بۇگىن مەيرام، تۇسىنە بىلگەن ادامعا ۇلىق مەيرام! بۇگىن ەگەمەندىك دەكلاراتسياسى جاريالانعان تاريحي كۇن!

وسىعان وراي مەنى، بارىنەن بۇرىن اكادەميك سالىق زيمانوۆتىڭ وسى دەكلاراتسياعا سىڭىرگەن ەرەن ەڭبەگى تۋرالى كوزى كورگەندەر ايتىپ باستاعانى قۋانتادى.

كەزىندە بۇل تۋرالى ءوزىمىز ىزدەنىپ ءجۇرىپ وقىدىق، سول كەزدىڭ ءتىرى كۋالەرىنەن شامامىز جەتكەنشە سۇراپ بىلدىك. بىراق كەيىنگى جاستاردى ايتپاعاندا، مەنىڭ زامانداستارىم اراسىندا سالىق زيمانوۆ اقساقالدىڭ ەرلىگىن بىلەتىندەر قاتارى تىم از ەدى.

    ويتكەنى، ءنان قۇرعان جۇيە ءۇشىن زيمانوۆ سياقتى حالىقتان باسقا ەشكىمگە تاۋەلسىز، الىپ تۇلعالار كەرەك ەمەس ەدى.

ايتپەسە، جوعارعى كەڭەستىڭ سول كۇنگى تاريحي سەسسياسىنداعى التى ساعاتتان اسقان قىپ-قىزىل شايقاستا 85 دەپۋتاتتىڭ قۇيتىرقى سۇراقتارىنا جاسى جەتپىسكە كەلگەن زيمانوۆ اقساقالدىڭ تابانىنان تىك تۇرىپ، تويتارىس بەرگەن ەرلىگىن قالاي-قايتىپ ۇمىتۋعا بولادى؟!

اپىرماي، ءبارى وسىلاي ەلەۋسىز، ناسيحاتسىز قالا بەرە مە دەپ الاڭداپ جۇرگەنىمىزدە، اۋەلى اقساقالدىڭ وزىنە، كەيىن ۇلى مۇحتار زيمانوۆقا قىلمىستىق ءىس قوزعاتىپ، ونى 13 جىلعا سوتتاپ جىبەرگەندەرى جىعىلعانعا جۇدىرىق بولدى. سالىق اقساقالدا ارتىنان كوپ ۇزاماي قايتىس بولدى. ءبارى وسىمەن بىتكەن ەكەن، تىنعان ەكەن دەگەم…

سويتسەك اقيقاتتىڭ اق تاڭى اتپاي تۇرمايدى ەكەن!

بۇگىن مەيرام! ۇلىق مەيرام!

وسى مەيرامدا سالىق زيمانوۆتاي قازاق زاڭگەرلەرىنىڭ پاتريارحىن ءبىر ەسكە الىپ قويايىق، اعايىن!

ابزال قۇسپان

Abai.kz