بۇگىن ساعات 18:00-دە پرەزيدەنتتىككە ۇمىتكەرلەردىڭ سايلاۋالدى ۇگىت-ناسيحات ناۋقانى باستالدى. سايلاۋ الدىنداعى ۇگىت-ناسيحات سايلاۋدان ءبىر كۇن بۇرىن ياعني 2022 جىلعى 19 قاراشادا ساعات 0:00-دە اياقتالادى.

پرەزيدەنتتىككە التى كانديدات تىركەلىپ، سايلاۋالدى شتابتارىن قۇرۋدى باستاپ كەتتى. سونىمەن قانداي جۇمىستار اتقارىلىپ جاتىر؟ شولىپ وتەيىك.

استانادا قازاقستان رەسپۋبليكاسىنىڭ پرەزيدەنتتىگىنە «اۋىل» حالىقتىق-دەموكراتيالىق پاتريوتتىق پارتياسىنان كانديدات جيگۋلي دايراباەۆتىڭ رەسپۋبليكالىق شتابىنىڭ رەسمي اشىلۋى ءوتتى.

كانديداتتىڭ رەسپۋبليكالىق شتابىنىڭ باسشىسى تولەۋتاي راحىمبەكوۆتىڭ ايتۋىنشا، كانديداتتى قولداۋ جونىندەگى شتابتار رەسپۋبليكالىق ماڭىزى بار ءۇش قالانى قوسا العاندا، ەلىمىزدىڭ بارلىق 20 وڭىرىندە بار. سونداي-اق، بارلىق 164 اۋداندا جانە 37 وبلىستىق دەڭگەيدەگى قالادا 222 شتاب ۇيىمداستىرىلدى. بارلىق قوعامدىق شتاب ۇگىت-ناسيحات جۇمىستارىنا قاجەتتى زاتپەن تولىق قامتاماسىز ەتىلگەن.

ءوز سوزىندە قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايراباەۆ پارتيا مۇشەلەرىنە سەنىم بىلدىرگەنى ءۇشىن العىس ايتىپ، ءىس-شاراعا قاتىسۋشىلاردى ءوزىنىڭ سايلاۋالدى باعدارلاماسىمەن تانىستىردى.

«مەنىڭ سايلاۋالدى باعدارلامام ءبىزدىڭ باستى ۇلتتىق ارتىقشىلىقتارىمىز – دالا دەموكراتياسى قاعيداتتارىن; جوعارى رۋحاني-ادامي مادەنيەتتى; كۇشتى اگرارلىق سالانى جانە مىقتى وڭىرلەردى بارىنشا ىسكە اسىرۋعا نەگىزدەلگەن جاڭا قازاقستاندى قۇرۋعا باعىتتالعان. اتا – بابا مۇراسىن قاستەرلەپ قۇرمەتتەيتىن جانە ۇلتتىڭ بولاشاعى ءۇشىن شىن پەيىلمەن الاڭدايتىن ءاربىر قازاقستاندىق مەنىڭ باستامالارىمدى قولدايتىنىنا جانە قازاقستان رەسپۋبليكاسىن ودان ءارى دامىتۋ جونىندەگى ورتاق ءىستىڭ قوزعاۋشى كۇشىنە اينالاتىنىنا سەنىمدىمىن»، – دەدى كانديدات جيگۋلي دايراباەۆ.

"قازاق انالارى – داستۇرگە جول" رەسپۋبليكالىق قوعامدىق بىرلەستىگىنىڭ اتىنان ۇسىنىلعان قر پرەزيدەنتتىگىنە كانديدات سالتانات تۇرسىنبەكوۆانىڭ دا سايلاۋالدى شتابى قۇرىلىپ، ۇگىت-ناسيحات پروتسەسىنە دايىندىقتى باستادى. شتاب كانديداتتىڭ سايلاۋالدى باعدارلاماسىن ەگجەي-تەگجەيلى تالقىلادى. سالتانات تۇرسىنبەكوۆا كۇشتەردى ادىلدىك پەن الەۋمەتتىك تەڭدىكتى قامتاماسىز ەتۋگە، بالالاردى، ايەلدەردى، قارتتاردى جانە مۇمكىندىگى شەكتەۋلى ادامداردى قورعاۋ مەن قولداۋدىڭ ءتيىمدى جانە ناقتى تەتىگىن قۇرۋعا باعىتتايدى.

قۇجاتتا ءۇش نەگىزگى باعىت انىقتالعان: وتباسىلاردىڭ ءال-اۋقاتىن جاقسارتۋ، وتباسىنىڭ قاۋىپسىزدىگىن قامتاماسىز ەتۋ، سونداي-اق ادامي كاپيتالدى دامىتۋ. سالتانات تۇرسىنبەكوۆا جۇمىسپەن قامتۋ، الەۋمەتتىك قورعاۋ، تۇرعىن ۇيگە قولجەتىمدىلىك، وتباسىلىق-تۇرمىستىق زورلىق-زومبىلىققا قارسى ءىس-قيمىل، ءبىلىم بەرۋ جۇيەسىن جاڭعىرتۋ، وعان مۇقتاج ازاماتتارعا پسيحولوگيالىق جانە قۇقىقتىق كومەكتىڭ قولجەتىمدىلىگىن قامتاماسىز ەتۋ سياقتى سالالارداعى وزگەرىستەر مەن رەفورمالاردى جوسپارلاپ وتىر.

كانديدات تۋرالى بارلىق قاجەتتى اقپارات، سايلاۋ الدىنداعى باعدارلاما، جوسپارلانعان ءىس-شارالاردىڭ سوڭعى جاڭالىقتارى مەن حابارلاندىرۋلارى جاريالاناتىن سايت پەن الەۋمەتتىك جەلىلەر ازىرلەندى.

بۇگىن جالپىۇلتتىق سوتسيال-دەموكراتيالىق پارتيادان قر پرەزيدەنتتىگىنە ۇمىتكەر نۇرلان اۋەسباەۆتىڭ سايلاۋالدى شتابىن اشۋ جونىندەگى ۇيىمداستىرۋ كوميتەتىنىڭ جيىنى ءوتتى. شاراعا پارتيانىڭ ساياسي كەڭەسىنىڭ مۇشەلەرى مەن قوعام بەلسەندىلەرى قاتىستى.

جيىنعا قاتىسۋشىلار سايلاۋالدى شتابتىڭ جەتەكشىسى قىزمەتىنە كانديداتقا داۋىس بەردى. جەتەكشىلىككە ءبىراۋىزدان  جسدپ توراعاسى اسحات راحىمجانوۆ سايلاندى.

پارتيا باسشىسى جينالعاندار الدىندا ۇگىت-ناسيحات الدىنداعى جۇمىس قورىتىندىسىن باياندادى. سپيكەردىڭ ايتۋىنشا، جسدپ اتىنان كانديداتتى قولداۋ ماقساتىندا ەلدىڭ تۇكپىر-تۇكپىرىنەن 121 مىڭنان اسا قول جينالعان. ونىڭ 119 مىڭنان استامى ەسەپكە الىندى.

«وكىنىشكە قاراي، اۋماقتىڭ سايلاۋ كوميسسيالارى جينالعان قولدىڭ ءبىر بولىگىن ءتۇرلى سىلتاۋمەن كەرى قايتاردى. بۇعان قاراماستان ءبىز زاڭنامادا بەلگىلەنگەن كولەمدى ارتىعىمەن جينادىق»، – دەپ حابارلادى سايلاۋالدى شتاب جەتەكشىسى اسحات راحىمجانوۆ.

شتاب وكىلدەرىنىڭ مالىمدەۋىنشە، جسدپ كانديداتى ۇگىت-ناسيحات ناۋقانىن قاراعاندى وبلىسىنان باستادى.

كانديدات شاحتينسك قالاسىنا جولعا شىقتى، ول جەردە جەرگىلىكتى سايلاۋشىلارمەن ەرتەڭگە كەزدەسۋ جوسپارلانعان.

قر پرەزيدەنتتىگىنە كانديدات قاسىم-جومارت توقاەۆتى قولداۋ جونىندەگى رەسپۋبليكالىق قوعامدىق شتاب ەلىمىزدىڭ بارلىق وڭىرىندە ۇگىت-ناسيحات ناۋقانىن باستادى.

رەسپۋبليكالىق قوعامدىق شتابقا 3 پارلامەنتتىك ساياسي پارتيادان جانە 22 رەسپۋبليكالىق قوعامدىق ۇيىمداردان تۇراتىن حالىقتىق كواليتسيانىڭ وكىلدەرى كىردى.

بۇگىن حالىقتىق كواليتسيانىڭ بەلسەندىلەرى ەلىمىزدىڭ بارلىق وڭىرىندە ۇگىت-ناسيحات باسپا ونىمدەرىن تاراتۋ جانە اقپاراتتىق ماتەريالداردى باق پەن الەۋمەتتىك جەلىلەرگە جاريالاۋدى باستادى.

ەرتەڭ رەسپۋبليكالىق قوعامدىق شتابتىڭ العاشقى وتىرىسى وتەدى. سونىمەن قاتار، كەلەسى اپتادان باستاپ رقش مۇشەلەرى سايلاۋشىلارمەن كەزدەسۋ ءۇشىن ايماقتارعا بارادى.

سونداي-اق، كانديدات قاسىم-جومارت توقاەۆتى قولداۋ جونىندەگى رەسپۋبليكالىق قوعامدىق شتاب الەۋمەتتىك جەلىلەردە جەكە پاراقشالار اشتى. وندا شتابتىڭ ءىس-شارالارى، سايلاۋشىلارمەن كەزدەسۋلەر تۋرالى بارلىق اقپارات جانە وزگە دە ۇگىت-ناسيحات ماتەريالدارى جاريالانادى.

پرەزيدەنتتىككە كەلەسى ۇمىتكەر مەيرام قاجىكەننىڭ سايلاۋالدى شتابىنىڭ اشىلۋى ءوتىپ، ۇگىت-ناسيحات ناۋقانىن باستاعانىن جاريالادى.

"ازاماتتىق قوعامنىڭ دامۋىنا، ونىڭ ىشىندە كاسىپوداق مۇددەلەرىن كورسەتەتىن مەملەكەت، جۇمىس بەرۋشى جانە قىزمەتكەر اراسىنداعى ديالوگ ىقپال ەتەدى. ءبىز زاڭنامالىق دەڭگەيدە تاراپتار ديالوگىن قولدانۋ اياسىن كەڭەيتۋگە، سول ارقىلى الەۋمەتتىك ارىپتەستىك ينستيتۋتىن جەتىلدىرۋگە نيەتتىمىز", - دەدى مەيرام قاجىكەن.

كانديداتتىڭ ايتۋىنشا، مىندەتتەر كۇردەلى، الايدا ولاردى ورىنداۋ مۇمكىن، سەبەبى بۇل باعىتتار ەكونوميكانىڭ بارلىق سالالارىنداعى رەفورمالارعا باعىتتالعان.

مەيرام قاجىكەندى ونىڭ سەرىكتەسى اندرەي پريگور – رەسپۋبليكالىق كاسىپوداقتار بىرلەستىگىنىڭ باسشىسى قولدادى. ول كاسىپوداقتار الداعى سايلاۋدان ايتارلىقتاي وزگەرىستەردى كۇتەتىندىگىن اتاپ ءوتتى.

"كاسىبي الەۋمەتتىك قىزمەتكەرلەردىڭ ۇلتتىق اليانسى" رەسپۋبليكالىق قوعامدىق بىرلەستىگى اتىنان رەسپۋبليكاسىنىڭ پرەزيدەنتى لاۋازىمىنا ۇمىتكەرلىككە ۇسىنىلعان قوعام قايراتكەرى قاراقات ابدەن دە بۇگىن ءوز ەلىمىزدىڭ بارلىق وڭىرلەرىندە وفلاين جانە ونلاين ۇگىت-ناسيحات ناۋقانىن باستادى.

كانديداتتى قولدايتىن قوعامدىق شتابتىڭ رەسمي سايتى اشىلدى: www.abden.kz. الەۋمەتتىك جەلىلەردەگى اككاۋنتتار جۇمىس ىستەيدى (https://www.facebook.com/abdenova.karakat جانە https://www.instagram.com/abdenkarakat/), وندا شتابتىڭ ءىس-شارالارى، سايلاۋشىلارمەن كەزدەسۋلەر جانە باسقا ۇگىت ماتەريالدارى تۋرالى بارلىق اقپارات ورنالاستىرىلادى.

سونداي-اق، شتاب استانا قالاسىنىڭ LED-ەكراندارىندا ۇگىت-ناسيحات ماتەريالدارىن ىسكە قوستى، وڭىرلەردە تاراتۋ ءۇشىن پاراقشالار دايىندادى، تەلەارنالاردا ترانسلياتسيالاۋ ءۇشىن ۇگىت-ناسيحات بەينەروليگى جۇرگىزىلدى.

Abai.kz