ۋكراينا ايەلدەرىنىڭ باتىرلىعى قازىرگى كۇنى بۇكىل الەمدى تاڭعالدىرىپ وتىر. اسكەر قاتارىنا قوسىلىپ، وتانىن قورعاۋ – اركىمنىڭ قولىنان كەلە بەرمەيتىن باتىلدىق. مارگاريتا ريۆچاچەنكو اتتى ۋكراين قىزى دا وتان قورعاۋ – ءوز بورىشىم دەپ بىلگەن وجەت ادام. بەيبىت كۇندە جۋرناليست بولعان ول، قازىر قان مايداندا فەلدشەر قىزمەتىن اتقارىپ ءجۇر. بۇل تۋرالى ELLE.UA باسىلىمى جازىپتى.

كەيىپكەردىڭ اتى-ءجونى: مارگاريتا ريۆچاچەنكو،

جاسى: 25-تە،

شەنى – كىشى سەرجانت.

– 24 اقپاندا تاڭەرتەڭ كوزىڭىزدى اشقاندا ەڭ ءبىرىنشى نە ويلادىڭىز، نە ىستەدىڭىز؟

– دابىلدان بىرنەشە مينۋت بۇرىن ويانعان ەدىم. تەلەفونىما كوپ حاتتار كەلىپتى. سودان كەيىن اكەمە قوڭىراۋ شالدىم. ەلدە سوعىس باستالعانىن ەستىدىم.

– سوعىسقا بارۋ تۋرالى شەشىمدى قالاي قابىلدادىڭىز؟

– اياق استىنان قابىلدادىم. 24 اقپاندا مەنىڭ اسكەريلەرگە كومەكتەسۋىم كەرەك دەپ ويلادىم. باسقا جولدى كورمەدىم. ول كەزدە اسكەري قىزمەتشى بولام دەگەن وي بولمادى. جورتولەگە جاسىرىنعاننان گورى، قارۋ-جاراعى بار اسكەريلەردىڭ قاتارىندا جۇرگەنىم قاۋىپسىزدەۋ شىعار دەپ جورامالدادىم.

– بۇل جەردەگى قىزمەتىڭىز قانداي، كۇنىڭىز قالاي وتەدى؟

– ءارتۇرلى. كەيدە تىنىش، بىرنەشە ادامعا كەڭەس بەرىپ قانا قويامىن. كەيدە جاعداي ۋشىعىپ كەتەدى. ناۋقاستاردى اۋرۋحاناعا جەتكىزۋ كەرەك، توتەنشە جاعدايلاردى باقىلاۋعا الۋ كەرەك بولادى. سونىمەن قاتار، ءبىز اتىس پوليگونىنا شىعىپ تۇرامىز. مەن تاكتيكالىق مەديتسينادان ساباق بەرەمىن، ءوزىم دە جاتتىعامىن.

– ءسىزدىڭ بولىمشەڭىزدە گەندەرلىك كەمسىتۋشىلىك بار ما؟

– مەنىڭ بولىمشەمدە جوق. ول جەردە مەنى قورعايدى. بىراق باسقا بولىمشەلەردە جاعداي ءارتۇرلى. ەگەر ءسىز كىشى سەرجانت بولساڭىز، ونىڭ ۇستىنە ايەل بولساڭىز، سىزگە كاسىبي مامان رەتىندە سەنبەۋى مۇمكىن، شەتتەتۋى مۇمكىن.

– قانداي قيىندىقتاردى باستان كەشتىڭىز؟

– بىرىنشىدەن، فيزيكالىق دايىندىق تۇرعىسىنان قيىن. برونەجيلەت كيىپ، جاتتىعۋ جاسايمىز. ءسىز پوليگونعا شىققاندا تەك قاراپ وتىرمايسىز، بۇكىل ساۋىت-سايماندى كيىپ الىپ، جۇگىرىپ ءجۇرىپ، ساباق وتكىزەسىز.

ەكىنشىدەن، بوستاندىعىڭىز شەكتەۋلى ەكەنىن ءتۇسىنۋ كەرەك. ءوز بەتىڭىزشە ەشتەڭە ىستەي المايسىز. بىراق ءىس جۇزىندە نيەت بولسا، ءبارىن جەڭۋگە بولادى.

– تولىققاندى سوعىس كەزىندە ءسىزدى نە تاڭقالدىردى؟

– بىرلىك بار جەردە ماسەلەنى تەز شەشۋگە بولاتىندىعى تاڭ قالدىردى. مەن مۇندا ەرىكتىلەر تۋرالى ايتىپ وتىرمىن. ولار جوق نارسەنى تاۋىپ كەلەدى.

– قازىر ءسىزدىڭ رۋحىڭىزدى تۇسىرمەي تۇرعان نە؟

– مەنىڭ جاقىندارىم مەن بولاشاق ارماندارىم. كونتسلاگەردەن امان قالىپ، كەيىنىرەك تەراپەۆت بولىپ ىستەگەن ايەلدىڭ ءومىرى تۋرالى ەديت ەگەردىڭ «تاڭداۋ» كىتابىن وقىعان سوڭ، مەندە سوعىستان كەيىن باسقالارعا كومەكتەسەم دەگەن ارمان پايدا بولدى.

– ۋكراينانىڭ بولاشاعىنان قانداي پەرسپەكتيۆالاردى كورەسىز؟

– بىرىنشىدەن، ۋكراينا بۇرىننان بار مەملەكەت، الداعى ۋاقىتتا دا جاساي بەرمەك. ەكىنشىدەن، حالىقتى، ەكونوميكانى وڭالتۋدىڭ قيىن كەزەڭى كۇتىپ تۇر. بىراق ءبىزدىڭ حالقىمىز عاسىرلىق سوعىستى باستان وتكەردى، سوعان قاراماستان ءوزىن، مادەنيەتىن جانە گەنوفوندىن جوعالتپادى. سوندىقتان ءبىز ودان ءارى ءومىر سۇرە بەرەمىز. بۇرىنعىداي بولمايدى، بىراق ءومىر ءسۇرۋىمىزدى توقتاتپايمىز. سونداي-اق ەلدە بالا سانى كوبەيەدى دەپ ويلامىن.

– سوعىستان كەيىن ومىرىڭىزدەگى نە نارسەنى ماڭگىلىككە وزگەرتەسىز؟

– كۇردەلى سۇراق. مەن ەندى ەشقاشان «ەشقاشان بولمايدى» دەپ ايتپايمىن. سوعىس «قوزعالىس تراەكتوريامىزدىڭ» وزگەرمەيتىنىنە كۇمان تۋعىزدى. سوندىقتان مەن ەشتەڭەگە ۋادە بەرمەيمىن.

– ۋكراينالىقتار مەن الەمگە نە ايتاسىز؟

– العىس ايتقىم كەلەدى. ۋكراينانىڭ قارۋلى كۇشتەرىنە راحمەت ايتقان حالىقتى كورگەندە، مەن دە ءدال سولاي راحمەتىن قايتارعىم كەلەدى. تاعى ايتارىم، ءبىز ءالى قينالامىز. وتە قيىن بولادى. ۇزاق ۋاقىت بويىنا قيىندىق كورەمىز. بىراق ءبىز كۇشتىمىز. ءبىز سۇيە الاتىن حالىقپىز. ءوز باۋىرلارىمىزعا، ەلگە، حالىققا دەگەن سۇيىسپەنشىلىكتىڭ ارقاسىندا ءبىز جەڭىسكە جەتەمىز.

دايىنداعان ايجان تەمىرحان

Abai.kz