"تالاسقا تۇسسە جان مەن تۋ،

جان ەمەس ماعان كەرەگى..."

الاۋلاتتىق، جالاۋلاتتىق. اشىق اسپان استىندا "الاش ۇلدارى" مەن ەركە ەسماحاننىڭ كونتسەرتىن كوردىك. سودان سوڭ وتشاشۋدى تاماشالادىق. ۇيگە ءتۇن جارىمدا ءبىر-اق كەلدىم. كەلە سالا مۇرتتاي ۇشتىم. تۇلا بويىمدى ابدەن سۋىق الىپ قالىپتى. جۇمىسقا بارا الماي جاتىرمىن",- دەيدى مادەنيەت سالاسىندا قىزمەت ىستەيتىن ءبىر تانىسىم.

ادەتتە ناۋرىز ايى تۋا سالا، ساندىقتاعى شاپانىمىزدى الىپ شىعاتىنبىز. كەشەگى مەرەكەدە كەزەك كوك تۋعا ءتيدى. كوشە تولى تۋ ۇستاعان،  جامىلىپ العان، ورانىپ العان كوپ حالىق.

ءيا، رەسپۋبليكا كۇنى تۋ ۇستاپ شىققاننىڭ ەش سوكەتتىگى جوق شىعار. كوك تۋىمىزدى ۇلتتىق ماقتانىش، پاتريوتتىق سەزىممەن كوتەرىپ جۇرگەندەر بولسا – مارحابات. بىراق قىزىق ءۇشىن، ءسان ءۇشىن، سەلفي ءۇشىن ۇستاپ جۇرگەندەر قانشاما.

اسەرشىل بولامىز دەپ، اسىرەشىل بوپ كەتەمىز كەيدە. "اسىرە قىزىل تەز وڭار...".

ءيا، بەيبىت كۇندە ءبارى باتىر، ءبارى پاتريوت. ناعىز ەر – ەل باسىنا كۇن تۋعاندا، تۋ كوتەرىپ شىعار بولار!

قاڭتار قاسىرەتى كەزىندە، كوك تۋدى وق پەن وتتىڭ ورتاسىنان الىپ شىققان بەرىك ابىشەۆتەي قايسار قازاقتى كەيىمىز بىلسەك، كەيىمىز بىلە بەرمەيمىز. كەشەگى مەرەكەدە ول ازامات تۋرالى مۇلدە ۇمىتىپ كەتتىك.

مۇرات راقىمجان

سەمەي قالاسى

Abai.kz