جەكسەنبى, 5 اقپان 2023
بيلىك 856 0 پىكىر 20 قاراشا, 2022 ساعات 14:36

شەتەلدىك بايقاۋشىلار: سايلاۋ ۋچاسكەلەرىنىڭ تەحنيكالىق نورمالارى حالىقارالىق تالاپقا ساي

بۇل تۋرالى شەت مەملەكەتتەردىڭ بايقاۋشىلارى استانادا ءوتىپ جاتقان ءباسپاسوز ءماسليحاتىندا مالىمدەدى، دەپ جازدى BAQ.KZ.

"شەت مەملەكەتتەردىڭ بايقاۋشىلارى رەتىندە كەلىپ وتىرمىز. ءبىز بىرنەشە سايلاۋ ۋچاسكەسىنە بارىپ كوردىك. ءبارى وتە جوعارى دەڭگەيدە ۇيىمداستىرىلعانىن اتاپ وتكىم كەلەدى. بۇل سايلاۋدىڭ قازاقستان ءۇشىن ماڭىزى وتە ۇلكەن. ءبىز داۋىس بەرۋشىلەر تاراپىنان جوعارى بەلسەندىلىكتى بايقادىق. بەلسەندىلىكتىڭ مۇنداي دەڭگەيى ولاردىڭ قولداۋىن بىلدىرەدى", - دەپ اتاپ ءوتتى حورۆاتيا رەسپۋبليكاسى پارلامەنتى توراعاسىنىڭ ورىنباسارى داۆوركو ۆيدوۆيچ.

ال ليتۆالىق بايقاۋشى سايلاۋ بارىسىندا وزىنە قىزىق بولعان جايتتارمەن ءبولىستى.

"سىزدەر زاڭدارىڭىزدى وزگەرتىپ، وسى پرەزيدەنت سايلاۋىن وتكىزىپ جاتىرسىزدار. پرەزيدەنتتى 7 جىل مەرزىمگە سايلاۋ – بۇل جاڭا دەموكراتيالىق جاڭالىق. ءبىز ءوزارا ساياساتكەرلەرمەن تالقىلاۋ بارىسىندا مۇنىڭ وتە ۇلكەن قادام بولعانىن ايتقىمىز كەلەدى. ەشقانداي زاڭ بۇزۋشىلىقتى بايقامادىق. العاش رەت داۋىس بەرىپ جاتقان جانداردى، وتباسىمەن، كىشكەنتاي بالالارىن كوتەرىپ، داۋىس بەرىپ، بيۋللەتەندەرىن سالعان ازاماتتاردى كوردىك. وپەرا جانە بالەت تەاترىنا كەلىپ داۋىس بەرگەن بۇرىنعى پرەزيدەنتتەرىڭىزدى كورۋ دە قىزىق بولدى. باق وكىلدەرىنىڭ جوعارى قىزىعۋشىلىعىن بايقادىم. بۇگىنگى سايلاۋ تۋرالى جاقسى اسەردەمىن", - دەدى ليتۆا رەسپۋبليكاسى سەيمىنىڭ ەكونوميكالىق كوميتەتىنىڭ توراعاسى كازيا ستاركياۆيچيۋس.

"شەتەل بايقاۋشىسى رەتىندە جانە مولدوۆا پارلامەنتى دەلەگاتسياسىنىڭ اتىنان ەلدەرىڭىزدەگى بۇعان دەيىنگى پارلامەنت سايلاۋىنا قاتىسقانمىن. تاڭەرتەڭنەن بەرى 10 سايلاۋ ۋچاسكەسىن ارالاپ كوردىك. استانا قالاسىنداعى سايلاۋ ۋچاسكەلەردەگى تەحنيكالىق نورمالار ەلدەگى جانە حالىقارالىق زاڭدارعا ساي ارەكەت ەتىپ جاتىر. ادامدار ۋچاسكەلەردىڭ قايدا ورنالاسقاندىعىنان حاباردار. ەرىكتىلەر دە جاقسى جۇمىس ىستەۋدە. ۆولونتەرلەر قوزعالىسىنىڭ مىقتى ەكەنىن بايقادىم. ەپيدەمياعا قارسى شارالار بارلىق ۋچاسكەلەردە ەسكەرىلگەن", - دەيدى تمد پاا، ەقىۇ پارلامەنتتىك اسسامبلەياسىنداعى مولدوۆا رەسپۋبليكاسى پارلامەنتى دەلەگاتسياسىنىڭ مۇشەسى ۆاسيل بوليا.

ايتا كەتەيىك، قر شەت مەملەكەتتەردەگى وكىلدىكتەرىنىڭ جانىنان 68, ال ەل اۋماعى بويىنشا 10 مىڭنان استام سايلاۋ ۋچاسكەسى قۇرىلدى.

 

Abai.kz

0 پىكىر