قورعاۋ

2017 جىلى رف قورعانىس مينيسترلىگىندە بىرنەشە قىزمەت اۋىستىرعان سۋروۆيكين سۇرياعا اتتانادى. سۋروۆيكين باشار اساد جاقتاستارىن اۋەدەن قورعاۋعا جاۋاپتى بولادى. ءسويتىپ، سۋروۆيكين ءسۇريانىڭ وپپوزيتسيا باقىلاۋنىداعى قالالارىن بومبالايدى.

مۇندا دا سۋروۆيكيننىڭ جاقسى اتى شىقپادى. سۋروۆيكين باسقاراتىن رەسەي اۆياتسياسى بەيبىت تۇرعىنداردى، تۇرعىن ۇيلەر مەن اۋرۋحانالاردى بومبالاپ، حيميالىق قارۋ قولدانادى. سۇرياداعى سويقانى ءۇشىن پرەزيدەنت ءپۋتيننىڭ قولىنان «رەسەي باتىرى» دەگەن اتاق الادى.

سۋروۆيكين ۋكراينانىڭ بەيبىت قالالارىن، ازاماتتىق نىساندار مەن تۇرعىن ۇيلەردى بومبالاۋ ىسىنە بايلانىستى حالىقارالىق سوتتا قىلمىسكەرلەردىڭ ءبىرى.

2022 جىلدىڭ 8 قازانىندا ۋكراينا مايدانىنا جاۋاپتى بولىپ تاعايىندالادى. بۇعان شىن قۋانعان ەكى ادامنىڭ ءبىرى - رامزان قادىروۆ سۋروۆيكيندى: «ناعىز جاۋىنگەر»، - دەپ اتاسا، پريگوجين: «اڭىز تۇلعا»، - دەپ ماقتاعان.

ءتۇيىن. حالىقارالىق سوعىستى زەرتتەۋ ينستيتۋتى 10 قازاندا رەسەي ارمياسىنىڭ ۋكراينا قالالارىن جاپپاي بومبالاۋىن - ۋكراينادا ماسقاراسى شىققان رەسەي اسكەرىنىڭ ءيميدجىن كوتەرۋ ءۇشىن جاسالعان امال دەپ باعالاعان.

نۇرگەلدى ابدىعانيۇلى

Abai.kz