ازاماتتار باسقا ۋچاسكەدە داۋىس بەرگەن جاعدايدا 4 قاراشادان باستاپ ەسەپتەن شىعارۋ كۋالىگىن الا الادى. بۇل تۋرالى ورتالىق سايلاۋ كوميسسياسىنىڭ توراعاسى نۇرلان ءابدىروۆ حاباردار ەتتى.

"جەرگىلىكتى اتقارۋشى ورگاندارعا ەكى تاپسىرما بەرىلدى. ءبىرىنشىسى – جازباشا وتىنىشتەر، ونىڭ ىشىندە ۋاقىتشا تىركەلگەن ازاماتتار نەگىزىندە ازاماتتاردى سايلاۋشىلار تىزىمىنە ەنگىزۋ ءتارتىبى تۋرالى كەڭىنەن حاباردار ەتۋ. ەكىنشى تاپسىرما – اقپاراتتىق سەرۆيستەردىڭ، دالىرەك ايتساق، كولل-ورتالىقتاردىڭ، تسيفرلىق سەرۆيستەردىڭ، ينتەرنەت-رەسۋرستاردىڭ سايلاۋشىلار تىزىمىنە ەنگىزىلۋىن تەكسەرۋ جانە ازاماتتارعا ولاردىڭ سايلاۋشىلار تىزىمىنە ەنگىزىلگەنى تۋرالى اقپارات بەرۋ بويىنشا بارىنشا جۇمىس ىستەۋى كەرەك", – دەدى نۇرلان ءابدىروۆ.

ونىڭ ايتۋىنشا، سايلاۋدىڭ دۇرىس ۇيىمداستىرىلۋى داۋىس بەرۋشىلەر ءتىزىمىنىڭ تياناقتى جاسالۋىنا بايلانىستى.

ورتالىق سايلاۋ كوميسسياسى داۋىس بەرۋگە ارنالعان بيۋللەتەن ءماتىنى بەكىتىلگەنىن ايتتى. پرەزيدەنتتىككە ۇمىتكەرلەردىڭ اتى-ءجونى الفاۆيتتىك رەتپەن جازىلعان جانە "بارىنە قارسى" دەگەن جول ەنگىزىلگەن. ورتالىق سايلاۋ كوميسسياسى "بارىنە قارسى" دەگەن جول سايلاۋ ناتيجەسىنە ەشقانداي اسەر ەتپەيتىنىن مالىمدەدى.

وسك تاعى 63 باقىلاۋشىنى اككرەديتتەدى. اككرەديتتەۋگە ۇسىنىس تۇسۋىنە قاراي حالىقارالىق بايقاۋشىلار بويىنشا دەرەكتەر جاڭارتىلادى.

Abai.kz