قازاقستانعا رەسەيدەن زارارلانعان ارپا اكەلىندى، دەپ حابارلايدى قر اۋىل شارۋاشىلىعى مينيسترلىگىنىڭ ءباسپاسوز قىزمەتى.

«قر اشم اوك مەملەكەتتىك ينسپەكتسيا كوميتەتىنىڭ قىزمەتكەرلەرى يمپورتتىق ونىمدەرگە فيتوسانيتارلىق مونيتورينگ جۇرگىزۋ بارىسىندا كارانتيندىك جۇكتەردىڭ قاۋىپتى ارامشوپتەرمەن زارارلانۋ فاكتىلەرىن انىقتادى. زاڭ بۇزۋشىلىقتار قوستاناي جانە اقتوبە وبلىستارىندا تىركەلدى، وندا زارارلانعان ازىق-تۇلىكتىك ارپا مەن گۋار تۇقىمدارىنىڭ پارتيالارىن اكەلۋگە دەر كەزىندە توسقاۋىل قويىلدى»، — دەلىنگەن دۇيسەنبى كۇنى تارالعان حابارلامادا.

ماسەلەن، اشم مالىمەتىنشە، قوستاناي وبلىسىنىڭ ۇزىنكول اۋدانىندا رەسەي فەدەراتسياسىنان كەلگەن كولەمى 3 توننا گۋار تۇقىمى (گۋار بۇرشاعى) پارتياسىنا قايتالاما فيتوسانيتارلىق باقىلاۋ جۇرگىزۋ كەزىندە اۋماقتىق ينسپەكتسيانىڭ ينسپەكتورلارى كارانتيندىك نىساندارمەن زارارلانۋ بەلگىلەرىن انىقتاعان. الىنعان ۇلگىلەر قوستاناي وبلىستىق كارانتيندىك زەرتحاناسىنا جىبەرىلىپ، ساراپتاما قورىتىندىسى بويىنشا جۋسان جاپىراقتى امبروزيانىڭ (Ambrosia artemisiifolia) بار ەكەنى راستالدى.

«وسىعان ۇقساس زاڭ بۇزۋشىلىق اقتوبە وبلىسىندا دا انىقتالدى. رەسەي فەدەراتسياسىنىڭ باشقۇرتستان رەسپۋبليكاسىنان اۆتوكولىكپەن اكەلىنگەن كولەمى 50 توننا ازىق-تۇلىكتىك ارپا پارتياسىن تەكسەرۋ كەزىندە اۋماقتىق ينسپەكتسيا ماماندارى كارانتيندىك نىساندارمەن زارارلانۋ بەلگىلەرىن تاپتى. فيتوسانيتارلىق ساراپتاما ناتيجەلەرى جۋسان جاپىراقتى امبروزيا مەن ءۇشتىلىمدى امبروزيانىڭ (Ambrosia trifida L.) بار ەكەنىن راستادى»، — دەلىنگەن حابارلامادا.

اكىمشىلىك حاتتامالار تولتىرىلىپ، ماتەريالدار سوتقا جىبەرىلدى.

«امبروزيا — اسا قاۋىپتى كارانتيندىك ارامشوپتەردىڭ ءبىرى. ونىڭ تارالۋى توپىراقتىڭ قۇنارسىزدانۋىنا جانە اۋىل شارۋاشىلىعى داقىلدارىنىڭ ونىمدىلىگىن تومەندەتۋگە اكەلىپ، سالاعا ايتارلىقتاي نۇقسان كەلتىرەدى. سونىمەن قاتار، امبروزيا توزاڭى كۇشتى اللەرگەن بولىپ تابىلادى جانە حالىقتىڭ دەنساۋلىعىنا ەلەۋلى قاۋىپ توندىرەدى»، — دەپ ءتۇسىندىردى اۋىل شارۋاشىلىعى مينيسترلىگى.

Abai.kz