حالىقارالىق «الاش» ادەبي سىيلىعىنىڭ لاۋرەاتى «مەن جىندىمىن»، «بۇلاعاي»، «اي قاراڭعىسى» اتتى تاڭعاجايىپ تۋىندىلاردىڭ اۆتورى تۇرىسبەك ساۋكەتاي بيىلعى مەملەكەتتىك سىيلىقتىڭ ىرىكتەۋىنە وتپەي قالعانى تۋرالى اقپارات بەلگىلى بولعان.

وسىعان بايلانىستى قازاق ادەبيەتىنىڭ الىپ قايراتكەرى مۇحتار ماعاۋين ەل پرەزيدەنتى قاسىم-جومارت كەمەلۇلىنىڭ اتىنا حات جولداپتى. ءبىز مۇحتار ماعاۋيننىڭ وسى حاتىن پورتال وقىرماندارىنا ۇسىنباقپىز.

قازاقستان رەسپۋبليكاسىنىڭ پرەزيدەنتى
          قاسىم-جومارت كەمەلۇلى توقاەۆ
                                                                           مىرزانىڭ نازارىنا!

ايتپاعىم – قازاق رۋحى، قازاق مادەنيەتىنە قاتىستى از عانا ءبىر ءۋاج. 2022 جىلى مەملەكەتتىك سىيلىق تالقىسى تۋرالى سوڭعى حاباردان ەستۋىمشە، بۇگىنگى قازاقتىڭ اتپال جازۋشىسى، ءتىپتى، ەكىنىڭ ءبىرى، ۇزدىك قالامگەر تۇرىسبەك ساۋكەتاي ەڭ سوڭعى ىرىكتەن وتپەي قالىپتى. اباي اتىنداعى ماراپاتقا بىردەن ءبىر لايىقتى – وسى «جەلقايىق» رومانى ەدى. تۇرىسبەك – بۇگىن عانا جەتكەن پروزاشى ەمەس; وتكەن ونجىلدىقتاعى «اي قاراڭعىسى» جانە كەز كەلگەن باسقا دا رومانى وسى مارتەبەگە تاتيتىن. بۇگىن بايگەگە «جەلقايىق» تۇسكەن ەكەن. ايتارى جوق، وسى جاڭا عاسىردا دۇنيەگە كەلگەن ەڭ وزىق تۋىندىلاردىڭ ءبىرى. مۇنداي بيىك كوركەمدىك دەڭگەيدە جازىلعان، بۇگىنگى قازاق قوعامىنىڭ كوكەيتەستى ماسەلەلەرىن كوتەرگەن سوقتالى روماننىڭ مەملەكەتتىك سىيلىققا جەتپەي قالۋى – كوڭىلىندە الالىق جوق زيالى قاۋىم ءۇشىن، كوزى قاراقتى، ۇلت مۇددەسىن ويلايتىن وقىرمان قاۋىم ءۇشىن ۇلكەن وكىنىش بولار ەدى.

تۇرىسبەك ساۋكەتايدى لايىقتى سىيلىعىنا جەتكىزۋ ەندىگى ءسىزدىڭ قولدا تۇر دەپ بىلەمىن...

مۇحتار ماعاۋين،

اباي اتىنداعى مەملەكەتتىك سىيلىق لاۋرەاتى،
قازاقستاننىڭ حالىق جازۋشىسى،
17.ح.2022, امەريكا قۇراما شتاتتارىنان

Abai.kz